અમદાવાદ : નિકોલમાં રહેતી યુવતી ગર્ભવતી બનતા પતિ સહિત સાસરિયાંઓ બાળક ન રાખવા માટે દબાણ કરતા હતા.યુવતીએ બાળક રાખવાની વાત કરી ત્યારે પતિ સહિત સાસરિયાંઓ છૂટાછેડા આપવા માટે દબાણ કરી જાનથી મારી નાખવાની ધમકી આપવા લાગ્યા હતા.તંગ આવેલી યુવતી તેના પિયરમાં રહેવા ચાલી આવી હતી,બાદમાં તેણે તેના પતિ સહિત સાસરિયાંઓના વિરુદ્ધમાં ફરિયાદ નોંધાવતા કૃષ્ણનગર પોલીસે ગુનો નોંધી વધુ તપાસ હાથ ધરી છે.
નિકોલમાં 27 વર્ષીય યુવતીના બીજા લગ્ન વર્ષ 2019માં થયા હતા.લગ્ન બાદ યુવતી પતિ સહિતના સંયુક્ત પરિવારમાં રહેવા ચાલી ગઈ હતી.જો કે લગ્નના થોડા મહિના સુધી યુવતીને સારી રીતે રાખી હતી બાદમાં નાની નાની બાબતે ઝઘડો કરી મેણાટોણા મારવા લાગ્યા હતા અને પિતાના ઘરેથી કોઈ કરીયાવર લઈને આવી નથી તેમ કહીને ત્રાસ આપવા લાગ્યા હતા.
લગ્ન જીવનમાં યુવતી ગર્ભવતી બની હતી ત્યારે મારે છોકરુ જોઈતુ નથી અને જો તારે છોકરુ જોઈતુ હોય તો તારા બાપના ઘરેથી પૈસા લઈને આવજે અને ડીલીવર પણ ત્યાં જ કરજે તેમ કહીને દિકરો ન રાખવા માટે દબાણ કરતા હતા.જો કે યુવતીને દિકરો રાખવો હોવાથી તેણે પિતાના ઘરેથી પૈસા લાવવાની ના પાડી ત્યારે ઉશ્કેરાયેલા પતિ સહિત સાસરિયાંઓ અવાર નવાર ત્રાસ આપીને છૂટાછેડા માટે દબાણ કરતા હતા જો કે છૂટાછેડા આપવાની ના પાડી ત્યારે ઉશ્કેરાયેલા પતિ સહિત સાસરિયાંઓએ જાનથી મારી નાખવાની ધમકી આપીને હેરાન કરવા લાગ્યા હતા.
