અમદાવાદ : ગુજરાતમાં કોરોના સંક્રમિતોની સંખ્યામાં સતત વધારો જારી રહ્યો છે.આ સાથે છેલ્લા પખવાડિયાથી વકરી રહેલું કોરોનાનું સંક્રમણ ચિંતાજનક બની રહ્યું છે.છેલ્લા ૨૪ કલાકમાં કોરોનાના કેસનો આંકડો 420ને આંબી ગયો ગયો છે.અલબત્ત,કોરોના સંક્રમણથી આજે એકપણ દર્દીનું મૃત્યુ થયું નથી,પરંતુ અમદાવાદ સહિતના મહાનગરોમાં કોરોનાના નવા કેસોમાં ચિંતાજનક વધારો કોરોના પ્રોટોકોલ ન જાળવતા નાગરિકો માટે લાલબત્તી સમાન બની રહ્યા છે.બુધવારે અમદાવાદના 156 કેસ નોંધાયા છે.રાજ્યના 33 જિલ્લામાંથી માત્ર 16 જિલ્લામાં કોરોનાનો એક પણ કેસ નોંધાયો નથી.એટલે કે,રોજ એક નવા જિલ્લામાં કોરોનાના કેસો મળી રહ્યા છે.મહિનાના પ્રારંભથી શરૂ થયેલો કોરોનાના કેસોનો વધારો કોરોના પ્રોટોકોલના પાલનમાં દાખવવામાં આવતી બેદરકારી સાબિત કરી રહી છે.હાલની સ્થિતિ જોતા આગામી દિવસોમાં કોરોનાનું સંક્રમણ આકરું સ્વરૂપ ધારણ કરે તેવી શક્યતા છે.
અમદાવાદ શહેરમાં રોજે રોજ સંક્રમિતોની સંખ્યામાં વધારો થઈ રહ્યો છે.જોકે,છેલ્લા ચોવીસ કલાકમાં નોંધાયેલા નવા 420 કેસમાં ગઈકાલની સરખામણીઓ ઓછા પરંતુ રાજ્યભરમાં સૌથી વધુ કેસ અમદાવાદ શહેરના 156 અને ગ્રામ્યના 5 મળી કુલ 161 કેસ ઉમેરાયા છે.અમદાવાદ બાદ અન્ય મહાનગરોની સ્થિતિ જોઇએ તો સૌથી વધુ કેસમાં સુરત શહેરમાં 79 અને જિલ્લાના 13 મળી કુલ 92,વડોદરામાં કુલ 59,રાજકોટમાં કુલ 13,ભાવનગરમાં 05,ગાંધીનગરમાં કુલ 16,જામનગર 3 અને કચ્છમાં 9,ભરૂચમાં 5,મહેસાણા 17 અને નવસારીમાં 6,પંચમહાલ,પોરબંદર,પાટણમાં બબ્બે,રાજકોટ 13અને તાપીમાં એક કેસ નોંધાયા છે.છેલ્લા ચોવીસ કલાકમાં 256 દર્દી ડિસ્ચાર્જ થયા છે અને રિકવરી રેટ ૯૯ ટકા રહ્યો છે.
જૂન મહિનાના પ્રારંભથી જ રાજ્યભરમાં કોરોનાનો ધીમે પગલે થઈ રહેલો પગ પેસારો હવે વિકરાળ સ્વરૂપ ધારણ કરી રહ્યો છે.એક્ટિવ કેસની સંખ્યા વધીને 2463 થઈ ગઈ છે.જેમાં 2461 દર્દી સ્ટેબલ જ્યારે 2 દર્દી વેન્ટિલેટર પર છે.રાજ્યમાં છેલ્લા અઢી વર્ષના કોરોનાકાળમાં કુલ 12,16,036 દર્દી ડિસ્ચાર્જ થયા છે જ્યારે 10,946 દર્દીનાં કોરોનાને કારણે મૃત્યુ થયા છે.ઉલ્લેખનીય છે કે,રાજ્યમાં ગત દિવસોમાં નોંધાયેલા કેસોના જિનોમ સિકવન્સિંગમાં ઓમિક્રોનના નવા વેરિયન્ટની પુષ્ટિથી તંત્ર જાગ્યું છે.અલબત્ત,આ વેરિયન્ટની ઘાતકતા અંગે હજુ સંશોધન ચાલી રહ્યું છે,પરંતુ છેલ્લા સપ્તાહમાં કોરોનાના કેસોએ જે રીતે વધી રહ્યા છે તે જોતાં આ વેરિયન્ટ ઝડપથી પ્રસરીને લોકોને સંક્રમિત કરી રહ્યા હોય તેવું લાગી રહ્યું છે.
