એલ્માઉ (જર્મની) : વડાપ્રધાન નરેન્દ્ર મોદીએ જર્મની ખાતેની જી-૭ શિખર મંત્રણાના મંચ પર મજબૂત રીતે ભારતનો પક્ષ રજૂ કર્યો છે.રશિયા-યુક્રેન યુદ્ધને કારણે ઇંધણ અથવા ઊર્જા સુરક્ષાનો મુદ્દો ઘણો પડકારજનક બન્યો છે ત્યારે મોદીએ સ્પષ્ટપણે કહ્યું છે કે,વૈશ્વિક ઓઇલ વેપારના મુદ્દે ભારત તેની ઊર્જા સુરક્ષા માટે જે ઉત્તમ હશે એ જ નિર્ણય લેશે.વડાપ્રધાન મોદીએ જી-૭ના સત્રોમાં રશિયા-યુક્રેનની સ્થિતિ અંગે ભારતનું વલણ સ્પષ્ટ કર્યું હતું.વિદેશ સચિવ વિનય મોહન ક્વાત્રાએ મીડિયાને જણાવ્યું હતું કે,“ભારત તાત્કાલિક અથવા શક્ય એટલી ઝડપે યુદ્ધનો અંત લાવવાની તરફેણમાં છે.
શિખર મંત્રણામાં રશિયા-યુક્રેનની સ્થિતિ ચર્ચાનો મહત્વનો વિષય હતી.વડાપ્રધાને તેમની પ્રથમ ટિપ્પણી હવામાન અને ઊર્જા અંગે કરી હતી.વડાપ્રધાને મજબૂત રીતે પોતાનો પક્ષ રજૂ કર્યો હતો અને જણાવ્યું હતું કે ભારત સમગ્ર ઘટનાક્રમમાં મહત્વનો દેશ છે.યુદ્ધના કારણે જે સ્થિતિ ઊભી થઈ છે તેનું નુકસાન ભારતે પણ વેઠવું પડ્યું છે.યુદ્ધને કારણે ઊર્જા સુરક્ષા મહત્વનો મુદ્દો બન્યો છે.વૈશ્વિક ઓઇલ વેપારના મુદ્દે ભારત તેની ઊર્જા સુરક્ષા માટે જે ઉત્તમ હશે એ જ નિર્ણય લેશે.”તેમણે કહ્યું હતું કે,“નબળા દેશોની ખાદ્ય સુરક્ષાની સમસ્યાને પહોંચી વળવામાં ભારત અગ્રતાક્રમે છે.”ક્વાત્રાએ જણાવ્યું હતું કે,“વડાપ્રધાને જી-૭ શિખર મંત્રણામાં રજૂ કરેલા ભારતના વલણને અન્ય દેશો સારી રીતે સમજ્યા છે.હું તો કહીશ કે અન્ય દેશોના વડાએ તેમના આ વલણની પ્રશંસા કરી છે.”
