અમદાવાદ : રાજયમાં આવેલા અલગ-અલગ ટાપુઓ(બેટ)ની વિકાસ કામગીરી માટે ગુજરાત ટુરીઝમ કોર્પોરેશન લિમિટેડ દ્વારા બહાર પાડવામાં આવેલા જાહેરનામાને ગુજરાત હાઇકોર્ટમાં પડકારવામાં આવ્યું છે, જેની સુનાવણીમાં હાઇકોર્ટે રાજય સરકાર,ગુજરાત ટુરીઝમ કોર્પોરેશન સહિતના સંબંધિત સત્તાવાળાઓને નોટિસ જારી કરી હતી અને કેસની વધુ સુનાવણી આગામી દિવસોમાં મુકરર કરી હતી.સવાઇ બેટ પર આવેલી સવાઇ પીરની દરગાહની સુરક્ષાને મામલે હાઇકોર્ટમાં રિટ અરજી દાખલ
અરજદારપક્ષ તરફથી કરાયેલી રિટ અરજીમાં એ મતલબની રજૂઆત કરવામાં આવી હતી કે,રાજય સરકારના ગુજરાત ટુરીઝમ કોર્પોરેશન લિમિટેડ દ્વારા ગુજરાત રાજયના વિવિધ ટાપુઓને વિકસાવવા અંગે જાહેરનામું જારી કરવામાં આવ્યું છે,જેના અનુસંધાનમાં શિયાળ બેટ,સવાઇ બેટ,બેટ દ્વારકા સહિતના ટાપુઓને વિકસાવવાનું આયોજન ચાલી રહ્યું છે પરંતુ સવાઇ બેટ કે જે શિયાળ બેટની બાજુમાં આવેલ છે ત્યાં પ્રાચીન સવાઇ પીરની દરગાહ આવેલી છે.સત્તાવાળાઓ દ્વારા વિકાસ કામગીરીની ભાગરૂપે સવાઇ પીરની દરગાહ પર શ્રદ્ધાળુઓની આવન-જાવન અને અન્ય પ્રતિબંધો ફરમાવી દીધા છે,જેને લઇ લોકોની ધાર્મિક લાગણી દુભાઇ રહી છે.આ સંજોગોમાં મુસ્લિમ બિરાદરો સહિત શ્રદ્ધાળુઓને દુઆ-બંદગી અને ત્યાં આવનજાવન માટે છૂટ અપાવી જોઇએ.
