નવી િદલ્હી : બ્રિટનના વડાપ્રધાન બોરિસ જ્હોન્સને રાજીનામાની જાહેરાત કરી ત્યારથી રિશી સુનાક આ હોદ્દા માટે પ્રબળ દાવેદાર મનાય છે.મંગળવારે તેમને વડાપ્રધાનની ઉમેદવારી માટે જરૂરી કન્ઝર્વેટિવ પાર્ટીના ૨૦ સભ્યોનો ટેકો પણ મળી ગયો છે.પક્ષના પ્રમુખ અને બ્રિટનના આગામી વડાપ્રધાન બનવાની દોડમાં સુનાક માટે આ મહત્વનું પગલું છે.પાંચ સપ્ટેમ્બરે બ્રિટનના નવા વડાપ્રધાનની જાહેરાત થવાની છે.વડાપ્રધાન પદ માટેના ઉમેદવારોની ઔપચારિક જાહેરાત થઈ છે ત્યારે ૪૨ વર્ષના બ્રિટિશ ભારતીય અને યોર્કશાયરના રિચમંડના સાંસદ સુનાક આ દોડમાં સરસાઇ ધરાવે છે.
વેપાર મંત્રી પેની મોરડોન્ટ,નવા ચાન્સેલર નધિમ ઝાહાવી અને ટોરી બેકબેન્ચર સહિતના અન્ય સભ્યો વડાપ્રધાનની ઉમેદવારી માટે જરૂરી ૨૦ સભ્યોનો ટેકો મેળવવા છેલ્લી ઘડીનું જોર લગાવી રહ્યા છે.અન્ય ઉમેદવારોમાં ભારતીય મૂળના એટર્ની જનરલ સુએલા બ્રેવરમેન,વિદેશ સચિવ લિઝ ટ્રુસ,કેમી બેડેનોચ,ભૂતપૂર્વ વિદેશ સચિવ જેરેમી હંટ,ટ્રાન્સપોર્ટ સેક્રેટરી ગ્રાન્ટ શેપ્સ,ભૂતપૂર્વ આરોગ્ય મંત્રી સાજિદ જાવિદ સહિતના લોકોનો સમાવેશ થાય છે.ભારતીય મૂળના ગૃહ મંત્રી પ્રીતિ પટેલ હજુ ઉમેદવારી નોંધવવાનું વિચારી રહ્યા છે.કન્ઝર્વેટિવ પાર્ટીમાં બ્રેક્ઝિટના ટીકાકારોના સમર્થનને પગલે પટેલ વડાપ્રધાન પદની દોડમાં પ્રવેશે તો નવાઇ નહીં.
