બારડોલીના હિંડોલીયા નજીકથી ઘઉં ભરેલા ટેમ્પોમાંથી 4.82 લાખનો વિદેશી દારૂ ઝડપાયો
બારડોલી
કોરોનાને કારણે લોકોના જીવ તાળવે ચોંટયા છે. લોકો ઘર બહાર નીકળવાની ટાળી રહ્યા છે. તેમ છતાં બુટલેગરો હજી વિદેશી દારૂનું હેરાફેરી કરી રહ્યા છે. સુરત રેન્જની ઓપરેશન ગ્રૂપની ટીમે બારડોલી તાલુકા હિંડોલીયા ગામ નજીકથી પસાર થતી અનાજ ભરેલ ટેમ્પોમાંથી 4.82 લાખ રૂપિયાના વિદેશી દારૂ સાથે 6 જણાની ધરપકડ કરી હતી. ટેમ્પો આગળ પાયલોટિંગ કરી રહેલ કાર સહિત કુલ 12 લાખથી વધુનો મુદ્દામાલ કબ્જે કર્યો હતો.
આ અંગે મળતી માહિતી સુરત રેન્જ ઓપરેશન ગ્રૂપની ટીમ રવિવારના રોજ બારડોલી પોલીસ સ્ટેશન વિસ્તારમાં પેટ્રોલીંગમાં હતી તે સમયે ખાનગી રાહે બાતમી મળી હતી કે હાલમાં લોકડાઉનની સ્થિતિમાં આવશ્યક ચીજવસ્તુઓની હેરાફેરી કરવાની સરકાર તરફથી છૂટ આપવામાં આવી હોય આ છૂટનો લાભ લઈ એક ટેમ્પો ઘઉંનું આડમાં ભારતીય બનાવટનો વિદેશી દારૂનો જથ્થો ભરી ધુલિયા – નવાપુરથી સુરત તરફ આવી રહ્યો છે. આ બાતમીના આધારે પોલીસની ટીમે બારડોલી તાલુકાનાં હિંડોલીયા ગામની સીમમાં નેશનલ હાઇવે નંબર 53 પર વોચ ગોઠવી હતી. આ દરમ્યાન બાતમી મુજબનો ટેમ્પો અને તેની આગળ પાયલોટિંગ કરતી કાર આવતા જ પોલીસે બંનેને રોકી ટેમ્પોમાં તલાશી લેતા અંદર ઘઉંના જથ્થાની આડમાં લઈ જવાતો વિદેશી દારૂનો જથ્થો મળી આવ્યો હતો. ટેમ્પોમાંથી કુલ 5568 બોટલ વિદેશી દારૂ કિમત રૂ.4 લાખ 82 હજાર 400 મળી આવ્યો હતો. પોલીસે દારૂ ઉપરાંત ઘઉંની 78 ગુણો કિમત રૂ 24 હજાર 400, મોબાઇલ ફોન પાંચ કિમત રૂ. 16 હજાર, રોકડ રૂપિયા 1400, ટેમ્પો કિમત રૂ. 4 લાખ, કાર કિમત રૂ. 3 લાખ મળી કુલ 12 લાખ 24 હજાર 200 રૂપિયાનો મુદ્દામાલ કબ્જે કર્યો હતો. પોલીસે શંકર અન્ના સિંદે અને ધર્મેશ દેવીદાસ સોનવણે સહિત 6 જણાની ધરપકડ કરી આગળની કાર્યવાહી હાથ ધરી છે. પૂછપરછમાં પકડાયલા આરોપીઓએ જણાવ્યુ હતું કે આ દારૂનો જથ્થો ધુલિયાથી અજય પવાર નામના ઇસમે ભરાવી આપ્યો હતો અને સુરતમાં છૂટક વેચાણ માટે લઈ જવામાં આવી રહ્યો હોવાનું જણાવ્યુ હતું.
