– તમામ વેપારીને લાભ થાય તેવી કાર્યવાહી થવી જોઇએ
– વેપારીને થતી કનડગત અટકાવવા દિલ્હી હાઇકોર્ટનો મત્ત્વપૂર્ણ ચુકાદો
– આધારકાર્ડ અને પાનકાર્ડ લિંક ન હોય તેવા કિસ્સામાં પણ નોટિસ વિના તપાસ પર રોક
આધારકાર્ડ અને પાનકાર્ડ લિંક હોય તેવા કિસ્સામાં સ્થળ તપાસ વિના પણ જીએસટીમાં નવા નંબરની ફાળવણી કરવામાં આવતી હોય છે.પરંતુ કેટલાક કિસ્સામાં આધારકાર્ડ અને પાનકાર્ડ લિંક નહીં હોય ત્યાં અધિકારીએ સ્થળ તપાસ કર્યા બાદ જ નંબર ફાળવણી કરવાની હોય છે.તેમાં પણ નોટીસ આપ્યા બાદ જ અધિકારીએ સ્થળ તપાસ કરવાની હોવા છતાં નોટિસ વિના પહોંચી જઇને વેપારીઓને પરેશાન કરવામાં આવતા હોવાની દિલ્હી હાઇકોર્ટમાં રિટ પિટિશન કરવામાં આવી હતી.આ કેસમાં નોટિસ આપ્યા વિના સ્થળ તપાસ કરવાનો અધિકારી જ નહીં હોવાનો મહત્વપૂર્ણ ચુકાદો આપતા વેપારીઓને રાહત થવાની છે.જોકે આ ચુકાદાનો અમલ તમામ રાજ્યમાં કરવામાં આવે તો જ વેપારીને લાભ થઇ શકે તેમ છે.વેપાર શરૂ કરવા માટે સૌથી પહેલા જીએસટી નંબર લેવો પડતો હોય છે.નાની નાની બાબતોના વાંધા કાઢીને તેની અરજી રદ કરી દેવામાં આવતી હોય છે.જ્યારે કેટલાક કિસ્સામાં તો અધિકારીઓ સ્થળ તપાસના નામે વેપારીઓને પરેશાન કરતા હોવાની પણ વ્યાપક ફરિયાદ ઊઠતી હોય છે.આવી જ સમસ્યાનો સામનો દિલ્હીના વેપારીઓ કરવો પડયો હોવાથી હાઇકોર્ટમાં રીટ પિટિશન કરવામાં આવી હતી.
તમામ વેપારીને લાભ થાય તેવી કાર્યવાહી થવી જોઇએ
જીએસટીનો કાયદો લાગુ કરવામાં આવ્યો ત્યારે વન નેશન વન ટેક્સની વાત કરવામાં આવી હતી.જેથી જીએસટીને લગતા જે પણ ચુકાદા આવે તેનો અમલ સમગ્ર દેશમાં કરવામાં આવવો જોઇએ.કારણ કે જે વેપારીએ કોર્ટમાં રિટ પિટિશન કરી હોય તેને જ ફાયદો થતો હોય છે.આવા કિસ્સામાં તમામ વેપારીને લાભ થાય તે પ્રમાણેના નિર્ણય કરવામાં આવે તો જ વેપારીઓને રાહત થાય તેમ છે.
