– જાહેર રસ્તા પર સ્ટંટ કરી પોતાની સાથે જ અન્ય વાહન ચાલકોનાં જીવને પણ જોખમમાં મુક્યા
– વિડીયો વાયરલ થતા પોલીસે યુવકને ઝડપી લઈ કાયદાનું ભાન કરાવવા તપાસ હાથ ધરી
રાજકોટ શહેરમાં યુવાનોમાં રિલ્સ બનાવવાની ઘેલછા હોય તેમ સમયાંતરે રિલ્સ બનાવવા માટે થયેલા જોખમ ભરેલા સ્ટંટનાં વિડીયો સામે આવી રહ્યા છે.ત્યારે આ પ્રકારની વધુ એક ઘટના સામે આવી છે.જેમાં યુવકે ચાલુ બાઈક પર સુતા-સુતા સ્ટંટ કરી પોતાની સાથે જ અન્ય વાહન ચાલકોનાં જીવને પણ જોખમમાં મુક્યો હતો.જોકે આ ઘટનાને કોઈ જાગૃત નાગરિકે પોતાના મોબાઈલ કેમેરામાં કેદ કરી લેતા તેનો વિડીયો વાયરલ થયો છે.જેના આધારે પોલીસ દ્વારા યુવકને ઝડપી લઈ કાયદાનું ભાન કરાવવા તપાસ હાથ ધરવામાં આવી છે.
જાણવા મળતી વિગત મુજબ શહેરનાં ગોંડલ રોડનો વિડીયો સામે આવ્યો છે.જેમાં સ્પષ્ટ જોઈ શકાય છે કે, એક યુવક ચાલુ બાઈક ઉપર સુતા-સુતા કરતબો કરી રહ્યો છે.તેના આ રીતે બાઈક ચલાવવાને કારણે માત્ર તેનો જ નહીં પણ ત્યાંથી પસાર થતા અન્ય વાહન ચાલકોનો પણ અકસ્માત થવાની શક્યતા જોવા મળી રહી છે.આમ છતાં યુવકને જાણે કોઈપણ પ્રકારનો ભય ન હોય તેવી રીતે સુતા-સુતા બાઈક ચલાવી રહ્યો હોવાનું પણ જોવા મળી રહ્યું છે.જો કે આ બાઈક ચલાવનાર યુવક કોણ અને કયાનો છે.તેમજ આ વિડીયો કેટલા સમય પહેલાનો છે અને તેમાં કેટલી સચ્ચાઈ છે તે તો પોલીસ તપાસનો વિષય છે.પરંતુ હાલ ઇન્સ્ટાગ્રામ રિલ્સ બનાવવા માટે યુવાનો કોઈ વિચારી પણ ન શકે તેવા સ્ટંટ કરતા હોય છે.ત્યારે આ સ્ટંટ પણ ફોલોઅર્સ વધારવા માટે કરવામાં આવ્યા હોય તેવું પ્રથમ દ્રષ્ટિએ જણાઈ રહ્યું છે.તેમજ આવા જોખમી સ્ટંટ કરનાર સામે પોલીસ દ્વારા તાત્કાલિક કડક કાર્યવાહી કરવાની માંગ પણ લોકોમાં ઉઠી રહી છે.
