ભાવનગરના ટીંબી ગામના વતની, આમ આદમી પાર્ટીના ગુજરાત પ્રદેશ અઘ્યક્ષ ગોપાલ ઈટાલિયાએ વડાપ્રધાન નરેન્દ્ર મોદી વિરુદ્ધ કરેલી ટિપ્પણીનો વીડિયો વાઇરલ થયા પછી દિલ્હીના મહિલા આયોગે તેને નોટિસ ફટકારી હાજર થઈને ખુલાસો કરવા ફરમાન કર્યું હતું.
ગુરુવારે દિલ્હીમાં ઈટાલિયાની અટકાયત કરવામાં આવી.ત્રણ કલાક પૂછતાછ કરાઈ.ઇટાલિયાએ અપમાનિત કરતાં નિવેદનો કર્યા.એટલું જ નહીં,પૂર્વ ગૃહમંત્રી પ્રદીપસિંહ જાડેજા પર ચંપલ ફેંકીને અપમાનિત કરતાં કૃત્યો પણ કર્યા.ગોપાલ ઇટાલિયાની દિલ્હીમાં અટકાયત કરવામાં આવી એ પહેલીવાર નથી
થયું.અગાઉ પણ તેમની ચાર વખત ધરપકડ થઈ છે અને બેવાર અટકાયત થઈ છે.ભગવાન કૃષ્ણને રાક્ષસ કહીને અપમાનિત કરવા બદલ તેની સામે કેસ દાખલ થઈ ચૂક્યો છે.ગોપાલ ઇટાલિયાની ક્યારે અને કયા કારણોસર ધરપકડ થઈ કે અટકાયત થઈ એ જાણીએ….
ઓગસ્ટ 2017 – પહેલી ઘટના
ગોપાલ ઇટાલિયા અમદાવાદ કલેક્ટર કચેરીમાં ક્લાર્ક હતા.પછી તેમની બદલી ધંધૂકા નાયબ કલેક્ટર ઓફિસમાં થઈ.ત્યાંથી તેમણે ભાજપ સામે નહોર ભરાવવાનું ચાલુ કર્યું.ઓગસ્ટ 2017માં ગાંધીનગર ખાતે વિધાનસભાની બહાર ગૃહમંત્રી પ્રદીપસિંહ જાડેજા જ્યારે મીડિયા સેન્ટર પાસે આવતા હતા ત્યારે ગોપાલ ઇટાલિયાએ તેમના પર ચંપલ ફેંક્યું હતું.આ ઘટના બાદ તરત જ ગોપાલ ઇટાલિયા પાસે ઊભેલા સુરક્ષાકર્મચારીઓ તેમને પકડી લીધા હતા,જોકે પ્રદીપસિંહને ચંપલ લાગ્યું નહોતું.ઇટાલિયા સામે આઇપીસી કલમ 332, 337, 352, 353, 355, 447 તથા કલમ 120(બી હેઠળ સેક્ટર 7 પોલીસ સ્ટેશનમાં ફરિયાદ નોંધાઈ હતી.આ ઘટનાથી એ ચર્ચામાં તો હતા જ,પણ જ્યારે તેમણે ગુજરાતના પૂર્વ નાયબ મુખ્યમંત્રી નીતિન પટેલને ફોન કરીને રાજ્યમાં પ્રૉહિબિશનના કાયદાના નબળા અમલીકરણનો આરોપ લગાવી કોલ કર્યો હતો અને આ કોલનો ઓડિયો વાઇરલ થયો હતો. ત્યારથી ગોપાલ ઇટાલિયાનું નામ ચર્ચામાં વધારે આવી ગયું.આ ઘટના પછી થોડા દિવસોમાં જ આમ આદમી પાર્ટીએ તેને ગુજરાત પ્રદેશ અધ્યક્ષ ઘોષિત કર્યા હતા.
જાન્યુઆરી 2019 – બીજી ઘટના
ગોપાલ ઈટાલિયાની આર્મ્સ એક્ટના ગુનામાં 2019ના જાન્યુઆરીમાં સુરત ક્રાઇમ બ્રાન્ચની મદદથી આણંદની વલ્લભવિદ્યાનગર પોલીસે ધરપકડ કરી હતી.પાટીદાર આંદોલન સમયે તેના મેસેજવાળો વીડિયો વાઇરલ થયો હતો,જેમાં પોતે ભૂંડ સામે ભડાકા કરે છે એવું જણાવીને ભાજપ પર ટિપ્પણી કરી હતી.એવા વિવાદાસ્પદ વીડિયોને કારણે વિદ્યાનગર પોલીસે આર્મ્સ એક્ટના ગુનામાં ધરપકડ કરી હતી.
ઓગસ્ટ 2021 – ત્રીજી ઘટના
ગોપાલ ઇટાલિયાએ જનસંવેદના મુલાકાત કેમ્પેન ચલાવ્યું હતું.એ સમયે અલગ-અલગ ગામોમાં જન સંવેદના મુલાકાતમાં બીજા તબક્કાની શરૂઆત ઉમિયા માતાજીનાં દર્શન કરીને મુલાકાતની શરૂઆત કરવાની હતી.એ પહેલાં જ ઊંઝા નજીક ટોલનાકા પાસે મહેસાણા પોલીસે ઇટાલિયાની ધરપકડ કરી હતી.મહેસાણા પોલીસે એ સમયે એવું જણાવ્યું હતું કે ઇટાલિયાની અગાઉના એક કેસમાં ધરપકડ કરવામાં આવી છે.
ડિસેમ્બર 2021 – ચોથી ઘટના
ભાજપના પ્રદેશ કાર્યાલય કમલમ પર તોડફોડ કરવાના આરોપસર આમ આદમી પાર્ટીના નેતાઓની ધરપકડ કરવામાં આવી હતી,જેમાં ગોપાસ ઇટાલિયા ઉપરાંત ઈસુદાન ગઢવી સહિતના નેતાઓ સામેલ હતા.આ નેતાઓની દસ દિવસ બાદ જેલમુક્તિ થઈ હતી.
મે 2022 – પાંચમી ઘટના
સુરતમાં આપના કોર્પોરેટરોને મારવાના બનાવ બાદ રાજકારણ ગરમાયું હતું અને આપ દ્વારા ભાજપ કાર્યાલય ખાતે વિરોધપ્રદર્શન કરવામાં આવ્યું.અમદાવાદ અને સુરતમાં વિરોધપ્રદર્શન થયાં.સુરતમાં ભાજપ કાર્યાલય પર આપ કાર્યકર્તાની બબાલ મામલે પોલીસે ગોપાલ ઇટાલિયાની ધરપકડ કરી હતી.તેના સામે રાયોટિંગનો ગુનો દાખલ થયો હતો.
સપ્ટેમ્બર 2022 – છઠ્ઠી ઘટના
ગોપાલ ઇયાલિયા વિરુદ્ધ ઉમરાળા પોલીસમાં એફઆઈઆર દાખલ થઈ હતી.તેમણે એક પ્રવચનમાં ભગવાન કૃષ્ણને રાક્ષસ ગણાવ્યા હતા.તેમણે કહેલું કે કૃષ્ણ અને ભાજપ જેવા રાક્ષસોના પંજામાંથી ગુજરાતને છોડાવવા કેજરીવાલ જેવા અર્જુન આવ્યા છે.
ઓક્ટોબર 2022 – સાતમી ઘટના
ગોપાલ ઈટાલિયાએ એક વીડિયોમાં વડાપ્રધાન નરેન્દ્ર મોદી વિરુદ્ધ વાંધાજનક ટિપ્પણી કરી હતી અને આ વીડિયો વાઇરલ થતાં વિવાદ સર્જાયો હતો.આ મામલે વડાપ્રધાન મોદી સામે વાંધાજનક શબ્દપ્રયોગથી સમગ્ર દેશની મહિલાઓનું અપમાન થયાનું કહી NCW (મહિલા આયોગ)એ ઈટાલિયા સામે નોટિસ કાઢી હતી.ઈટાલિયા આ નોટિસનો જવાબ આપવા NCWની દિલ્હી સ્થિત ઓફિસ પહોંચ્યા હતા,પરંતુ એ પહેલાં જ તેમની ધરપકડ કરવામાં આવી હતી.
અત્રે નોંધનીય છે કે મહિના અગાઉ જાહેર ભાષણમાં ગુજરાતમાં ઘુસતા ડ્રગ્સ મુદ્દે રાજ્યના ગૃહમંત્રી હર્ષ સંઘવીને ડ્રગ્સ સંઘવી કહ્યા હતા જેને લઇ પણ માનહાનિનો દાવો અને ગુનો નોંધાયો છે.ગૃહમંત્રીને ડ્રગ્સ સંઘવી કહેતા વિપક્ષે પણ આ શબ્દપ્રયોગ ભાજપ પર હુમલો કરવા અવારનવાર ઉપયોગ કર્યો છે.સોશ્યિલ મીડિયામાં પણ ડ્રગસ સંઘવીને લઇ તરહ-તરહની વાંધાજનક કોમેન્ટ્સનો મારો પણ થયો હતો.જે મુદ્દે પણ ગોપાલ ઈટાલીયા વિરુદ્ધ અલગ અલગ કલમો અનુસાર ગુનો નોંધાયો હતો.
