– રાજકીય પક્ષોના ઉમેદવારોએ ઉમેદવારી પત્રક ભરવા પહેલા મંદિરે જઈને દર્શન કર્યા
સુરત,તા.11 નવેમ્બર 2022,શુક્રવાર : વિધાનસભા 2022 ની ચૂંટણીમાં સુરતમાં જુદા જુદા રાજકીય પક્ષોએ પોતાના ઉમેદવાર જાહેર કર્યા છે.રાજકીય પક્ષ દ્વારા જાહેર કરવામાં આવેલા ઉમેદવારોએ ફોર્મ ભરવા જતા પહેલા ભગવાનની સામે માથું ટેકવ્યું હતું.ઉમેદવારો ભગવાનના આશીર્વાદ મેળવ્યા બાદ ફોર્મ ભરવા ગયા હતા.પાવર ગેમ ગણાતી રાજકારણમાં પણ ભગવાનના આશીર્વાદ વધુ જરૂરી છે તે ફરી એકવાર સાબિત થયું છે.ગોડફાધરના આશીર્વાદથી રાજકારણમાં વિધાનસભાના ઉમેદવાર માટે ટિકિટ તો મળી ગઈ છે.રસાકસી વાળા વાતાવરણમાં પોતાને ટિકિટ મળે તે પહેલા જ અનેક દાવેદારો ભગવાનના મંદિરે પહોંચી ગયા હતા.રાજકીય પક્ષોએ એક પછી એક ઉમેદવારોને જાહેર કરતા ઉમેદવારો અને ટેકરોમાં ઉત્સાહનો માહોલ જોવા મળ્યો હતો.ભાજપે ગઈકાલે ઉમેરવા જાહેર કર્યા તેમાંથી મોટાભાગના ઉમેદવારો ગઈકાલે જ મંદિરે જઈને ભગવાનને દર્શન કરી આવ્યા હતા.આ ઉપરાંત આજે ઉમેદવારી પત્રક ભરવા જતા પહેલા ઉમેદવારો અને તેમના ટેકેદારો મંદિરમાં જઈને ભગવાનના દર્શન કરી આવ્યા હતા.સવારે ભગવાનના દર્શન કર્યા બાદ ઉમેદવારોએ વિજય મુરહત માં ઉમેદવારી પત્રક ભર્યું હતું.
