ચૂંટણી એક રીતે ઉપકારક હોય છે.ઉપરછલ્લી રીતે એકજૂટ,એકસંપ લાગતાં રાજકીય પક્ષોના આંતરિક પડળો ઉખળીને સામે આવી જાય છે.પહેલી નજરે પક્ષની શિસ્તમાં માનનારાં કર્મઠ ગણાતાં નેતાઓ વચ્ચેની ખેંચતાણ ચૂંટણી ટાણે બહુ બોલકી રીતે બહાર આવી જતી હોય છે અને તેમાં નિમિત્ત બનતી હોય છે ટીકિટોની ફાળવણી.પોતાના મહત્તમ સમર્થકોને ટીકિટ મળે એ નેતાના હાથમાં રાજ્ય સરકારની ચાવી રહેતી હોય છે.પરિણામે ટીકિટોની ફાળવણી મુદ્દે સૌથી વધુ ખેંચતાણ થતી રહે છે.નેવુના દાયકામાં ભાજપના પ્રદેશપ્રમુખ તરીકે શંકરસિંહ વાઘેલા અને અન્ય પ્રદેશ નેતાઓમાં કેશુભાઈ પટેલ,કાશીરામ રાણા અને નરેન્દ્ર મોદી મુખ્ય હતા.એ વખતે શંકરસિંહે પોતાનાં મહત્તમ સમર્થકોને ટીકિટ અપાવવાની પેરવી કરી તેની સામે કેશુભાઈ-મોદીએ પોતાની રીતે મોરચો માંડ્યો અને પછી અત્યંત વરવો જૂથવાદ સર્જાયો જે છેવટે ભાજપની પહેલી સ્પષ્ટ બહુમતી ધરાવતી સરકારના પતનમાં નિમિત્ત બન્યો.એ પછી સરકારના પતન કે પક્ષના વિભાજનની ઘડી તો કદી નથી આવી,પરંતુ ખેંચતાણની કડવાશ તો દરેક ચૂંટણીમાં જોવા મળી છે.નરેન્દ્ર મોદી ગુજરાતના મુખ્યમંત્રી હતા ત્યારે બીજા કોઈ માટે મુખ્યમંત્રીપદનું સપનું જોવું ય દોહ્યલું હતું.તેમ છતાં આનંદીબહેન પટેલ અને અમિતભાઈ શાહ એવાં બે જૂથ ભાજપમાં સ્પષ્ટપણે હતા. 2017ની ગત ચૂંટણી સુધી આ બંને જૂથો વચ્ચે ટીકિટોની ફાળવણીમાં તીવ્ર ચડસાચડસી જોવા મળતી હતી.હવે રાજ્યપાલ બન્યાં પછી સક્રિય રાજનીતિથી દૂર રહેતાં આનંદીબહેન મોટાભાગે ઉત્તર ગુજરાત અને અમદાવાદ શહેર પૂરતી સક્રિયતા દાખવતાં હોવાની છાપ ઉપસે છે પરંતુ આ વખતે ચૂંટણીપ્રક્રિયાના આરંભથી જ અમિત શાહે મોટાભાગની પ્રક્રિયાનો દોરીસંચાર હાથમાં લઈ લીધો એ સાથે પ્રદેશપ્રમુખ સી.આર.પાટીલ હાંસિયામાં ધકેલાઈ જતાં હોવાનું ચિત્ર દોરાવા લાગ્યું હતું.મુખ્યમંત્રી ભુપેન્દ્ર પટેલ પર આસાનીથી હાવી થઈ જતાં પાટીલ પોતે જ સુપર સીએમ હોય તેમ સીધા જ મંત્રીઓ,અધિકારીઓને આદેશ કરતાં હોવાની છાપ ઉપસતી હતી ત્યારે છેલ્લી ઘડીએ ગુજરાતમાં ધામા નાંખીને અમિતભાઈ હવે આદત મુજબ પોતાનું જ ધાર્યું કરશે એવી ધારણા મૂકાતી હતી,પરંતુ ખરેખર તેવું થયું હોય એમ ટીકિટોની ફાળવણી પછી ખાસ જણાતું નથી.
સૌથી રસપ્રદ બાબત એ છે કે અમિતભાઈની મનમાનીની સામે પડેલી ભાજપની આંતરિક ધરીમાં પાટીલ ઉપરાંત હવે કેન્દ્રિય આરોગ્યમંત્રી મનસુખ માંડવિયાનું નામ પણ ઉમેરાયું છે.અમદાવાદ શહેર અને જિલ્લાની વીશ બેઠકો એ અમિતભાઈનું પ્રાઈમ ફોકસ મનાય છે.અહીં તેઓ પોતાની છાવણીના ઉમેદવારોને ધારણા મુજબની બેઠકો અપાવી શક્યા નથી.તેની સામે સૌરાષ્ટ્રમાં અમિતભાઈ કરતાં મનસુખ માંડવિયાની ભલામણ તેમનાં સમર્થકોને વિશેષ ફળી હોવાનું ચિત્ર જણાય છે.ખોડલધામ પ્રેરિત રમેશ ટિલાળાની ઉમેદવારી હોય કે ભાવનગર પૂર્વની બેઠક પર વિભાવરી દવેની પુનઃ દાવેદારી હોય,દરેકમાં અમિતભાઈની સરખામણીએ માંડવિયાનો હાથ ઉપર રહ્યો જણાય છે.વિભાવરી દવેની ટીકિટ કપાવાનું સ્પષ્ટ થયું તો એ બેઠક પર વિભાવરીબહેનના સમર્થકને ટીકિટ આપવી પડી છે અને સીધા અમિતભાઈ સુધી પહોંચેલાં દાવેદારોના હાથ હેઠાં પડ્યાં છે.
એ જ રીતે સુરત શહેરની બેઠકો પર પોતાના સમર્થકોને રિપિટ કરીને પાટીલે પણ હાથ ઉપર રાખ્યો છે.ઉત્તર ગુજરાતમાં અમિતભાઈ મહેસાણા,વિજાપુર,રાધનપુર,પાલનપુર,દિયોદર,ખેડબ્રહ્મા બેઠક પર પોતાના ઉમેદવાર માટે હઠાગ્રહી હતા પરંતુ એ દરેક બેઠક યા તો વડાપ્રધાને વીટો પાવર વાપર્યો છે અથવા તો પાટીલની ભલામણ ચાલી ગઈ છે.ગુજરાત ભાજપ પાર્લામેન્ટરી બોર્ડની બેઠક પછી પાટીલે માધ્યમો સમક્ષ એવું કહ્યું હતું કે છેવટનો નિર્ણય કેન્દ્રીય પાર્લામેન્ટરી બોર્ડ અને ખાસ તો વડાપ્રધાન તેમજ અમિતભાઈ કરશે.હું તો દરેક કાર્યકરોને ઓળખતો પણ નથી હોતો. તેમનું આ વિધાન વ્યંગમાં બોલાયું હોવાનું ત્યારે જ ચર્ચાતું હતું.કારણ કે પ્રદેશપ્રમુખના હોદ્દે બેઠેલી વ્યક્તિ અઢી વર્ષના કાર્યકાળ પછી અને વન ડે વન ડિસ્ટ્રિક્ટ જેવા એકધારા થકવી દેનારા પ્રવાસો પછી આમ કહે એ યા તો તેમની અતિશય નિખાલસતા હોય અથવા તો કોઈકનાં મોંએથી બોલાયેલું વાક્ય પાછું આપવાની ચેષ્ટા હોય.આ કિસ્સામાં એ બીજા નંબરન વિકલ્પ હોય તેવી શક્યતા વધુ જણાય છે.
આનંદીબહેન ભલે નિવૃત્તિ તરફ હોય પરંતુ ગુજરાતની રાજનીતિમાં આ ચૂંટણીથી હવે અમિતભાઈ સામે પાટીલ ઉપરાંત મનસુખ માંડવિયાનું પરિબળ પણ ઉભરશે એ નિશ્ચિત જણાય છે.
