ભારત જોડો યાત્રા દરમિયાન કોંગ્રેસ સાંસદ રાહુલ ગાંધીએ વિનાયક દામોદર સાવરકર પર શાબ્દિક પ્રહાર કર્યા બાદ ભારત જોડે યાત્રામાં જોડાયેલા ઉદ્ધવ ઠાકરેના દીકરા અને રાજ્યના પૂર્વ મંત્રી આદિત્ય ઠાકરને રાહુલ ગાંધીને ગળે મળ્યા હતા.
રાજકીય ગલીયારામાં રાહુલ ગાંધીના આ ડબલ એટીટ્યુડને કોઈ લાંબા વિચાર પૂર્વક રમાયેલી રાજનીતિ માનવામાં આવે છે.એક તરફ ઉદ્ધવ ઠાકરે એ સાવરકર પર રાહુલ ગાંધીએ કરેલા નિવેદનનો વિરોધ કર્યો છે અને બીજી તરફ રાહુલ ગાંધી તેના જ દીકરાને ગળે મળી રહ્યા છે આ રાજનીતિ ઉપર અનેક અટકળ લગાવવામાં આવી રહી છે.જોકે હજી સુધી રાહુલ ગાંધીએ સત્તાવાર રીતે આ બંને બાબતો વિશે કાંઈ જ કહ્યું નથી.
એક તરફ રાહુલ ગાંધી ભારત જોડો યાત્રા દરમિયાન તેમની અને પાર્ટીની છબી બદલવામાં સક્ષમ રહ્યા છે ત્યારે રાહુલ ગાંધીનું આવું ડબલ વલણ કોઈને સમજ માં આવી રહ્યું નથી.જોકે કેટલાક રાજકીય વિશ્લેષકો રાહુલ ગાંધીના સાવરકર પરના નિવેદન ની અસર ગુજરાત વિધાનસભા ચૂંટણી ઉપર પડવાની સંભાવના વ્યક્ત કરી રહ્યા છે.
ઉદ્ધવ ઠાકરેએ સાથીપક્ષ કોંગ્રેસ સામે ઘૂંટણીએ પડવું ન જોઇએ : ભાજપ
– સાવરકરના માફીપત્રની સરખામણી ભાજપ નેતાએ શિવાજી મહારાજ અને અફઝલખાનની મુલાકાત સાથે કરી
છત્રપતિ શિવાજી મહારાજે અફઝલ ખાનને ભેટીને પછી આંતરડા બહાર ખેંચી કાઢયા હતા.આ પ્રસંગની સાથે સ્વાતંત્ર્યવીર સાવરકરે અંગ્રેજોને લખેલા પત્રના પ્રસંગની મુંબઇ ભાજપના અધ્યક્ષ આશિષ શેલારે સરખામણી કરી હતી.તેમણે કહ્યું હતું કે આપણી પાસે મહાપુરુષોના એવાં અનેક કિસ્સા છે જેમાં બે ડગલા પાછા હટીને પછી દુશ્મન પર પૂરી તાકાતથી હુમલો કર્યો હોય.કોંગ્રેસના સાંસદ રાહુલ ગાંધીએ મહારાષ્ટ્રમાં પગ મૂકતાની સાથે જ વીર સાવરકર વિશે અપમાનજનક વિધાન કરતા ચારે તરફ રાહુલ વિરુદ્ધ રોષ ભભૂકી ઉઠયો છે.શેલારે કહ્યું હતું કે ઉદ્ધવ ઠાકરેએ એમવીએના સાથીપક્ષ કોંગ્રેસને ઘૂંટણીયે પડવું ન જોઇએ.સ્વર્ગસ્થ ઇન્દિરા ગાંધીએ પણ વીર સાવરકરની તારીફ કરી હતી એ પત્ર શેલારે પત્રકાર પરિષદમાં વાંચી સંભળાવ્યો હતો.સંઘનો આઝાદીની ચળવળમાં સહભાગ નહોતો એવી ટીકાના સંદર્ભમાં ભાજપ નેતાએ કહ્યું હતું કે ડો. કેશવ બળીરાવ હેગડેવાર આઝાદીની લડતમાં સક્રિય હતા.એ સમયે મહાત્મા ગાંધીજીએ પણ રાષ્ટ્રીય સ્વયંસેવક સંઘના વર્ગોની મુલાકાત લીધી હતી.
રાહુલગાંધી દ્વારા સાવરકરનું અપમાન : એમવીએમાં ભંગાણની સંજય રાઉતે દર્શાવી શક્યતા
– સ્વાતંત્ર્યવીર સાવરકરને ‘ભારત- રત્ન’ આપવાની માગણીનો પુનરોચ્ચાર
મહારાષ્ટ્રમાં પગ મૂકતાની સાથે જ કોંગ્રેસી સાંસદ રાહુલ ગાંધીએ સ્વાતંત્ર્યવીર સાવરકર વિશે અત્યંત વાંધાજનક વિધાન કરતા ચારે તરફથી વિરોધનો વંટોળ જાગ્યો છે એટલું જ નહીં મહાવિકાસ આઘાડી ગઠબંધનના ભાવિ સામે પણ સવાલ ઉભો થયો છે.
આ અંગે શિવસેના (ઠાકરે)ના પ્રવક્તા અને સાંસદ સંજય રાઉતે આજે પત્રકાર પરિષદમાં જણાવ્યું હતું કે રાહુલ ગાંધીએ વીર સાવરકર વિશે જે પણ કહ્યું છે તેનાથી મહાવિકાસ આઘાડીમાં ચોક્કસપણે કડવાશ ઉભી થઇ છે.અમારા જોડાણમાં તિરાડ પડશે જે સારી નિશાની નથી.રાઉતે વધુમાં કહ્યું કે રાહુલ ગાંધીની ભારત જોડો યાત્રાને મહારાષ્ટ્રમાં સારો પ્રતિસાદ મળ્યો છે.તેથી આ સમયે તેમને સાવરકરનો મુદ્દો ઉઠાવવાની અને વિવાદ ઉભો કરવાની જરૃર ન હતી.આથી રાહુલ ગાંધીના નિવેદન સાથે શિવસેના સંપૂર્ણપણે અસંમત છે.
ભુતકાળમાં રાહુલ ગાંધીએ વીર સાવરકરે અંગ્રેજો પાસે દયા માંગી હતી એવું અનેક વેળા તેઓ બોલી ચૂક્યા છે.હવે આ વાતનું પુનરાવર્તન કરવાની જરૃર ન હતી.સાવરકર તો શિવસેના (ઉધ્ધવ બાળાસાહેબ ઠાકરે) માટે હીરો છે.એમ કહીને રાઉતે સ્પષ્ટપણે જણાવ્યું હતું કે અમારા પક્ષના વડા ઉદ્ધવ ઠાકરે ગુરુવારે કહ્યું કે અમે સાવરકરને પ્રેમ કરીએ છીએ.તેમની પ્રશંસા કરીએ છીએ અને તેમના પર અપાર શ્રદ્ધા ધરાવીએ છીએ.તેથી રાહુલ ગાંધીના વિચાર સાથે સહમત નથી.રાઉતે ફરી એકવાર સાવરકરને ભારત રત્ન આપવાનો મુદ્દો ઉઠાવ્યો હતો.ભાજપ વીર સાવરકરને ભારત રત્ન આપવામાં શા માટે સંકોચ કરે છે? અમે વર્ષોથી સાવરકરને ભારત રત્ન આપવાની માગણી કરી રહ્યા છીએ,પરંતુ ભાજપ સરકાર આઠ વર્ષથી સત્તામાં હોવા છતાં કોઇ નિર્ણય લેવાનો ઇન્કાર કરે છે.એમ રાઉતે જણાવ્યું હતું.દરમિયાન રાજ ઠાકરેની આગેવાની હેઠળની મહારાષ્ટ્ર નવ નિર્માણ સેનાએ (મનસે) રાહુલ ગાંધીની ભારત જોડો યાત્રા દરમિયાન વિરોધ પ્રદર્શન કર્યું હતું.તેમને યાદ અપાવું તે તેમના દાદી અને ભૂતપૂર્વ વડા પ્રધાન ઇન્દિરા ગાંધીએ સાવરકરની પ્રશંસા કરી હતી.
સાવરકરના અવસાન પર ઇન્દિરા ગાંધીએ પોતે કહ્યું હતું કે તે રાષ્ટ્ર માટે એક મોટી ખોટ છે.જો તેમની દાદીએ સાવરકરની પ્રસંશા કરી હતી તો પછી તેઓ ક્રાંતિકારી નેતાનું શા માટે અપમાન કરી રહ્યા છે.
