સુરત જિલ્લાના પૂર્વપટ્ટીમાં વન ક્ષેત્રમાં આવેલી છેવાડાની ૧૫૬-માંગરોલ બેઠકમાં બે તાલુકા અને એક નગરનો સમાવેશ થાય છે.સંપૂર્ણ આદિવાસી વિસ્તારના મત ક્ષેત્રમાં વસાવા સમાજ અને ચૌધરી સમાજનું પ્રભુત્વ રહેલું છે.રાજપૂત સમાજ અને મુસ્લિમ સમાજના પણ અનેક ગામો આવેલા હોય ભાજપ માટે જમા પાસું છે.છેલ્લી પાંચ ચૂંટણીમાંથી ચાર વખત ભાજપના ઉમેદવાર ગણપત વસાવાનો વિજય થયો હતો.અને ભાજપના મતની ટકાવારી તેમજ વિજયની સરસાઈના મતોમાં પણ દર ચૂંટણીમાં વધારો જોતા આ બેઠક હવે ભાજપનો ગઢ મનાય છે.આ બેઠક પર ભાજપે પાંચમી વાર ગણપત વસાવાને રીપીટ કર્યા છે.તો કોંગ્રેસે નવા નિશાળિયા અનિલ ચૌધરી પર પસંદગી ઉતારી છે.આમ આદમી પાર્ટીએ સ્નેહલ વસાવાને ટિકીટ આપી છે.આ બેઠક ઉપર ભાજપનો વિજય નિશ્ચિત છે.આપના ઉમેદવાર પણ ગણપત વસાવાના તાલુકા ઉમરપાડામાંથી હોય લીડમાં વધારો કે ઘટાડો થઈ શકે પરંતુ પરિણામમાં કોઈ ફરક પડવાની શક્યતા નથી.
સતત લોકસંપર્કમાં રહેતા નેતા મતદારોની પ્રથમ પસંદ
ભાજપના ઉમેદવાર ગણપત વસાવા ૨૦૦૨થી સતત ચાર વખત વિજેતા બન્યા હતા અને સતત લોક સંપર્કમાં રહે છે.ગામડાનો પ્રવાસ અને સામાજિક પ્રસંગોમાં હાજરી હોય છે.દરેક ગામમાં વિકાસ કામોની ખાતમુહૂર્ત અને લોકાર્પણ વિધિ કરવાનું ક્યારેય ચૂકતા નથી. સ્થાનિક મતદારોમાં અને ગામના આગેવાનોમાં સારી પકડ ધરાવે છે.મતદારોની પ્રથમ પસંદગી હોય છે.અગાઉ બી.ટી.પીએ પણ ગણપત વસાવા વિરૃધ્ધ આદિવાસી કાર્ડ ખેલ્યું હતુ,પરંતુ સફળતા મળી ન હતી.
પશુપાલક મતદારોને દૂધના ભાવમાં વધારાની આશા
વનક્ષેત્રના ગામોમાં પીવાના પાણી અને સિંચાઈના પાણીની સમસ્યા રહે છે.આ વિસ્તારમાં પશુપાલકોની સંખ્યા પણ વધુ હોય દૂધના ભાવમાં વધારો થવો જોઈએ તેવી માંગો થાય છે.અગાઉ સુમુલ ડેરી ખાતે માંગરોલ અને ઉમરપાડા તાલુકાના પશુપાલકોએ દૂધના ભાવમાં વધારો કરવા માટે દેખાવો કરી ઉગ્ર રજૂઆત કરી હતી.
શિક્ષણ-પ્રાથમિક સુવિધાનો અભાવ અને રોજગારી માટે દૂર જવુ પડે છે
આ વિધાનસભા મતવિસ્તારમાં વનક્ષેત્રમાં સૌથી મોટી સમસ્યા શિક્ષણ અને પ્રાથમિક સુવિધાની છે.કામો થયા છે પરંતુ વનક્ષેત્રના ગામડાઓ હજુ પણ વિકાસથી વંચિત છે.ગામડાના આંતરિક રસ્તાઓ તેમજ વીજળી પૂરતા દબાણથી મળતી નથી.વીજળી અંગે નવા સબ સ્ટેશન ઉભા કરવામાં આવ્યાં છે પરંતુ હજુ પણ પૂરેપૂરો લાભ મળી શક્યો નથી.ઉમરપાડા અને માંગરોલ તાલુકાના શિક્ષિત યુવાનો માટે સ્થાનિક વિસ્તારમાં રોજગારીની તકો ઓછી હોવાથી કીમ,પીપોદરા વિસ્તારની જીઆઇડીસી તેમજ રત્નકલાકાર તરીકે સુરત શહેર અને કાપડ ઉદ્યોગમાં નોકરી માટે લાંબા થવું પડે છે.જે આર્થિક રીતે પણ પરવડતું ન હોય અનેક શિક્ષિત યુવક-યુવતીઓ ગામ છોડી નોકરીના સ્થળે વસવાટ કરવાની ફરજ પડે છે.
આદિવાસી ઉપરાંત રાજપૂત-મુસ્લિમ મતોનો પ્રભાવ પણ ભાજપ તરફી
ભાજપનો ગઢ રહેલી આ બેઠકમાં છેલ્લી પાંચ ચૂંટણીમાં સતત ચાર વખત ભાજપના ઉમેદવારનો વિજય થયો છે.ગુજરાતમાં ભાજપના શાસનમાં આ બેઠક ઉપર ભાજપની મતની ટકાવારી અને વિજય મતોની સરસાઈમાં સતત વધારો થઈ રહ્યો છે.કોંગ્રેસે દરેક ચૂંટણીમાં નવા-નવા સમીકરણો સાથે ઉમેદવારો પસંદ કર્યા પરંતુ કોંગ્રેસનું એકેય રાજકીય અને જ્ઞાતિ આધારિત સમીકરણ સફળ થયું નથી.આ બેઠક ઉપર આદિવાસી ઉપરાંત મુસ્લિમ અને રાજપૂત મતોનો પ્રભાવ છે.તે પણ ભાજપને સીધો ફાયદો કરાવે છે.ગામડામાં યુવા મતદારોને આકર્ષવા માટે વિવિધ રમતના સાધનો અને યુવક મંડળ તેમજ મહિલા મંડળને જરૃરિયાત મુજબના સામાનની ચૂંટણી સમયે માંગણી થતી હોય છે.પ્રથમ વખત આપ પણ મેદાનમાં હોય મતોનું વિભાજન ભાજપ માટે કેવા સમીકરણો ઉભા કરશે તે મત ગણતરી બાદ નક્કી થશે.
બણભા ડુંગરનો પ્રવાસનધામ તરીકે વિકાસ થયો છે
આ બેઠકના ધારાસભ્ય ગણપત વસાવા અગાઉ વનમંત્રી,પ્રવાસન મંત્રી રહી ચૂક્યા છે.પોતાના મત વિસ્તારમાં આવતા ઉમરપાડાના દેવગઢ ખાતે વાંકલ પાસે બણભા ડુંગરનો પ્રવાસન ધામ તરીકે વિકાસ કર્યો છે.અનેક પ્રવાસીઓએ મુલાકાત લીધી છે.જિલ્લાના વનક્ષેત્રમાં સૌથી ગાઢ વન ઉમરપાડા તાલુકાના વિસ્તારોમાં આવેલું છે.
