– સામલોદ,બબુંસર,દભાલી અને કવિઠા ગામના ખેડૂતો નહેરમાં ગાબડું પડતા પાયમાલ
– કવિઠા – કવિઠા વચ્ચે નહેરમાં ભંગાણથી 300 થી વધુ એકરમાં પાણી ફરી વળતા તૈયાર પાક બરબાદ
– તુવેર,દિવેલા,મઠિયા,કપાસ,શેરડી સહિતનો પાક ખેતરો પાણીમાં ગરકાવ થતા નાશ
– નહેર ખાતું દર વર્ષે સર્જાતી સમસ્યાનું સમારકામ કરી કાયમી ઉકેલ લાવે
– પાક નુકશાનીનું સર્વે કરી બજાર ભાવ મુજબ વળતર આપવા માંગ
ભરૂચ તાલુકાના સામલોદ,બબુંસર,દભાલી અને કવિઠા ગામના ખેડૂતો નહેરમાં સર્જાયેલા ભંગાણથી ખેતરો પાણીમાં ગરકાવ થતા પાયમાલ બન્યા છે.ભરૂચ તાલુકાના ઉત્તર પટ્ટી ઉપર આવેલા ગામોમાંથી નર્મદા નિગમની માઇનોર નહેર પસાર થાય છે. જોકે નહેર વિભાગ દ્વારા વર્ષોથી નહેરનું સમારકામ કરવામાં નહિ આવતા દર વર્ષે ભંગાણની સમસ્યા સર્જાય છે.નવા વર્ષના પેહલા દિવસે જ નર્મદાની માઇનોર કેનાલમાં દભાલી અને કવિઠા વચ્ચે ગાબડું પડતા ચાર ગામના ખેડૂતોના ખેતરોમાં રહેલા તૈયાર પાક ઉપર પાણી ફરી વળ્યાં છે.તાજેતરમાં જ નહેર ખાતા દ્વારા કેનાલની સાફ સફાઈ કરવામાં આવી હતી.જોકે નહેર વિભાગ સમારકામ હાથ નહિ ધરતું હોવાથી દર વર્ષે ખેડૂતોને આર્થિક ફટકો પડી રહ્યો છે.
પેહલી જાન્યુઆરીએ જ નહેરમાં ગાબડાને લઈ પાણી કવિઠા,સામલોદ,દભાલી અને બબુંસર ગામના નહેરની આસપાસના ખેતરોમાં ફરી વળ્યાં હતા.ખેતરો પાણીમાં ગરકાવ થતા તૈયાર પાક મઠિયા,તુવેર,કપાસ,શેરડી સહિત બરબાદ થઈ ગયા હોવાનો રોષ ખેડૂતોએ ઠાલવ્યો છે.અંદાઝે 4 ગામના 300 એકરથી વધુમાં નહેરના પાણી ખેતરોને ડુબાડી દેતા ખેડૂતો આર્થિક રીતે પાયમાલ બની ગયા છે.
નહેર નિગમ કેનાલ કામનું સમારકામ કરે અને તંત્ર સર્વે કરાવી ખેડૂતોને પાકનું બજાર ભાવ મુજબ વળતર ચૂકવે તેવી માંગણી કરવામાં આવી છે.સાથે જ ચાર ગામના ખેડૂતોએ કલેકટરમાં નુક્શાની અંગે રજુઆત કરવા તૈયારીઓ હાથ ધરી છે.
