– ડાંગરી વિસ્તારમાં સઘન સુરક્ષા વ્યવસ્થા
નવી દિલ્હી, તા. 13 જાન્યુઆરી 2023, શુક્રવાર : કેન્દ્રીય ગૃહમંત્રી અમિત શાહની આજે રાજૌરી જિલ્લાની મુલાકાતને ધ્યાનમાં રાખી સઘન સુરક્ષા વ્યવસ્થા ગોઠવવામાં આવી છે.આજે શાહનો બે આતંકવાદી હુમલામાં પીડિત પરિવારો સાથે મુલાકાત કરવાન કાર્યક્રમ છે.જિલ્લાના ડાંગરી વિસ્તારમાં સઘન સુરક્ષા વ્યવસ્થા કરવામાં આવી છે.ત્યાં રસ્તાઓનું સમારકામ કરી સીસીટીવી કેમેરા લગાવવામાં આવ્યા છે.અધિકારીઓએ જણાવ્યું હતું કે, કેન્દ્રીય ગૃહમંત્રી જમ્મુ અને કાશ્મીરમાં સુરક્ષા સ્થિતિની સમીક્ષા કરવા માટે એક ઉચ્ચ સ્તરીય બેઠકની અધ્યક્ષતા પણ કરશે.જેમાં વિવિધ સુરક્ષા દળો અને ગુપ્તચર એજન્સીઓના વરિષ્ઠ અધિકારીઓ ભાગ લેશે.
આતંકવાદી હુમલાના પીડિત પરિવાર સાથે શાહ મુલાકાત કરશે
ડાંગરી ગામમાં બે આતંકવાદી હુમલામાં અલ્પસંખ્યક સમુદાયના બે બાળકો સહિત સાત લોકો માર્યા ગયા અને 14 અન્ય ઘાયલ થયા હતા.શાહ સવારે રાજૌરી પહોંચવાના છે અને ત્યાંથી સીધા ડાંગરી ગામ જવાના છે.તેઓ આતંકવાદી હુમલામાં જીવ ગુમાવનારા લોકોના પરિવારજનોને સાથે મુલાકાત કરશે.આ દરમિયાન કેન્દ્રીય ગૃહ સચિવ એ.કે. ભલ્લા,સીઆરપીએફના ડીજી સુજોય લાલ થૌસન કે જેઓ ડીજી બીએસએફનો વધારાનો હવાલો પણ સંભાળી રહ્યા છે.આઈબીના ડિરેક્ટર તપન ડેકા, એનઆઈએ ચીફ દિનકર ગુપ્તા અને આરએડબલ્યુ ચીફ સામંત ગોયલ શાહની સાથે રહેશે.
ડાંગરી ગામને પ્રતિબંધિત વિસ્તારમાં ફેરવી દેવામાં આવ્યું
અમિત શાહની મુલાકાતને ધ્યાનમાં રાખીને રાજૌરી જિલ્લામાં વિસ્તૃત સુરક્ષા વ્યવસ્થા કરવામાં આવી છે અને સમગ્ર ડાંગરી ગામને પ્રતિબંધિત વિસ્તારમાં ફેરવી દેવામાં આવ્યું છે.શુક્રવારે સવારથી બપોર સુધી લોકોની સામાન્ય અવરજવર પર પ્રતિબંધ રહેશે.પોલીસ અને સેન્ટ્રલ આર્મ્ડ પોલીસ ફોર્સના જવાનોને તૈનાત કરવામાં આવ્યા છે જ્યારે ભારતીય સેનાના જવાનો ઉપરના વિસ્તારોમાં તૈનાત રહેશે.ડાંગરી ગામમાં ચાંપતી નજર રાખવા માટે સીસીટીવી કેમેરા પણ લગાવવામાં આવ્યા છે. વરિષ્ઠ પોલીસ અને CAPF અધિકારીઓએ પણ ગુરુવારે સાંજે વિસ્તારની મુલાકાત લીધી હતી અને સુરક્ષા વ્યવસ્થાની સમીક્ષા કરી હતી.
