– તલાટી અને સરપંચના આવા કૌભાંડ સામે દાખલો બેસાડવો જરૂરી, સરકારી વકીલ
– જે તે સમયે પોલીસ દ્વારા તપાસ બરાબર ન કરાઇ હોય યોગ્ય કાર્યવાહી કરવા પણ કોર્ટે હુકમમાં ટાક્યું
ભરૂચના ચીફ જ્યુડિશિયલ મેજિસ્ટ્રેટે સરકારી આવાસમાં ઉચાપતના 7 વર્ષ જુના કેસમાં કાસવા ગામના તત્કાલીન મહિલા સરપંચ,તલાટી સહિત 4 આરોપીઓને કસૂરવાર ઠેરવી 7 વર્ષની સજા અને દંડ ફટકાર્યો છે.ભરૂચ તાલુકાના કાસવા ગામે વર્ષ 2016 માં સરકારી આવાસો બનાવવામાં સરપંચ,તલાટી સહિત 5 મળતીયાઓએ ગોબાચારી કરી કૌભાંડ આચર્યું હોવાનું બહાર આવ્યું હતું.જે અંગે ભરૂચ તાલુકા પોલીસ મથકે ફરિયાદ નોંધાઇ હતી.હાલ ભરૂચ શ્રી રંગ સોસાયટીમાં રહેતા મૂળ કાસવા ગામના સરપંચ ઇલાબેન વિજયસિંહ રણા,હાલ વડોદરા રહેતા તલાટી રેખાબેન સુરપાલ કિશોરી,ભરૂચ હજીખાનામાં રહેતા દિલાવર વલી મન્સૂરી અને એઝાંઝ મન્સૂરી સામે કેસ દાખલ કરાયો હતો.
ભરૂચના ચીફ જ્યુડિશિયલ મેજિસ્ટ્રેટ પી.ડી. જેઠવાની કોર્ટમાં આ કેસ ચાલી ગયો હતો.સરકાર તરફે એપીપી ધાસુરા ઉપસ્થિત રહ્યા હતા.વિવિધ પુરાવા અને દલીલો રજૂ કરી સરપંચ અને તલાટીના આ કૌભાંડ સામે સમાજમાં દાખલો બેસાડવા રજુઆત કરી હતી.કોર્ટે સરકારી વકીલની દલીલો અને પુરાવા ધ્યાને લઇ સરકારી આવાસમાં ઉચાપત કરનાર મહિલા સરપંચ,તલાટી અને પિતા-પુત્રને તકસરીવાન ઠેરવ્યા હતા.જેઓને આઇપીસીની વિવિધ કલમો હેઠળ મહત્તમ 7 વર્ષની સજા ફટકારી હતી.સાથે જ દંડનો હુકમ કર્યો હતો.જે તે સમયે તપાસ બરાબર નહિ કરનાર પોલીસ અંગે એસ.પી.ને યોગ્ય કાર્યવાહી કરવા પણ હુકમમાં ટાક્યું હતું.
