હજીરા પોર્ટ નજીક ખુલ્લી અવાવરુ જગ્યામાં મૃતદેહને દફનાવી રહ્યો હતો પરિવાર
સ્થાનિકોને શંકા જતા સમગ્ર મામલે પોલીસને જાણ કરવામાં આવી
સુરત,તા.18 જાન્યુઆરી 2023,બુધવાર : સુરતના હજીરા વિસ્તારમાં એક પરિવાર પોતાની 14 વર્ષની બાળકીનો મૃતદેહ દફનાવવા જતા પોલીસે પકડી પાડ્યો હોવાનું સામે આવ્યું છે.આ પરિવાર ટ્રેક્ટરમાં મૃતદેહ લઈ જઈ હજીરા પોર્ટ નજીક ખુલ્લી અવાવરું જગ્યામાં દફનવિધિ માટે ગયો હતો.જો કે સ્થાનિક લોકોને શંકા જતા તેઓએ આ અંગે પોલીસને જાણ કરી હતી.જે બાદ પોલીસે ઘટના સ્થળે પહોંચી મૃતદેહનો કબજો લઈ તેને પોસ્ટમોર્ટમ માટે મોકલવાની તજવીજ હાથ ધરી હતી.જ્યાં બીજી તરફ પોલીસની પ્રાથમિક તપાસમાં આ કિશોરીએ આપઘાત કર્યો હોવાની વાત સામે આવી છે.
સુરતના હજીરા ખાતે રહેતા અને મજૂરી કામ કરતા ચંદન કહેવતની પુત્રીનું મોત મોત નીપજ્યું હતું.ત્યારે આ પરિવાર કોઈને પણ જાણ કર્યા વગર બાળકીના મૃતદેને દફનાવાની તૈયારી કરી હતી.પરિજનો મૃતદેહને ટ્રેક્ટરમાં લઈ જઈ હજીરા પોર્ટ નજીક ખુલ્લી અવાવરું જગ્યામાં નાયકો કંપનીના ગેટ નજીક લાવી રહ્યા હતા.જ્યાં કેટલાક સ્થાનિક લોકોને આ અંગે જાણ થતા અને શંકાઓ ઉભી થતા તેઓએ પોલીસને જાણ કરી હતી.
ઘટના અંગેની માહિતી મળતા હજીરા પોલીસ સ્ટેશનનો કાફલો સ્થળ પર પહોંચ્યો હતો.ઘટનાની ગંભીરતાને જોતા તાત્કાલિક અસરથી મૃતદેહનો કબજો લઈ પોસ્ટમોર્ટમ માટે મોકલી આપવામાં આવ્યું હતું.આ ઉપરાંત પોલીસે ટ્રેક્ટર પણ કબજે કર્યું છે.જો કે,પોલીસ દ્વારા કરાયેલી પ્રાથમિક પૂછપરછમાં પરિવારે જણાવ્યું હતું કે, તેમની પુત્રીએ ગળે ફાંસો ખાઈને આપઘાત કરી લીધો હતો.જેથી તેઓ તેમના રીત રિવાજ પ્રમાણે દફનવિધિ કરી રહ્યા હતા.જોકે આ મામલે પોલીસને શંકા હોવાથી હજી પણ પરિવારની પૂછપરછ કરી રહ્યા છે.અને પોસ્ટમોર્ટમ રિપોર્ટની રાહ જોવાઈ રહી છે.
