નવી દિલ્હી, તા. 21 માર્ચ 2023, મંગળવાર : ખાલિસ્તાની સમર્થક અમૃતપાલ સિંહની ધરપકડ હજુ થઈ શકી નથી,પરંતુ તપાસ દરમિયાન એ વાત પણ સામે આવી છે કે તેના વિદેશમાં બેઠેલા આતંકવાદીઓ સાથે સંબંધો છે.તપાસમાં પરમજીત સિંહ પમ્મા સાથે અમૃતપાલનું કનેક્શન પણ જાણવા મળ્યું છે.પમ્મા NIA દ્વારા મોસ્ટ વોન્ટેડની યાદીમાં સામેલ છે અને તે પ્રતિબંધિત સંગઠન બબ્બર ખાલસા ઈન્ટરનેશનલ સાથે સંકળાયેલો છે.તે ભારતના પ્રતિબંધિત સંગઠનોની યાદીમાં સામેલ છે.પરમજીત સિંહ પમ્માનું નામ ખાલિસ્તાન ટાઈગર ફોર્સ સાથે જોડાયેલું છે.આ સિવાય તે અનેક પ્રકારની આતંકી ગતિવિધિઓમાં સામેલ રહ્યો છે.
ભારત છોડીને પાકિસ્તાન પહોંચ્યો
પંજાબના સાહિબજાદા અજીત સિંહ નગરનો રહેવાસી પરમજીત સિંહ પમ્મા 90ના દાયકામાં નાના મોટા ગુનાઓ કરતો હતો. 1994માં તે ભારત છોડીને પાકિસ્તાન પહોંચી ગયો હતો.પાકિસ્તાન પહોંચ્યા બાદ તેણે બબ્બર ખાલસા ઈન્ટરનેશનલ માટે ફંડ એકઠું કરવાનું શરૂ કર્યું.તે ખાલિસ્તાની સંગઠન છે અને તે ભારતમાં પ્રતિબંધિત સંગઠનોની યાદીમાં સામેલ છે.અહીં જ પમ્મા બબ્બર ખાલસા ચીફ વાધવા સિંહની નજીક આવ્યો અને સંગઠન સાથે જોડાયેલી પ્રવૃત્તિઓમાં સામેલ થયો.થોડા સમય પછી તે ખાલિસ્તાન ટાઈગર ફોર્સમાં જોડાયો અને તેના ચીફ જગતાર સિંહ તારાની નજીક બન્યો.વિશ્વના ઘણા દેશોમાં આ સંગઠને આતંકવાદી ગતિવિધિઓ કરવાનું શરૂ કર્યું અને પમ્માએ તેમાં મહત્વની ભૂમિકા ભજવવાનું શરૂ કર્યું.પમ્માને થાઈલેન્ડમાં આતંકવાદી ગતિવિધિઓની જવાબદારી સોંપવામાં આવી હતી.આ પછી પમ્માની જવાબદારી બની ગઈ કે તે દક્ષિણ-પૂર્વ એશિયામાં પંજાબથી પહોંચેલા આતંકવાદીઓને મદદ સાથે ઈન્ફ્રાસ્ટ્રક્ચર પ્રદાન કરે.
પટિયાલા-અંબાલા બ્લાસ્ટ કનેક્શન
મીડિયા રિપોર્ટ્સ અનુસાર પમ્માનું નામ પંજાબના પટિયાલા અને અંબાલામાં 2015માં થયેલા બોમ્બ બ્લાસ્ટમાં સામે આવ્યું હતું.આ સિવાય 2009માં રાષ્ટ્રીય શીખ સંગતના વડા રૂલદા સિંહની હત્યામાં પણ પમ્માની ભૂમિકા હોવાનું જણાવવામાં આવ્યું હતું. ઈન્ટરપોલે પમ્મા વિરુદ્ધ રેડ કોર્નર નોટિસ પણ જારી કરી હતી અને 18 ડિસેમ્બર 2015ના રોજ પોર્ટુગીઝ પોલીસે તેની ધરપકડ કરી હતી.જો કે ભારત સરકારે તેના પ્રત્યાર્પણની માંગ કરી હતી,પરંતુ પોર્ટુગલ સરકારે આ માંગણી સ્વીકારી ન હતી. પરિણામે થોડા સમય પછી પમ્મા છૂટી ગયો અને ફરીથી તે જ પ્રવૃત્તિઓ કરવા લાગ્યો.
પમ્માનું અમૃતપાલ સાથે શું કનેક્શન છે,પોલીસ તેને સમજવાનો પ્રયાસ કરી રહી છે.કોણ કોની કેટલી હદ સુધી મદદ કરી રહ્યું હતું તે સમજવા માટે પોલીસ તપાસ કરી રહી છે.એવું કહેવામાં આવી રહ્યું છે કે પમ્મા અમૃતપાલનો હેન્ડલર છે અને તેણે અમૃતપાલ સિંહની પ્રવૃત્તિઓમાં મહત્વની ભૂમિકા ભજવી છે.અમૃતપાલ દુબઈમાં ટ્રક ડ્રાઈવર હતો.અહીં તે તેના કાકાના બિઝનેસ સાથે જોડાયેલો હતો અને અહીંથી જ તે પાકિસ્તાની ગુપ્તચર એજન્સી સાથે જોડાયો હતો.તેણે ધર્મના નામે શીખોનું મનોરંજન કરવાનું શરૂ કર્યું.
