– ઝઘડિયાના વાસણા ગામના 81 વર્ષના વૃદ્ધનું કોરોનાથી મોત
– રસીના બન્ને ડોઝ લેનાર વૃદ્ધ 15 માર્ચે હોસ્પિટલમાં સારવાર અર્થે દાખલ થયા હતા
ભરૂચ,તા. 21 માર્ચ 2023, મંગળવાર : રાજ્યના પ્રથમ કોવિડ સ્મશાન ભરૂચમાં 236 દિવસ બાદ ફરી ચિતા સળગી છે.ઝઘડિયા તાલુકાના વાસણા ગામના 81 વર્ષીય વૃદ્ધનું કોરોનાના કારણે મોત થયું છે.ભરૂચ જિલ્લામાં મહામારી કોવિડ 19 ની પાંચમી વેવ ફરી સક્રિય થઈ હોય તેવી સ્થિતિ સર્જાઈ છે.સોમવારે ભરૂચ જિલ્લામાં કોવિડ 19ના 3 કેસ પોઝિટિવ નોંધાયા હતા.રાજ્યનું પહેલું ભરૂચનું નર્મદા નદી કિનારે આવેલું સ્મશાન છેલ્લે 28 જુલાઈ 2022થી શાંત હતું.
આજે મંગળવારે 236 દિવસ બાદ ભરૂચના કોવિડ સ્મશાનમાં એક વૃદ્ધનું કોરોનાથી મૃત્યુ થતા અગ્નિદાહ અપાયો હતો.ઝઘડિયા તાલુકાના વાસણા ગામના 81 વર્ષીય રમણભાઈ રામચંદ્ર જયસ્વાલને કોવિડ 19ના લક્ષણો સાથે 15 માર્ચે ભરૂચની જીવન જ્યોત હોસ્પિટલમાં દાખલ કરાયા હતા.જેઓનો કોવિડ 19નો રિપોર્ટ પોઝિટિવ આવ્યા બાદ 20 માર્ચે બીજો રિપોર્ટ પણ પોઝિટિવ આવ્યો હતો.જેથી આજે મંગળવારે 7 દિવસની સારવાર બાદ વૃદ્ધે અંતિમ શ્વાસ લીધા હતા.કોવિડ પ્રોટોકોલ મુજબ કોવિડ સ્મશાનમાં વૃદ્ધની અંતિમવિધિ કરવામાં આવી હતી.
