– કોંગ્રેસ અને વિપક્ષ ભ્રષ્ટાચાર,મોંઘવારી સામે અવાજ ઉઠાવતા કાનૂની રીતે દબાવવાની કાર્યવાહી સામે રોષ
મોદી અટક ઉપર ટિપ્પણીના માનહાનિ કેસમાં રાહુલ ગાંધીને 2 વર્ષની સજાના ગુજરાતભરમાં કોંગ્રેસીઓમાં ઉકળતા ચરૂ વચ્ચે ઘેરા પ્રત્યાઘાતો પડ્યા છે.જેને લઈ ભરૂચ કોંગ્રેસ દ્વારા પણ આજે શુક્રવારે રાજ્ય અને કેન્દ્રની ભાજપ સરકાર સામે વિરોધ પ્રદર્શન,દેખાવો,સૂત્રોચ્ચાર અને મોદીનું પૂતળું ફૂંકવામાં આવ્યું હતું.ભરૂચ જિલ્લા કોંગ્રેસ કાર્યાલય સ્ટેશન રોડ ખાતેથી કોંગ્રેસે તાનાશાહી ભાજપ સરકાર સામે પ્રચંડ આક્રોશ વ્યક્ત કર્યો હતો.જિલ્લા પ્રમુખ પરિમલસિંહ રણા,શહેર પ્રમુખ હરીશ પરમાર, સંદીપ મંગરોલા,સમસાદ અલી સૈયદ,કોંગી કોર્પોરેટર સહિતના આગેવાનો તેમજ કાર્યકરોએ ભાજપ સરકાર અને તેની કોંગ્રેસ સહિત સાથી પક્ષોને દબાવવાની નીતિનો ભારે વિરોધ નોંધાવ્યો હતો.
કોંગ્રેસ કાર્યાલયથી બેનરો,પ્લે કાર્ડ અને સુત્રોચ્ચારો સાથે મુખ્ય માર્ગ પર રેલી કાઢવામાં આવવા સાથે મોદીનું પૂતળું બાળવાનો પ્રયાસ કરાતા પોલીસ અને કોંગી કાર્યકરો વચ્ચે ખેંચતાણના દ્રશ્યો સર્જાયા હતા.કોંગી કાર્યકરોએ આખરે મોદીના પૂતળાનું દહન કરી પોતાનો વિરોધ પ્રદર્શિત કર્યો હતો.કોંગ્રેસે આક્ષેપ કર્યો હતો કે, ભ્રષ્ટાચાર,બેરોજગારી,મોંઘવારી વિરુદ્ધ કોંગ્રેસ કે સાથી પક્ષો અવાજ ઉઠાવતા ભાજપ સરકાર તેને કાનૂની રીતે દબાવી દઈ જેલમાં મોકલી રહી છે.અંગ્રેજોની યાદ કરાવતી તાનશાહી ભાજપ સરકાર સામે કોંગ્રેસ આવનાર દિવસોમાં રસ્તા ઉપર ઉતરી પ્રજા હિતે આંદોલન છેડશે તેવી ચીમકી ઉચ્ચરાઈ છે.મોદીનું પૂતળું બાળવાની ઘટનામાં પોલીસે 25 થી વધુ કોંગી આગેવાનો તેમજ કાર્યકરોની અટકાયત કરી હતી.
