– આરોપી નાસતો ફરતો હોય અને આવા જ ગંભીર ગુના નોંધાયેલા હોય તો આ અરજી સ્વીકારી ન શકાય – હાઈકોર્ટ
– ગોધાવી-ઘુમામાં જમીન પચાવી પાડવાનો કેસ – હાઈકોર્ટે પોપ્યુલર ગૃપના બિલ્ડર દથરથ પટેલની કન્સેન્ટ ક્વોશિંગ પિટીશન ફગાવી
– રાજ્ય સરકારે અરજદારની અરજીનો કર્યો આકરો વિરોધ
અમદાવાદ,તા.04 મે 2023,ગુરૂવાર : ગોધાવી અને ઘુમાની કરોડો રુપિયાની જમીન પચાવી પાડવાના કેસમાં પોપ્યુલર ગૃપના આરોપી બિલ્ડર દશરથ ભોળીદાસ પટેલે કરેલી કન્સેન્ટ ક્વોશિંગ પિટીશન (બંને પક્ષે સમાધાન થતાં ફરિયાદ રદબાતલ ઠરાવવા અંગેની અરજી) ગુજરાત હાઇકોર્ટે ફગાવી દીધી છે.
હાઈકોર્ટનુ અવલોકન છે કે, સુપ્રીમકોર્ટે તેના એક ચુકાદામાં કન્સેન્ટ ક્વોશિંગ પિટીશન નિર્ણિત કરવા મુદ્દે કેટલીક બાબતોને ધ્યાનમાં રાખવાના નિર્દેશ આપેલા છે.જેમાં એક તો એ છે કે, આરોપી જો નાસતો ફરતો હોય તો અને બીજું કે આવા જ પ્રકારના આરોપી વિરૃદ્ધ ગંભીર ગુનાઓ નોંધાયેલા હોય તો તેવા સંજોગોમાં બંને પક્ષે(ફરિયાદી અને આરોપીપક્ષ) સમાધાન થઇ ગયુ હોય તો પણ કન્સેન્ટ ક્વોશિંગ પિટીશન નામંજૂર થઇ શકે.આ બાબતને ધ્યાનમાં રાખીને અરજદારની અરજીને ફગાવવામાં આવે છે.
આ કેસની વિગત જોઈએ તો, સોલા વિસ્તારમાં રહેતા ફરિયાદી રામકૃષ્ણભાઇના દાદા શત્રુધ્નદાસજીનું વર્ષ ૧૯૯૧માં નિધન થયેલુ.તેમના નામે ગોધાવી અને ઘુમા ગામમાં કરોડોની કિંમતની જમીન હતી.ગોધાવી ખાતેની જમીનમાં અગાઉ કામ હોવાથી ફરિયાદીએ રેવન્યુ રેકર્ડ કઢાવતાં તેમાં ગોધાવીના સરયુદાસનું નામ બોલતુ હતુ.જેમાં તેમણે વધુ તપાસ કરતાં ખબર પડી કે, પોપ્યુલર ગૃપના બિલ્ડર રમણ પટેલ અને દશરથ પટેલે બંને ભાઇઓએ ભેગા મળીને શત્રુધ્નદાસજીની ગોધાવીની કરોડોની જમીનમાં ડમી વારસાઇના ડોકયુમેન્ટ બનાવીને જમીનમાં વારસદાર તરીકે સરયુદાસનું નામ ઉમેરાવેલુ.આ પછી સરયુદાસ પાસેથી આરોપી બિલ્ડર રમણ પટેલ અને દશરથ પટેલે જમીન વેચાતી લીધી હોવાના બનાવટી દસ્તાવેજો બનાવીને સાણંદ સબ રજિસ્ટ્રાર કચેરીમાં સાચા ડોકયુમેન્ટ્સ તરીકે રજૂ કરી જમીન પચાવી પાડેલી.
આ કેસમાં બોપલ પોલીસમથકમાં નોંધાયેલી ફરિયાદને રદ કરવા માટે દથરથ પટેલે હાઇકોર્ટમાં અરજી કરેલી.જેમાં તેની રજૂઆત હતી કે, આ કેસમાં અરજદાર અને ફરિયાદ પક્ષે સમાધાન થઇ ગયુ છે.જેથી આ ફરિયાદમાં આગળની કાર્યવાહી કરવાનો કોઈ કોઇ અર્થ નથી.બીજી તરફ, ફરિયાદી પક્ષની પણ રજૂઆત હતી કે, આરોપી વિરૃધ્ધની ફરિયાદ રદ થાય તો તેમને કોઈ વાંધો નથી.જો કે રાજય સરકારે દશરથ પટેલની આ અરજીનો વિરોધ કરતા રજૂઆત કરેલી કે, આરોપી સામે ખૂબ જ ગંભીર પ્રકારનો ગુનો છે.તપાસમાં બહાર આવ્યું છે કે, આરોપીએ સરયુદાસ નામની જે વ્યકિતનો ઉલ્લેખ કર્યો છે તેવી કોઇ વ્યકિત જ નથી.આરોપીઓએ બોગસ દસ્તાવેજો અને બનાવટી કાગળોના આધારે કરોડો રૂપિયાની જમીન પચાવી પાડી છે.આરોપીઓ સામે અનેક નિર્દોષ ખેડૂતોની જમીન અને સંપત્તિ પચાવી પાડવાના અન્ય અન્ય ગંભીર ગુનાઓ પણ નોંધાયેલા છે.જેથી સુપ્રીમ કોર્ટના ચુકાદાઓને ધ્યાને લઈને અરજદારની અરજીઓને ફગાવી દો.
