સુપ્રીમ કોર્ટના આ નિર્ણયથી ઉદ્ધવ જૂથને મોટો ફટકો પડ્યો છે,ત્યારે શિંદે જૂથને મોટી રાહત મળી છે.મહારાષ્ટ્રના સત્તાસંઘર્ષ મામલે સુપ્રીમ કોર્ટે આજે પોતાનો ચુકાદો આપ્યો છે. રાજ્યના તમામ નેતાઓ આ મામલે નિર્ણયની આતુરતાથી રાહ જોઈ રહ્યા હતા.સુપ્રીમ કોર્ટના આ નિર્ણયથી ઠાકરે જૂથને મોટો ફટકો પડ્યો છે,ત્યારે શિંદે જૂથને મોટી રાહત મળી છે.હવે આ બધાની વચ્ચે અનેક રાજનેતાઓના નિવેદનો પણ સામે આવવા લાગ્યા છે.જાણો કોણે શું કહ્યું…
સુપ્રીમ કોર્ટના નિર્ણય બાદ ઉદ્ધવ બાળાસાહેબ ઠાકરેની શિવસેનાના નેતા સંજય રાઉતે કહ્યું કે, સરકાર આવશે અને જશે પરંતુ અમે સુપ્રીમ કોર્ટના નિર્ણયનું સ્વાગત કરીએ છીએ.તેમણે કહ્યું કહ્યું કે, મહારાષ્ટ્રના લોકોને જોવા દો, સુપ્રીમ કોર્ટે પણ રાજ્યપાલની ભૂમિકાને શંકાસ્પદ ગણાવી છે.શિંદે જૂથનો વ્હીપ ગેરકાયદેસર છે અને અમારા વ્હીપ દ્વારા આપવામાં આવેલ આદેશ કાયદેસર છે.તે વ્હીપ મુજબ દરેકની (શિંદે જૂથ) સભ્યપદ રદ કરવામાં આવશે.
સંજય રાઉત પાગલ થઈ ગયા છે
તે જ સમયે, સંજય રાઉતના નિવેદનનો જવાબ આપતા શિંદે જૂથના શિવસેના સાંસદ રાહુલ શેવાળેએ કહ્યું કે, સંજય રાઉત પાગલ થઈ ગયા છે અને પાગલ વ્યક્તિ પર ટિપ્પણી કરવી યોગ્ય નથી.તેમને ગાંડાની જેમ બોલવા દો અમે સુપ્રીમ કોર્ટના નિર્ણયનું સ્વાગત કરીએ છીએ.વ્હીપની નિમણૂક કરવાનો નિર્ણય રાજકીય પક્ષ લઈ શકે છે અને ચૂંટણી પંચે એકનાથ શિંદેની પાર્ટીને તમામ અધિકારો આપ્યા છે, તેથી હવે સ્પીકર નિર્ણય લેશે.
મારી લડાઈ લોકો માટે છે
મહારાષ્ટ્રના ભૂતપૂર્વ મુખ્યપ્રધાન ઉદ્ધવ ઠાકરેએ કહ્યું છે કે, “આ દેશમાં લોકશાહીનું રક્ષણ કરવું એ અમારું કામ છે.સુપ્રીમ કોર્ટે કહ્યું કે જો મેં રાજીનામું ન આપ્યું હોત,તો હું ફરીથી મુખ્યપ્રધાન બની શક્યો હોત.હું મારા માટે નથી લડી રહ્યો,મારી લડાઈ લોકો માટે છે.રાજકારણમાં મતભેદો છે,પરંતુ અમારો એક અભિપ્રાય છે કે આ દેશને બચાવવાનો છે.
ભાજપ લોકશાહી ખતમ કરશે
રાજસ્થાનના સીએમ અશોક ગેહલોતે મહારાષ્ટ્ર પર સુપ્રીમ કોર્ટના નિર્ણયનો ઉલ્લેખ કરતા કહ્યું કે, મહારાષ્ટ્રમાં 50 ધારાસભ્યોનું હોર્સ ટ્રેડિંગ થયું હતું, આ તેના પર તમાચો છે.આપણે જનતાની વચ્ચે જઈને કહેવું પડશે કે ભાજપ દેશમાંથી લોકશાહીનો નાશ કરશે.
