– શાળામાં ચાલતા પ્રવેશોત્સવમાં મંડપ બનાવ્યા હોય તો વાવાઝોડાને ધ્યાનમાં રાખી ઉતારી લેવા આદેશ
સુરત,તા.12 જુન 2023,સોમવાર : દરિયામાં આવી રહેલા બિપર જોય વાવાઝોડાની અસર સુરતમાં જોવા મળી રહી છે સુરતમાં ભારે પવન ફૂંકાવાની શરૂઆત થતાંની સાથે જ શહેરના બસ સ્ટેન્ડ પરના બેનરો ધરાશાયી થતાં વાહનચાલકોને જોખમ ઉભુ કરી રહ્યાં છે.તો બીજી તરફ સુરતમાં ચાલી રહેલા પ્રવેશોત્સવમાં સ્કૂલમાં જો કોઈ મંડપ બનાવવામાં આવ્યા હોય તો તેને ઉતારી લેવા માટે તમામ સ્કૂલમાં સુચના આપી દેવામાં આવી છે.
સુરત નગર પ્રાથમિક શિક્ષણ સમિતિની સ્કુલમાં પ્રવેશોત્સવનો ધમધમાટ જોવા મળી રહ્યો છે.આજથી ત્રણ દિવસ માટે સુરતની શાળામાં પ્રવેશોત્સવ મોટા પાયે રાખવામાં આવશે.હાલમાં ચાલી રહેલી ગરમીના કારણે કેટલીક સ્કુલ દ્વારા વિદ્યાર્થીઓને આવકારવા માટે મંડપ બનાવવામાં આવ્યા છે.જોકે, હાલ વાવાઝોડાના કારણે પવન ફૂંકાઈ રહ્યો હોય સુરત પાલિકાની તમામ સ્કુલને પણ તાકીદ કરવામાં આવી છે.તમામ સ્કૂલમાં એક જાહેર સુચના આપવામા આવી છે તેમાં જણાવવામાં આવ્યું છે કે, બિપરજોય વાવાઝોડાને ધ્યાને રાખી હાલ ચાલતા શાળા પ્રવેશોત્સવ કાર્યક્રમ માટે જો કોઈ શાળામાં મંડપ બનાવેલ હોય તો તાત્કાલિક ઉતારી લેવા સૂચના આપવામાં આવે છે તેમજ કોઈ શાળામાં હોર્ડીંગ્સ કે છૂટ્ટા બોર્ડ લગાવેલ હોય તો તે પણ ઉતારી લેવા.
સ્કૂલમાં તો પાલિકાએ સૂચના આપી દીધી છે પરંતુ સુરતના અનેક બસ સ્ટેન્ડ પર મુકેલા હોર્ડિગ્સ લોકો માટે અને તેમાં પણ ખાસ કરીને વાહન ચાલકો માટે જોખમી બની રહ્યાં છે.આજે સવારથી 40 કિલોમીટરની ઝડપે પવન ફૂંકાતા શહેરમાં બસ સ્ટેન્ડ પર લગાવવામાં આવેલ જાહેરાતનું બોર્ડ ધરાશાયી થઈ ગયું હતું.ભારે પવનને પગલે જમીન પર ઝુલતા જાહેરાતના આ બોર્ડને કારણે વાહન ચાલકો ખાસ કરીને ટુ વ્હીલર ચાલકો માથે જીવનું જોખમ ઉભું થાય તેવા દ્રશ્યો જોવા મળ્યા હતા જેના કારણે આવા બોર્ડ અને હોર્ડિગ્સ પણ દુર કરવા માટે સુચના આપવામાં આવી છે.
