એક લાખ રાશનકીટ, 60 ટન શાકભાજીનું વિતરણ થઈ રહ્યું છે : 5000 લોકો માટે મેડિકલ સહાય થઈ
– એક લાખ રાશનકીટ, 60 ટન શાકભાજીનું વિતરણ થઈ રહ્યું છે : 5000 લોકો માટે મેડિકલ સહાય થઈ
અમદાવાદ,
BAPS સ્વામિનારાયણ સંસ્થાએ કરોડોના ખર્ચે થઈ રહેલાં અનેક રાહતકાર્યો ઉપરાંત, શનિવારે પ્રધાનમંત્રી અને મુખ્યમંત્રીના રાહત ફંડમાં ૭૨ લાખનું દાન જાહેર કર્યું છે. મુખ્યમંત્રી વિજયભાઈ રૂપાણીને રાહતફંડમાં BAPS સ્વામિનારાયણ સંસ્થા વતી દાન આપવા સંતોમાં વરિષ્ઠ સંતવર્ય પૂજ્ય બ્રહ્મવિહારી સ્વામી, વિશ્વવિહારી સ્વામી, અક્ષરવત્સલ સ્વામી ઉપસ્થિત રહ્યાં હતા.
સંસ્થાના આંતરરાષ્ટ્રીય સંયોજક પૂજ્ય ઈશ્વરચરણ સ્વામીએ જણાવ્યું છે કે BAPS સ્વામિનારાયણ સંસ્થાના આધ્યાત્મિક વડા પરમ પૂજ્ય મહંતસ્વામી મહારાજની પ્રેરણાથી કોરોના મહામારીમાં BAPS સ્વામિનારાયણ સંસ્થા દ્વારા તાત્કાલીક ધોરણે રાહત કાર્યો શરૂ થયા. જે અંતર્ગત ભારત ખાતેનાં ૧,૦૦૦ મંદિરો અને વિદેશોનાં ૨૫૦ મંદિરો વિવિધ સ્તરે સેવાઓ કરી રહ્યાં છે. સંસ્થાના એક હજારથી પણ વધુ સંતો અને ૫,૦૦૦થી વધુ સ્વયંસેવકો નિસ્વાર્થભાવે આ સેવા કાર્યોમાં જોડાયા છે.
લોકડાઉન દરમ્યાન સ્થાનિક પ્રશાસન દ્વારા થયેલા સર્વેક્ષણ અને તેમની જરૂરિયાત મુજબ BAPS સ્વામિનારાયણ સંસ્થાએ જરૂરિયાતમંદો અને ગરીબોને મદદ કરવા ઠેરઠેર રાહતકાર્યો આરંભી દીધા. કુલ એક લાખ લાભાર્થી માટે ગરમ ભોજનની વ્યવસ્થા અને ફૂડપેકેટનું વિતરણ કરાઈ રહ્યું છે. કુલ પાંચ લાખ ભોજન થાળી માટે પર્યાપ્ત થઈ રહે તેટલાં ૬૦ ટન લીલાં શાકભાજીનું સ્વચ્છતાના ધોરણોનું ગંભીરતાથી પાલન કરીને વિતરણ કરાઈ રહ્યું છે. કુલ ૧૦,૦૦૦ પરિવારોને એક મહિના સુધી ચાલે તેવી રાશનકીટ તૈયાર કરીને પહોંચાડાઈ, જેમાં લોટ-દાળ-ચોખા-તેલ-માસાલા-ગોળ વગેરેનો સમાવેશ થાય છે. ઉપરાંત, વડોદરામાં ત્રણ સ્થળોએ એક લાખ રાશન કીટ વહેંચાઈ રહી છે. ૫૦૦૦ લોકો માટે એન ૯૫ માસ્કનું તથા ૮૦૦૦ ‘કેર કીટ’નું વિતરણ કરવામાં આવ્યું. આ ઉપરાંત, કોરોના મહામારી દરમિયાન ઈમરજન્સી માટે ઉપયોગમાં આવી શકે તે માટે સંસ્થાના પરિસરોમાં ખંડો ફાળવવામાં આવ્યા છે.
પ્રાર્થના યજ્ઞોની સાથે કાઉન્સેલિંગ દ્વારા પરિવારોને હૂંફ અપાઈ રહી છે
BAPS સ્વામિનારાયણ સંસ્થા દ્વારા વિવિધ સ્તરે પ્રાર્થનાયજ્ઞો તથા મહાપૂજાઓ વગેરે કાર્યક્રમો પણ હાથ ધરવામાં આવ્યા છે. જેમાં ઘરે બેઠાં જ ભાગ લઈને સૌ શાંતિ અને આંતરિક બળ પ્રાપ્ત કરી રહ્યા છે. સાથોસાથ સંતો અને હજારો કાર્યકર્તાઓ ફોન દ્વારા ભક્તો અને ભાવિકોને આધ્યાત્મિક તથા સામાજિક રીતે કાઉન્સેલિંગ કરીને માર્ગદર્શન આપી રહ્યા છે. તેનાથી અનેક પરિવારોને હૂંફ અને બળ પ્રાપ્ત થઈ રહ્યાં છે.
