– આરોપી સુખા દુન્નાકે ખાલિસ્તાની આતંકવાદી અર્શ ડલ્લાનો રાઈટ હેન્ડ હતો
– સુખા પણ કેનેડામાં બેસીને ભારતમાં તેના સાગરિતો દ્વારા ખંડણીનું કામ કરતો હતો
ભારત અને કેનેડા વચ્ચે ખાલિસ્તાની આતંકી હરદીપ સિંહ નિજ્જરની હત્યાને લઈને તણાવ ચાલી રહ્યો છે ત્યારે હવે ભારતના વધુ એક વોન્ટેડ ગેંગસ્ટરની કેનેડામાં ગોળી મારીને હત્યા કરી દેવામાં આવી છે.આ હત્યા કેનેડાના વિનીપેગમાં શહેરમાં કરવામાં આવી છે.
NIAની વોન્ટેડ લિસ્ટમાં સામેલ હતો
હાલ ભારત અને કેનેડા વચ્ચે હરદીપ નિજ્જરની હત્યાને લઈને કડવાશ વધી છે ત્યારે હવે પંજાબમાંથી ભાગીને કેનેડામાં બેઠેલા એક કેટેગરીના ગેંગસ્ટર સુખદુલસિંહ ગીલ ઉર્ફે સુખા દુન્નાકેની કેનેડામાં ગોળી મારીને હત્યા કરી દેવામાં આવી છે.દુન્નાકે પર 10 ગોળીઓ ચલાવવામાં આવી હતી.આરોપી સુખા દુન્નાકે ખાલિસ્તાની આતંકવાદી અર્શદીપ સિંહ ઉર્ફે અર્શ ડલ્લાનો રાઈટ હેન્ડ હતો અને NIAની વોન્ટેડ લિસ્ટમાં સામેલ હતો.સુખા પણ કેનેડામાં બેસીને ભારતમાં તેના સાગરિતો દ્વારા ખંડણીનું કામ કરતો હતો.
બનાવટી પાસપોર્ટ તૈયાર કરીને કેનેડા ભાગી ગયો હતો
ગેંગસ્ટર સુખદુલસિંહ ગીલ ઉર્ફે સુખા દુન્નાકે વર્ષ 2017માં બનાવટી પાસપોર્ટ તૈયાર કરીને કેનેડા ભાગી ગયો હતો.તેણે પોલીસ સાથે મીલીભગતથી કેનેડાના વિઝા મેળવ્યા હતા.પંજાબ પોલીસના બે કર્મચારીઓ પર તેની મદદ કરવાનો આરોપ હતો બાદમાં તેઓની મોગા પોલીસે ધરપકડ કરી હતી.આ ઉપરાંત તેની સામે સાત ગુનાહિત કેસો નોંધાયેલા છે. ઉલ્લેખનીય છે કે આ વર્ષે જ કેનેડાના સરેમાં ખાલિસ્તાની આતંકવાદી હરદીપસિંહ નિજ્જરની હત્યા કરવામાં આવી હતી.આ હત્યાને લઈને કેનેડાના PM ટુડોએ આરોપ લગાવ્યો હતો કે હરદીપસિંહ નિજ્જરની હત્યામાં ભારત સરકારની સંડોવણી છે આ પછી ભારતે પર વળતો જવાબ આપ્યો અને તમામ નિવેદનોને વાહિયાત ગણાવ્યા હતા.
લોરેન્સ બિશ્નોઈ ગેંગે હત્યાની જવાબદારી લીધી
ભારતના વોન્ટેડ ગેંગસ્ટર સુખદુલસિંહ ગીલ ઉર્ફે સુખા દુન્નાકેની હત્યાની ગેંગસ્ટર લોરેન્સ બિશ્નોઈ ગેંગે જવાબદારી સ્વીકારી છે.લોરેન્સ બિશ્નોઈ ગેંગે ફેસબુક પર એક પોસ્ટ કરી હતી જેમાં તેણે કેનેડામાં થયેલી હત્યાની જવાબદારી લીધી છે.આ સાથે જ પોસ્ટમાં અન્ય ગેંગસ્ટરોને પણ ધમકી આપવામાં આવી છે કે તેઓ જ્યાં પણ જશે, તેઓને તેમના પાપોની સજા ચોક્કસ મળશે.
