ગુજરાતમાં છેલ્લા 48 કલાકથી વાતાવરણમાં આવેલા મોટા પલટાને કારણે ગરમીમાં નોંધપાત્ર રાહત મળી છે.પ્રી-મોન્સૂન એક્ટિવિટીના પગલે રાજ્યના અનેક વિસ્તારોમાં વરસાદી માહોલ જામ્યો છે. હવામાન વિભાગે આજે (3 જૂન) રાજ્યના 11 જિલ્લાઓમાં ઓરેન્જ એલર્ટ જાહેર કર્યું છે.
હવામાન વિભાગની આગાહી અનુસાર ઉત્તર ગુજરાત અને કચ્છના વિસ્તારોમાં વાતાવરણ વધુ સક્રિય રહેશે.બનાસકાંઠા,પાટણ,મહેસાણા,સાબરકાંઠા, અરવલ્લી,ગાંધીનગર,ખેડા,પંચમહાલ,દાહોદ,મહિસાગર અને કચ્છ જિલ્લામાં ઓરેન્જ એલર્ટ આપવામાં આવ્યું છે.આ વિસ્તારોમાં 50થી 60 કિલોમીટર પ્રતિ કલાકની ઝડપે પવન ફૂંકાવાની સાથે વીજળીના કડાકા-ભડાકા અને વરસાદની શક્યતા વ્યક્ત કરવામાં આવી છે.
હવામાન વિભાગના જણાવ્યા અનુસાર ઉત્તર ગુજરાત અને કચ્છમાં 50થી 60 કિલોમીટર પ્રતિ કલાકની ઝડપે પવન ફૂંકાઈ શકે છે અને મધ્યમ વરસાદ વરસી શકે છે.જ્યારે દક્ષિણ ગુજરાત અને સૌરાષ્ટ્રના વિસ્તારોમાં 40થી 50 કિલોમીટર પ્રતિ કલાકની ઝડપે પવન સાથે હળવાથી મધ્યમ વરસાદની સંભાવના છે.રાજ્યમાં વાતાવરણમાં આવેલા ફેરફારને કારણે લોકોને અસહ્ય ગરમીમાંથી રાહત મળી છે.હવામાન વિભાગના તાજેતરના આંકડા મુજબ અમદાવાદમાં સોમવારે મહત્તમ તાપમાન 40.8 ડિગ્રી સેલ્સિયસ નોંધાયું હતું,જે મંગળવારે ઘટીને 37 ડિગ્રી સેલ્સિયસ પર પહોંચી ગયું છે.એટલે કે એક જ દિવસમાં તાપમાનમાં 3.8 ડિગ્રીનો ઘટાડો નોંધાયો છે.
સૌથી વધુ રાહત ગાંધીનગરમાં જોવા મળી છે.અહીં તાપમાન સામાન્ય કરતાં 4.7 ડિગ્રી સેલ્સિયસ જેટલું નીચે ઉતરીને 36.2 ડિગ્રી સેલ્સિયસ નોંધાયું છે.હવામાન વિભાગે આગામી દિવસોમાં પણ રાજ્યના વિવિધ વિસ્તારોમાં પ્રી-મોન્સૂન વરસાદી માહોલ યથાવત રહેવાની શક્યતા વ્યક્ત કરી છે.
