મુંબઈ : મુંબઈમાં જાહેર રસ્તાઓ અને રેલવે સ્ટેશનોની બહાર નમાજ અદા કરવાના મુદ્દે ભાજપના નેતા કિરીટ સોમૈયાએ પોલીસ અને મહાનગરપાલિકા તંત્ર સમક્ષ કડક વાંધો નોંધાવ્યો છે.તેમણે મુંબઈ પોલીસ કમિશનર,મહાનગરપાલિકા કમિશનર અને અન્ય સંબંધિત અધિકારીઓને પત્ર લખીને જાહેર સ્થળોએ નમાજ અદા કરવાની પ્રથાને રોકવા માટે તાત્કાલિક પગલાં લેવાની માંગ કરી છે.
સોમૈયાએ પોતાના પત્રમાં દાવો કર્યો છે કે શહેરના કેટલાક વિસ્તારોમાં રસ્તાઓ,જાહેર સ્થળો અને રેલવે સ્ટેશનોની બહાર મોટી સંખ્યામાં લોકો નમાજ અદા કરવા માટે એકત્ર થાય છે,જેના કારણે ટ્રાફિક વ્યવસ્થા ખોરવાય છે અને સામાન્ય નાગરિકોને મુશ્કેલીનો સામનો કરવો પડે છે.ખાસ કરીને શુક્રવારના દિવસે કેટલાક વિસ્તારોમાં વાહનવ્યવહાર પર અસર થતી હોવાનો તેમણે ઉલ્લેખ કર્યો છે.ભાજપ નેતાએ જણાવ્યું કે જાહેર માર્ગોનો ઉપયોગ એવી રીતે ન થવો જોઈએ કે જેના કારણે રોજિંદા જીવન અને આવન-જાવનમાં અવરોધ સર્જાય.તેમના મતે ધાર્મિક પ્રવૃત્તિઓ માટે નિયત સ્થળોનો ઉપયોગ થવો જોઈએ અને જાહેર માર્ગો ખુલ્લા રાખવા જરૂરી છે.આ મુદ્દે રાજકીય ચર્ચા પણ શરૂ થઈ છે.કેટલાક નેતાઓએ જાહેર સ્થળોએ થતી કોઈપણ ધાર્મિક પ્રવૃત્તિ માટે સમાન નિયમો લાગુ થવા જોઈએ તેવી માંગ કરી છે,જ્યારે અન્ય પક્ષોએ આ મુદ્દાને ધાર્મિક સ્વતંત્રતા સાથે જોડ્યો છે.
હાલ મુંબઈ પોલીસ અથવા બૃહન્મુંબઈ મહાનગરપાલિકા તરફથી સોમૈયાના પત્ર અંગે કોઈ સત્તાવાર નિર્ણય જાહેર કરવામાં આવ્યો નથી.જોકે જાહેર સ્થળોના ઉપયોગ, ટ્રાફિક વ્યવસ્થા અને ધાર્મિક સ્વતંત્રતા વચ્ચે સંતુલન જાળવવાનો મુદ્દો ફરી એકવાર શહેરના રાજકીય અને સામાજિક વર્તુળોમાં ચર્ચાનો વિષય બન્યો છે.
