બિહારના હાજીપુરમાં ગંગા નદીમાં નાવ પલટી જતાં 14 લોકોનાં મોત થયાં છે. મંગળવારે મોડી સાંજે બનેલી આ દુર્ઘટનામાં અનેક લોકો નદીમાં ડૂબી ગયા હતા.ઘટનાની જાણ થતાં જ સ્થાનિક પોલીસ અને વહીવટી તંત્રની ટીમો સ્થળ પર પહોંચી હતી અને બચાવ કામગીરી શરૂ કરી હતી.નદીમાંથી બચાવી લેવાયેલા લોકોને સારવાર માટે હોસ્પિટલમાં ખસેડવામાં આવ્યા હતા.દુર્ઘટનામાં જીવ ગુમાવનારાઓમાં મોટાભાગનાં બાળકો હોવાનું સામે આવ્યું છે.
પ્રાપ્ત માહિતી અનુસાર, નાવમાં 20થી વધુ લોકો સવાર હતા.તેઓ એક ભોજન સમારંભમાં હાજરી આપવા જઈ રહ્યા હતા.આ દરમિયાન રાઘોપુરના રામપુર શ્યામચંદ ગામ નજીક નાવ અચાનક સંતુલન ગુમાવી બેઠી હતી અને ગંગા નદીમાં પલટી ગઈ હતી.નાવ પલટતાં મુસાફરો નદીમાં ડૂબવા લાગ્યા હતા. ઘટનાને પગલે સ્થાનિક લોકો પણ મદદ માટે દોડી આવ્યા હતા.અકસ્મતાની જાણ થતાં પોલીસ અને વહીવટી તંત્રે બચાવ કામગીરી હાથ ધરી હતી.નદીમાં ડૂબેલા લોકોને બહાર કાઢવા માટે પ્રયાસો કરવામાં આવ્યા હતા.બચાવી લેવાયેલા લોકોને તાત્કાલિક હોસ્પિટલ પહોંચાડવામાં આવ્યા હતા.મૃતકોનાં શરીર સરકારી હોસ્પિટલમાં પોસ્ટમોર્ટમ માટે મોકલવામાં આવ્યાં હતાં.મૃતકોની ઓળખ કરવાની પ્રક્રિયા પણ શરૂ કરવામાં આવી હતી.દુર્ઘટનામાં બાળકોનાં મોતથી પરિવારો પર આભ તૂટી પડ્યું છે.પોતાના સ્વજનોને ગુમાવનાર પરિવારોમાં શોકની લાગણી ફેલાઈ છે.ઘટનાની ગંભીરતાને ધ્યાનમાં રાખીને વહીવટી તંત્રે રાહત અને બચાવ કામગીરી પર ધ્યાન કેન્દ્રિત કર્યું હતું.
બિહારના મુખ્યમંત્રી સમ્રાટ ચૌધરીએ દુર્ઘટના અંગે દુઃખ વ્યક્ત કરીને મૃતકોના પરિવારજનો પ્રત્યે સંવેદના વ્યક્ત કરી હતી.રાજ્ય સરકાર દ્વારા મૃતકોના પરિવારજનોને ચાર લાખ રૂપિયાની આર્થિક સહાય આપવાની જાહેરાત કરવામાં આવી છે.મુખ્યમંત્રીએ સંબંધિત અધિકારીઓને બચાવ કામગીરી ઝડપી બનાવવા અને ઘાયલોને યોગ્ય સારવાર મળે તેની વ્યવસ્થા કરવા સૂચના આપી હતી.બિહારના પૂર્વ નાયબ મુખ્યમંત્રી અને સ્થાનિક ધારાસભ્ય તેજસ્વી યાદવે પણ આ દુર્ઘટના અંગે શોક વ્યક્ત કર્યો હતો.તેમણે જણાવ્યું હતું કે નદીમાં ડૂબેલા લોકોમાં મોટાભાગનાં બાળકોનો સમાવેશ થાય છે.તેમણે સ્થાનિક વહીવટી તંત્ર અને અધિકારીઓ સાથે વાતચીત કરીને રાહત તથા બચાવ કામગીરી ઝડપી બનાવવા માટે રજૂઆત કરી હતી.કેન્દ્રીય મંત્રી ચિરાગ પાસવાને પણ આ દુર્ઘટના અંગે દુઃખ વ્યક્ત કરીને શોકગ્રસ્ત પરિવારો પ્રત્યે સંવેદના દર્શાવી હતી.ગંગા નદીમાં બનેલી આ દુર્ઘટનાએ હાજીપુર અને આસપાસના વિસ્તારોમાં શોકનું વાતાવરણ સર્જ્યું છે.અનેક પરિવારો માટે ભોજન સમારંભમાં જવાની સામાન્ય સફર દુઃખદ ઘટનામાં ફેરવાઈ ગઈ હતી.
