ઇઝરાયલની ચૂંટણીની સાથે અમેરિકા અને ઇરાન વચ્ચેના તણાવનો મુદ્દો પણ ચર્ચામાં છે. ઇરાનના પરમાણુ કાર્યક્રમને લઈને અમેરિકા અને ઇઝરાયલ વચ્ચે સંભવિત લશ્કરી કાર્યવાહીની અટકળો ચાલી રહી છે.અમેરિકી સમાચાર માધ્યમ એક્સિયોસના અહેવાલમાં અમેરિકી અને ઇઝરાયલી અધિકારીઓ સહિતના સૂત્રોને ટાંકીને જણાવવામાં આવ્યું હતું કે ટ્રમ્પ અને નેતન્યાહુએ છેલ્લા બે અઠવાડિયાં દરમિયાન અનેક વખત વાતચીત કરી હતી.આ વાતચીતમાં ઇરાન સામે મોટા પાયે લશ્કરી કાર્યવાહી ફરી શરૂ કરવાની શક્યતા અંગે ચર્ચા થઈ હોવાનો દાવો કરવામાં આવ્યો હતો.આ ચર્ચામાં ઇરાનનાં લશ્કરી મથકો અને પરમાણુ સુવિધાઓને નિશાન બનાવવાની સંભાવનાનો પણ ઉલ્લેખ થયો હતો.આ દાવા સામે વ્હાઇટ હાઉસે સ્પષ્ટ વલણ અપનાવ્યું હતું. અમેરિકી રાષ્ટ્રપતિના કાર્યાલયના એક અધિકારીએ ટ્રમ્પ અને નેતન્યાહુ વચ્ચે યુદ્ધ ફરી શરૂ કરવાની ચર્ચા થઈ હોવાના અહેવાલને ખોટો ગણાવ્યો હતો.અધિકારીએ વધુમાં જણાવ્યું હતું કે અમેરિકાની મધ્યસત્ર ચૂંટણીઓ પહેલાં ઇરાન પર હુમલો કરવામાં આવશે નહીં.નેતન્યાહુના કાર્યાલયે જણાવ્યું હતું કે ઇઝરાયલના વડાપ્રધાન ટ્રમ્પ અને અમેરિકાના વરિષ્ઠ અધિકારીઓ સાથે નિયમિત સંપર્કમાં છે.જોકે, બંને નેતાઓ વચ્ચે થયેલી વાતચીતની ચોક્કસ વિગતો જાહેર કરવામાં આવી નહોતી.આ પરિસ્થિતિમાં ઇરાન અંગે અમેરિકા અને ઇઝરાયલની આગામી વ્યૂહરચના પર આંતરરાષ્ટ્રીય સ્તરે નજર રાખવામાં આવી રહી છે.
ઇઝરાયલમાં 27 ઑક્ટોબરે યોજાનારી ચૂંટણી નેતન્યાહુ માટે મહત્ત્વપૂર્ણ છે. ચૂંટણી પહેલાં ટ્રમ્પનું જાહેર સમર્થન તેમના માટે રાજકીય રીતે કેટલું મહત્ત્વ ધરાવશે તે અંગે ચર્ચા થઈ રહી છે.ટ્રમ્પે સંબંધો સારા હોવાની વાત કરી હોવા છતાં ચૂંટણી પ્રચારમાં જોડાવા અંગે કોઈ સ્પષ્ટ વચન આપ્યું નથી.તેથી નેતન્યાહુને અમેરિકી રાષ્ટ્રપતિ તરફથી સીધું રાજકીય સમર્થન મળશે કે નહીં તે મુદ્દો ચર્ચામાં રહ્યો છે.અમેરિકાની મધ્યસત્ર ચૂંટણીઓ પણ નજીક આવી રહી છે ત્યારે ઇરાન સામે નવી લશ્કરી કાર્યવાહીનો નિર્ણય બંને દેશો માટે મહત્ત્વપૂર્ણ બની શકે છે.ઇરાન તરફથી સંભવિત વળતા હુમલાની સ્થિતિ ઊભી થાય તો તેની અસર ઇઝરાયલની સુરક્ષા અને ચૂંટણી પ્રક્રિયા પર પડી શકે છે.હાલ વ્હાઇટ હાઉસે લશ્કરી કાર્યવાહી અંગેના અહેવાલોને નકારી કાઢ્યા છે,જ્યારે ટ્રમ્પના નિવેદને નેતન્યાહુ સાથેના તેમના સંબંધો અને ચૂંટણીમાં તેમની સંભવિત ભૂમિકાને ફરી ચર્ચાના કેન્દ્રમાં લાવી છે.
