કાજલ હિન્દુસ્તાનીએ પોતાના વીડિયોમાં આદિત્ય ગઢવીને નિશાન બનાવતાં સવાલ કર્યો હતો કે માતાજીની શક્તિની ઉપાસના કરનાર વ્યક્તિને મહિષાસુરથી આટલો ડર કેમ લાગે છે? તેમણે આદિત્ય ગઢવીના વલણ સામે સવાલ ઉઠાવીને કહ્યું હતું કે નવરાત્રિ અને શક્તિની આરાધનાના ધાર્મિક મહત્ત્વને ધ્યાનમાં રાખીને આ મુદ્દાને જોવો જોઈએ.હાર્દિક દવેના નિવેદન અંગે કાજલ હિન્દુસ્તાનીએ નાઝી શાસન અને યહૂદીઓના ઉદાહરણ સામે કાશ્મીરી હિન્દુઓના વિસ્થાપનનો મુદ્દો ઉઠાવ્યો હતો.તેમણે દાવો કર્યો હતો કે કાશ્મીરમાંથી લાખો હિન્દુઓને સ્થળાંતર કરવાની ફરજ પડી હતી અને આ ઘટનાને પણ ચર્ચામાં સ્થાન મળવું જોઈએ.તેમણે પહેલગામના આતંકવાદી હુમલાનો ઉલ્લેખ કરીને ધાર્મિક ઓળખના આધારે થયેલી હત્યાઓ અંગે પણ સવાલો કર્યા હતા.કાજલ હિન્દુસ્તાનીએ પાકિસ્તાન,બાંગ્લાદેશ અને અફઘાનિસ્તાનમાં હિન્દુઓની સ્થિતિનો ઉલ્લેખ કરીને કલાકારોને સવાલ કર્યો હતો કે જો તેઓ લઘુમતી સમુદાયો પ્રત્યે સહાનુભૂતિ દર્શાવે છે, તો આ દેશોમાં હિન્દુઓ સાથે થતા અત્યાચારના મુદ્દાઓ પર પણ સમાન રીતે અવાજ ઉઠાવવો જોઈએ.તેમણે પશ્ચિમ બંગાળમાં મહિલાઓની સુરક્ષા અને હિન્દુ પરિવારોના સ્થળાંતર જેવા મુદ્દાઓનો પણ ઉલ્લેખ કર્યો હતો.વીડિયોમાં કાજલ હિન્દુસ્તાનીએ આદિત્ય ગઢવી અને હાર્દિક દવેને કટાક્ષભર્યા શબ્દોમાં કહ્યું હતું કે અન્ય ધર્મના લોકો પ્રત્યે આટલો પ્રેમ હોય તો તેમને પોતાના ઘરે બોલાવીને પરિવારની મહિલાઓ સાથે ગરબા રમાડવા જોઈએ.તેમણે વધુમાં કહ્યું હતું કે હિન્દુઓ પાસેથી કાર્યક્રમો દ્વારા આવક મેળવવી અને હિન્દુ સંગઠનોના વિરોધમાં નિવેદનો આપવાં એ વિરોધાભાસી વલણ છે.તેમણે કલાકારોને ભજનને બદલે કવ્વાલી ગાવા અંગે પણ કટાક્ષ કર્યો હતો.
કાજલ હિન્દુસ્તાનીએ પોતાના નિવેદનમાં લવ જેહાદની ઘટનાઓનો પણ ઉલ્લેખ કર્યો હતો.તેમનો આક્ષેપ હતો કે આવી ઘટનાઓ બને ત્યારે મહિલાઓની મદદ માટે કલાકારો આગળ આવતા નથી,પરંતુ ગરબા કાર્યક્રમોમાં પ્રવેશના મુદ્દે તેઓ અલગ વલણ અપનાવે છે.આદિત્ય ગઢવી અને હાર્દિક દવે અંગેની તેમની ટિપ્પણીઓ બાદ નવરાત્રિના ગરબા કાર્યક્રમોમાં ધાર્મિક ઓળખ,પ્રવેશની નીતિ અને કલાકારોની ભૂમિકાને લઈને ચાલી રહેલી ચર્ચામાં વધુ ગરમાવો આવ્યો છે.ગુજરાતમાં નવરાત્રિ દરમિયાન ગરબા માત્ર સંગીત અને નૃત્યનો કાર્યક્રમ નથી,પરંતુ ધાર્મિક આસ્થા અને સાંસ્કૃતિક પરંપરા સાથે પણ જોડાયેલો છે.આ જ કારણે ગરબા પંડાલમાં પ્રવેશના નિયમો અને વિવિધ ધર્મના લોકોની ભાગીદારી અંગે જુદા જુદા મત સામે આવી રહ્યા છે.એક તરફ તમામ લોકોને કાર્યક્રમમાં આવકારવાની વાત કરવામાં આવે છે, તો બીજી તરફ કેટલાક હિન્દુ સંગઠનો ધાર્મિક પરંપરા અને કાર્યક્રમના સ્વરૂપને ધ્યાનમાં રાખીને નિયંત્રણોની માગ કરી રહ્યા છે.કાજલ હિન્દુસ્તાનીના નિવેદનથી આ ચર્ચા ફરી કેન્દ્રમાં આવી છે.
