અયોધ્યાના શ્રીરામજન્મભૂમિ મંદિરમાં બિરાજમાન રામલલ્લાના દર્શન, આરતી, ભોગ અને વિશ્રામના સમયપત્રકમાં ફેરફાર કરવામાં આવ્યો છે.ઋતુ પરિવર્તનને ધ્યાનમાં રાખીને નવી વ્યવસ્થા 1 નવેમ્બર 2026થી અમલમાં આવશે.નવા સમયપત્રક પ્રમાણે મંદિરનાં કપાટ સવારે 4 વાગ્યે ખોલવામાં આવશે અને રાત્રે 10 વાગ્યે બંધ કરી દેવામાં આવશે.હાલ મંદિર સવારે 3:45 વાગ્યે ખૂલે છે અને રાત્રે 10:30 વાગ્યે બંધ થાય છે.
મંદિરના મુખ્ય અર્ચક આચાર્ય કેશવે નવી વ્યવસ્થાની વિગતો આપતાં જણાવ્યું કે સવારે 4:30થી 4:40 વાગ્યા સુધી મંગળા આરતી યોજાશે.ત્યારબાદ સવારે 4:40થી 6:30 વાગ્યા સુધી અભિષેક, શ્રૃંગાર, ધૂપ-દીપ અને નૈવેદ્યની ધાર્મિક વિધિઓ માટે કપાટ બંધ રહેશે.સવારે 6:30 વાગ્યે શ્રૃંગાર આરતી થશે અને સવારે 7 વાગ્યાથી ભક્તો માટે રામલલ્લાનાં દર્શન શરૂ થશે.સવારે 8થી 8:10 વાગ્યા સુધી બાળભોગ ધરાવવા માટે દર્શન બંધ રાખવામાં આવશે. ત્યારબાદ ભક્તો સવારે 11:30 વાગ્યા સુધી દર્શન કરી શકશે. સવારે 11:30થી બપોરે 12 વાગ્યા સુધી રાજભોગની તૈયારી કરવામાં આવશે અને બપોરે 12 વાગ્યે રાજભોગ આરતી યોજાશે.રાજભોગ આરતી બાદ રામલલ્લાના વિશ્રામ માટે બપોરે 12:30થી 1:30 વાગ્યા સુધી મંદિરનાં કપાટ બંધ રહેશે.પૂજારી પ્રવેશ અને અલ્પભોગની પ્રક્રિયા પૂર્ણ થયા બાદ બપોરે 1:35 વાગ્યાથી દર્શન ફરી શરૂ થશે.બપોર પછી પણ ભક્તો માટે દર્શનનો સમય ચાલુ રહેશે, પરંતુ સાંજે 4થી 4:10 વાગ્યા સુધી બાળભોગ માટે કપાટ બંધ રાખવામાં આવશે.ત્યારબાદ સાંજે 6:45 વાગ્યા સુધી દર્શન કરી શકાશે.સાંજે 6:45થી 7 વાગ્યા સુધી ધૂપ-દીપ અને નૈવેદ્યની વિધિ થશે. સાંજે 7 વાગ્યે સંધ્યા આરતી યોજાશે.રાત્રિના સમયે પણ ધાર્મિક વિધિઓ માટે નિર્ધારિત સમયગાળામાં દર્શન બંધ રહેશે.રાત્રે 8થી 8:30 વાગ્યા સુધી અને ત્યારબાદ 9:15થી 9:30 વાગ્યા સુધી ધૂપ-દીપ તથા નૈવેદ્ય માટે કપાટ બંધ રાખવામાં આવશે.રાત્રે 9:30 વાગ્યે શયન આરતી થશે અને રાત્રે 10 વાગ્યે મંદિરનાં કપાટ બંધ કરી દેવામાં આવશે.
નવી વ્યવસ્થાના અમલ સાથે રામલલ્લાના દર્શન માટે આવતા શ્રદ્ધાળુઓએ પોતાના અયોધ્યા પ્રવાસનું આયોજન બદલાયેલા સમય પ્રમાણે કરવું પડશે.ખાસ કરીને વહેલી સવારે દર્શન કરવા ઇચ્છતા ભક્તો માટે મંદિરનાં કપાટ ખૂલવાનો સમય સવારે 4 વાગ્યાનો રહેશે, જ્યારે રાત્રે દર્શન માટે આવતા શ્રદ્ધાળુઓએ 10 વાગ્યે મંદિર બંધ થવાના સમયનું ધ્યાન રાખવું પડશે.દિવાળીના તહેવારની આસપાસ અયોધ્યામાં મોટી સંખ્યામાં ભક્તો પહોંચતા હોવાથી નવા સમયપત્રકની જાણકારી રાખવી શ્રદ્ધાળુઓ માટે ઉપયોગી રહેશે.
