પોલીસ તપાસ સાથે જોડાયેલા સૂત્રોના જણાવ્યા અનુસાર, બિશ્નોઈ ગેંગ મુંબઈ અને પુણેમાં પોતાનું નેટવર્ક મજબૂત કરવાનો પ્રયાસ કરી રહી છે.મુંબઈમાં ફિલ્મી હસ્તીઓ અને પુણેમાં વેપારીઓ તથા કારોબારીઓને ધમકી આપીને ખંડણી વસૂલવાના પ્રયાસો કરવામાં આવ્યા હોવાના કેસ નોંધાયા છે.આ ગુનાઓમાં સ્થાનિક સંપર્કો,અન્ય રાજ્યોમાંથી બોલાવવામાં આવેલા શૂટરો અને વિદેશમાં બેઠેલા કથિત હેન્ડલરોની ભૂમિકાની તપાસ કરવામાં આવી રહી છે.મહારાષ્ટ્રની વિવિધ જેલોમાં બિશ્નોઈ ગેંગ સાથે જોડાયેલા 56 આરોપીઓ બંધ હોવાનું જણાવવામાં આવ્યું છે.તેમાંના 31 આરોપીઓ બાબા સિદ્દીકી હત્યા કેસ સાથે સંકળાયેલા હોવાનું કહેવાય છે.જેલમાં મોટી સંખ્યામાં આરોપીઓ હોવા છતાં ગેંગ સાથે જોડાયેલી ગતિવિધિઓના કેસ સામે આવતાં તેના નેટવર્કની કામગીરી અને બહાર રહેલા સાગરીતોની ભૂમિકા અંગે તપાસ ચાલી રહી છે.વર્ષ 2024થી 2026 દરમિયાન પુણે અને પિંપરી-ચિંચવડમાં બિશ્નોઈ ગેંગ સાથે સંકળાયેલી હોવાની શંકા ધરાવતા ખંડણીના 10થી વધુ કેસ નોંધાયા છે.કેટલાક કેસમાં વેપારીઓને ધમકીઓ આપીને કરોડો રૂપિયાની માગણી કરવામાં આવી હતી.તપાસમાં શુભમ લોણકરનું નામ પણ વારંવાર સામે આવ્યું છે.તેને મહારાષ્ટ્રમાં ગેંગનું નેટવર્ક સંભાળતા મુખ્ય હેન્ડલરોમાંનો એક માનવામાં આવે છે.બાબા સિદ્દીકી હત્યા કેસમાં પણ તેની કથિત ભૂમિકાની તપાસ કરવામાં આવી રહી છે.
14 એપ્રિલ, 2024ના રોજ મુંબઈના બાંદ્રા વિસ્તારમાં અભિનેતા સલમાન ખાનના નિવાસસ્થાનની બહાર મોટરસાઇકલ પર આવેલા બે હુમલાખોરોએ ફાયરિંગ કર્યું હતું.આ કેસમાં લોરેન્સ બિશ્નોઈ અને અનમોલ બિશ્નોઈ સહિતના લોકોની કથિત ભૂમિકાને લઈને તપાસ થઈ હતી.આ ઘટનાએ ફિલ્મી હસ્તીઓની સુરક્ષા અને સંગઠિત ગુનાખોરીના નેટવર્ક અંગે ગંભીર સવાલો ઊભા કર્યા હતા.
12 ઓક્ટોબર, 2024ના રોજ મુંબઈના બાંદ્રા પૂર્વ વિસ્તારમાં એનસીપીના નેતા બાબા સિદ્દીકીની ગોળી મારીને હત્યા કરવામાં આવી હતી.આ હત્યાકાંડમાં અનમોલ બિશ્નોઈ અને શુભમ લોણકરનાં નામ તપાસમાં સામે આવ્યાં હતાં.આ કેસે મુંબઈમાં ગેંગ સાથે જોડાયેલા શૂટરો અને સ્થાનિક સંપર્કોની કામગીરી તરફ તપાસ એજન્સીઓનું ધ્યાન ખેંચ્યું હતું.
1 ફેબ્રુઆરી, 2026ના રોજ ફિલ્મ નિર્માતા રોહિત શેટ્ટીના જુહુ સ્થિત નિવાસસ્થાનની બહાર ફાયરિંગની ઘટના સામે આવી હતી.આ કેસમાં ગેંગ સાથે સંકળાયેલા હોવાની શંકા ધરાવતા આરોપીઓ સામે તપાસ આગળ વધી હતી.ફિલ્મી હસ્તીઓને ધમકી આપવાના અન્ય બનાવોમાં પણ બિશ્નોઈ ગેંગનું નામ સામે આવ્યું છે.
મે 2026માં પિંપરી-ચિંચવડના એજે ફર્નિચર મોલમાં ફાયરિંગની ઘટના બની હતી.આ કેસમાં કારોબારી પાસેથી બે કરોડ રૂપિયાની ખંડણી માગવામાં આવી હોવાનો આક્ષેપ છે.ત્યારબાદ 22 જૂન, 2026ના રોજ પુણેના ફુરસુંગી વિસ્તારમાં એક કારોબારીના ગોડાઉન પર ફાયરિંગ કરવામાં આવ્યું હતું.આ કેસમાં નવ ભાગીદારો પાસેથી 50 કરોડ રૂપિયાની ખંડણી માગવામાં આવી હોવાની વિગતો સામે આવી હતી.બંને ઘટનાઓમાં બિશ્નોઈ ગેંગ સાથેના કથિત સંબંધોની તપાસ કરવામાં આવી હતી.
18 ઓક્ટોબર, 2026ના રોજ જુહુ વિસ્તારમાં ટાઇગર શ્રોફની કારને નિશાન બનાવીને ફાયરિંગ કરવામાં આવ્યું હતું.આ ઘટનામાં સાત રાઉન્ડ ફાયરિંગ થયાની વિગતો સામે આવી હતી.કેસની તપાસ દરમિયાન અનેક આરોપીઓની ધરપકડ કરવામાં આવી છે અને અન્ય સંડોવાયેલા લોકોની ભૂમિકાની તપાસ ચાલુ છે.સલમાન ખાન ઉપરાંત રણવીર સિંહ,આમિર ખાન,આયુષ શર્મા,મુનવ્વર ફારુકી અને દિશા પટની સહિતની હસ્તીઓને મળેલી ધમકીઓના સંદર્ભમાં પણ બિશ્નોઈ ગેંગનું નામ ચર્ચામાં આવ્યું છે.કોમેડિયન કપિલ શર્માના કેફે પર ફાયરિંગ અને જિશાન સિદ્દીકી સાથે જોડાયેલા મામલાઓમાં પણ ગેંગના કથિત નેટવર્કની તપાસ થઈ છે.ક્રાઇમ બ્રાન્ચ સાથે જોડાયેલા સૂત્રોના જણાવ્યા અનુસાર, પુણેના એક પ્રભાવશાળી નેતા પણ ગેંગના સંભવિત નિશાન પર હોવાની માહિતી તપાસમાં સામે આવી છે.જોકે, આ નેતાની ઓળખ જાહેર કરવામાં આવી નથી.
મહારાષ્ટ્રના અકોલા જિલ્લાના અકોટનો રહેવાસી શુભમ લોણકર હાલમાં વોન્ટેડ હોવાનું જણાવવામાં આવે છે.તેના પર બિશ્નોઈ ગેંગ માટે મહારાષ્ટ્રમાં સંપર્કો ઊભા કરવા,ખંડણીના કિસ્સાઓમાં સંડોવણી અને વિવિધ ફાયરિંગની ઘટનાઓનાં કાવતરાંમાં ભૂમિકા ભજવવાના આરોપો છે.બાબા સિદ્દીકી હત્યા કેસ તથા ફિલ્મી હસ્તીઓને નિશાન બનાવવાના કેટલાક પ્રકરણોમાં પણ તેનું નામ સામે આવ્યું છે.મુંબઈ અને પુણેમાં સતત સામે આવતા ફાયરિંગ તથા ખંડણીના કેસોએ સંગઠિત ગુનાખોરી સામેની પોલીસ કાર્યવાહીનો પડકાર વધાર્યો છે.ગેંગ સાથે જોડાયેલા આરોપીઓની ધરપકડની સાથે તેના નાણાકીય વ્યવહારો,સ્થાનિક સંપર્કો અને વિદેશમાં બેઠેલા કથિત હેન્ડલરો સુધી પહોંચવા માટે તપાસ એજન્સીઓ પ્રયાસ કરી રહી છે.મહારાષ્ટ્રમાં ગેંગના નેટવર્કને તોડવા માટે આ તમામ કડીઓની તપાસ મહત્ત્વપૂર્ણ બની છે.
