અમદાવાદ : અસલાલીના ગોડાઉનમાંથી રૂ.30 લાખના દારૂના જથ્થો પકડાયા બાદ દારૂનો જથ્થો મોકલવામાં મદદ કરનાર અશોક બિશ્નોઈ નામના આરોપીને પોલીસે રાજસ્થાન જઈ ફિલ્મી ઢબે પકડી પાડ્યો હતો.આરોપીને પકડવા માટે પોલીસની જીપ તેના ગામમાં પહોંચી હોવાની જાણ થતાં આરોપી ખુલ્લા ખેતરમાં ભાગી ગયો હતો.જેથી પોલીસે ખેતરોમાં આરોપીનો પીછો કરી પકડી પાડ્યો હતો.પકડાયેલો આરોપી પ્રોહિબિશનના 8 જેટલા ગુનામાં લાંબા સમયથી નાસતો ફરતો હોવાનું પણ તપાસમાં સામે આવ્યું છે.
પ્રાપ્ત માહિતી અનુસાર,જિલ્લા પોલીસ વડા વિરેન્દ્રસિંહ યાદવે દારૂબંધીનો કડક અમલ કરવા માટે સુચના આપી હતી.જેના પગલે 23 જૂનના રોજ અસલાલી ગોડાઉન વિસ્તારમાંથી રૂ.30 લાખની કિંમતનો દારૂનો જથ્થો અસલાલી પોલીસે પકડી પાડ્યો હતો.આ ગુનામાં પોલીસ દ્વારા ચાર આરોપીઓની ધરપકડ પણ કરવામાં આવી હતી.ત્યારબાદ તપાસ દરમિયાન આ દારૂનો જથ્થો ગોવા ખાતેથી મોકલવામાં આરોપી અશોક બિશ્નોઈ(રહે.રાજસ્થાન)એ મદદગારી કરી હોવાનું સામે આવ્યું હતું.આ ઉપરાંત ગોવા ખાતેથી દારૂનો જથ્થો કોણે મોકલ્યો છે તે બાબતે અશોક બિશ્નોઈ જાણતો હોવાથી તેને પકડવા માટે પોલીસ દ્વારા ચક્રો ગતિમાન કરવામાં આવ્યા હતા.
અશોક બિશ્નોઈ રાજ્યના અલગ અલગ પોલીસ મથકમાં ઘણા બધા ગુનાઓમાં લાંબા સમયથી નાસતો ફરતો હોય તેમજ માત્ર વોટ્સએપ કોલનો જ ઉપયોગ કરતો હતો અને રાજસ્થાન અને ગોવામાં અલગ અલગ જગ્યાએ રહેતો હોવાથી તેને પકડવો મુશ્કેલ બન્યો હતો.જેથી અસલાલી પોલીસની ટીમ દ્વારા તેને પકડવા માટે ખાસ એક્શન પ્લાન બનાવ્યો હતો.
અસલાલી પોલીસ દ્વારા આરોપીને પકડવા માટે અલગ અલગ ટીમો બનાવી તપાસ શરૂ કરવામાં આવી હતી.દરમિયના પોલીસની ટીમને બાતમી મળી હતી કે આરોપી પોતાના વતન રાજસ્થાનના ઝાલોર જિલ્લાના સાંગવડા ખાતે છે,જેથી તેને પકડવા માટે ટીમ રાજસ્થાન પહોંચી હતી.જોકે,પોલીસ ત્યાં આવી હોવાની જાણ થતાં આરોપી ઘરની પાછળ ખુલ્લા ખેતરમાં ભાગવા લાગ્યો હતો.જેથી પોલીસની ટીમે તેનો પીછો કરી અશોક બિશ્નોઈ(ઉ.વ.28)ને પકડી પાડ્યો હતો.
અસલાલી પોલીસ દ્વારા આરોપીને અમદાવાદ ખાતે લાવી વધુ પુછપરછ કરતા તેણે જુદાજુદા 8 પોલીસ મથકમાં પ્રોહિબિશનના ગુના કર્યા હોવાની કબૂલાત કરી હતી.જેમાં અસલાલીમાં 2018માં એક ગુનો નોંધાયો હતો.ઉપરાંત કરજણ,કલોલ,આણંદ ટાઉન તથા માંજલપુર પોલીસ મથકમાં ગુના નોંધાયા હોવાનું કબૂલ્યું હતું.આમ,અસલાલી પોલીસે પ્રોહિબિશનના ગુનામાં વોન્ટેડ આરોપીને રાજસ્થાન ખાતેથી પકડી પાડ્યો હતો.
