પ્રથમ સત્રની પરીક્ષા 1લી ઓક્ટોબરથી 10મી ઓક્ટોબર સુધી અને બીજા સત્રની પરીક્ષાઓ 15મી માર્ચથી 31મી માર્ચ 2021 સુધીમાં પૂર્ણ કરવાની રહેશે.
સુરત
રાજ્યના શિક્ષણ વિભાગે ધોરણ 1થી 12માં સીબીએસસી પેટર્ન મુજબના ફેરફેર અનુસારનું વર્ષ 2020-21નું શૈક્ષણિક કેલેન્ડર જાહેર કર્યું છે જેમાં આગામી નવા શૈક્ષણિક સત્રથી શાળાઓમાં કુલ 230 દિવસ શૈક્ષણિક કાર્ય ચાલશે, જયારે 21 દિવસ પરીક્ષામાં પસાર થશે.
વેકેશનની વિગત જોઈએ તો નવા શૈક્ષણિક કેલેન્ડર મુજબ વિદ્યાર્થીઓને તા. 4થી મેથી 7મી જૂન સુધીનું 35 દિવસનું ઉનાળુ વેકેશન તથા તા. 12મી નવેમ્બરથી તા. 2જી ડિસેમ્બર 2020 સુધીનું દિવાળી વેકેશન રહેશે. ઉપરાંત શાળાઓમાં વર્ષ દરમિયાન કુલ 54 જાહેર રજાઓ આપવામાં આવનાર છે. જેમાં પ્રથમ સત્રમાં 26 દિવસની અને બીજા સત્રમાં 28 દિવસની જાહેર રજાનો સમાવેશ થાય છે. શાળાઓમાં સત્રાંત પરીક્ષાઓ તા. 1લી ઓક્ટોબરથી તા. 10મી ઓક્ટોબર 2020 સુધીમાં પૂર્ણ કરવાની રહેશે. આમ ચાર માસનું પ્રથમ સત્ર રહેશે. ઉલ્લેખનીય છે કે નવરાત્રી પહેલાં પ્રથમ સત્રની પરીક્ષાઓ પૂર્ણ થઈ જશે. આ વરસે નવરાત્રીનો પ્રારંભ તા. 17મી ઓક્ટોબરને શનિવારથી થાય છે અને 25મી ઓક્ટોબરને રવિવારે દશેરા છે. જ્યારે બીજા સત્રની પરીક્ષાઓ તા.15મી માર્ચથી 31મી માર્ચ 2021 સુધીમાં પૂર્ણ કરવાની રહેશે.
આમ પ્રથમ સત્રમાં 113 દિવસ શૈક્ષણિક કાર્ય ચાલશે, જ્યારે 26 દિવસો જાહેર રજાના તથા 35 દિવસો ઉનાળા વેકેશનના રહેશે. બીજા સત્રમાં 117 દિવસ શિક્ષણકાર્ય ચાલશે, આ સત્રમાં 28 દિવસો જાહેર રજાના તથા 21 દિવસનું દિવાળી વેકેશન રહેશે.
અત્રે ઉલ્લેખનીય છે કે રાઈટ ટુ એજ્યુકેશન એક્ટ 2009ના નિયમોની જોગવાઈ ધોરણ 1થી 5માં વર્ષ દરમિયાન કુલ 200 દિવસ શિક્ષણકાર્ય ચાલવું જોઈએ જ્યારે ધોરણ 9થી 12માં વર્ષ દરમિયાન કુલ 220 દિવસ શિક્ષણકાર્ય ચાલવું જોઈએ. જેથી રાજયના 1 કરોડ 14 લાખ વિદ્યાર્થીઓને ધ્યાનમાં લઈને આરટીઈના નિયમ મુજબ જ રાજ્ય શિક્ષણ વિભાગ દ્વારા વર્ષ દરમિયાનનું શૈક્ષણિક કેલેન્ડર તૈયાર કરવામાં આવ્યું છે જોકે તેમાં ચારેક દિવસની ભૂલ રહ્યાનું ધ્યાન પર આવતા આગામી દિવસોમાં નજીવા ફેરફારની શક્યતા છે.
