મહુવા : મહુવા તાલુકા પંચાયતમાં મહુવરિયા બેઠકની પેટા ચૂંટણીમાં આમ આદમી પાર્ટીએ કરેલી ઉમેદવારી ભારતીય જનતા પાર્ટીને ફળી હતી.ભાજપ વિરોધી મત કોંગ્રેસ અને આપના ઉમેદવારોમાં વહેંચાય જતાં ભાજપના ઉમેદવારનો 751 મતોથી વિજય થયો હતો.આ બેઠક પહેલા કોંગ્રેસ પાસે હતી જે ભાજપે આંચકી લેતા હવે તાલુકા પંચાયતમાં ભાજપની બેઠક વધીને 15 થઈ છે જ્યારે કોંગ્રેસની માત્ર પાંચ બેઠક બચી છે.
ગત રવિવારના રોજ મહુવા તાલુકા પંચાયતની ખાલી પડેલી મહુવરિયા બેઠક માટે પેટા ચૂંટણી યોજાઇ હતી.કુલ સાત મતદાન કેન્દ્રો પર 75.77 ટકા મતદાન થયું હતું. દરમ્યાન મંગળવારના રોજ મહુવા મામલતદાર કચેરી ખાતે ચૂંટણી અધિકારીની ઉપસ્થિતિમાં મતપત્રોની ગણતરી કરવામાં આવી હતી. જેમાં શરૂઆતથી જ ભારતીય જનતા પાર્ટીના ઉમેદવાર દિનેશ રમણ ચૌધરી આગળ ચાલતા ભાજપની જીત નિશ્ચિત જણાય હતી.આ બેઠક કોંગ્રેસી સભ્ય પરમેશભાઈ ચૌધરીનું કોરોનાથી નિધન થતાં ખાલી પડી હતી.જેના પર રવિવારના રોજ મતદાન થયું હતું.મંગળવારના રોજ યોજાયેલી ચૂંટણીમાં ભાજપના ઉમેદવાર દિનેશ રમણ ચૌધરીને સૌથી વધુ 2267 મતો મળતા તેમને વિજેતા જાહેર કરવામાં આવ્યા હતા.આ સાથે મહુવા તાલુકા પંચાયતની કુલ 20 બેઠકો પૈકી ભાજપની સીટ વધીને 15 થઈ હતી.જ્યારે એક બેઠકનો ઘટાડો થતાં કોંગ્રેસ પાસે હવે માત્ર 5 બેઠક રહી છે.
ભાજપ વિરોધી મતોના વિભાજને જ ભાજપને જીત અપાવી
સમગ્ર પેટા ચૂંટણીનું વિશ્લેષણ કરવામાં આવે તો આમ આદમી પાર્ટીની એન્ટ્રીથી કોંગ્રેસને નુકસાન વેઠવાનો વાળો આવ્યો હતો. ભાજપે આ બેઠક જીતવા માટે સુરત જિલ્લા પ્રમુખ થી લઈ ધારાસભ્યો, જિલ્લા સંગઠન અને આજુબાજુના તાલુકાનાં કાર્યકરોની મોટી ફોજ ઉતારી દીધી હતી.જો કે તેમ છતાં ભાજપ વિરોધ મત વધુ જોવા મળ્યા હતા.કોંગ્રેસ અને આમ આદમી પાર્ટીને કુલ 2372 અને નોટાના 72 મળી કુલ 2444 મતો ભાજપ વિરોધી જોવા મળ્યા હતા.જો આમ આદમી પાર્ટી ન હોત તો કોંગ્રેસની જીત નિશ્ચિત હતી. બીજી તરફ કોંગ્રેસના ઉમેદવાર સાથે તેના સમર્થક અને ટેકેદાર સિવાય કોઈ મોટા નેતા પ્રચાર માટે આવ્યા ન હતા જ્યારે ભાજપે આખી ફોજ ઉતારી દીધી હતી.ભાજપ વિરોધી મતોનું કોંગ્રેસ અને આમ આદમી પાર્ટીમાં વિભાજન થતાં ભાજપની જીત થઈ હતી.જો આગામી વિધાન સભા ચૂંટણીમાં આ સમીકરણ ચાલશે તો ભારતીય જનતા પાર્ટી માટે મુશ્કેલી સર્જાય શકે એમ છે.
ઉમેદવારોને મળેલા મતો
આશિષ ગમન ચૌધરી – આમ આદમી પાર્ટી – 865
દિનેશ રમણ ચૌધરી – ભારતીય જનતા પાર્ટી – 2267
મણિલાલ વાલાભાઈ ચૌધરી – કોંગ્રેસ – 1516
નોટા – 72
કુલ માન્ય મતો – 4720
