મુંબઈ, તા.૨૭ : રાશિદ ખાને જાન્સેનની બોલિંગમાં છેલ્લા ચારમાંથી ત્રણ બોલ પર સિક્સર ફટકારતાં ગુજરાત ટાઈટન્સને સનરાઈઝર્સ હૈદરાબાદ સામે પાંચ વિકેટથી દિલધડક વિજય અપાવ્યો હતો.તેવટિયા (૨૧ બોલમાં ૪૦* રન) અને રાશિદ (૧૧ બોલમાં ૩૧* ) વચ્ચે છેલ્લી ચાર ઓવરમાં અણનમ ૫૯ રનની વિજયી ભાગીદારી નોંધાઈ હતી.૧૯૬ના ટાર્ગેટને ગુજરાતે પાંચ વિકેટે પાર પાડયો હતો.આખરી ઓવરમાં ગુજરાતને જીતવા ૨૨ રનની જરુર હતી.જ્યારે તેવટિયાએ જાન્સેનના પહેલા બોલે છગ્ગો ફટકાર્યો હતો.જે પછી એક રન લીધો હતો. રાશિદે સિક્સર ફટકારી તે પછીનો બોલ ડોટ રહ્યો હતો.રાશિદે આખરી બે બોલ પર બે સિક્સર ફટકારીને ટીમને જીતાડી હતી.ગુજરાતની ટીમે સાતમી જીત સાથે પ્લે ઓફમાં લગભગ સ્થાન નિશ્ચિત કરી લીધું હતુ.સહાએ ટીમને આક્રમક શરૃઆત અપાવતા ૩૮ બોલમાં ૬૮ રન ફટકાર્યા હતા.ઉમરાન મલીકે પાંચ વિકેટ ઝડપી હતી.
અગાઉ અભિષેક શર્માના ૪૨ બોલમાં ૬૫ અને માર્કરામના ૪૦ બોલમાં ૫૬ રનની મદદથી સનરાઈઝર્સ હૈદરાબાદે ગુજરાત ટાઈટન્સ સામે ઝંઝાવાતી બેટીંગ કરતાં છ વિકેટે ૧૯૫ રનનો જંગી સ્કોર ખડો કર્યો હતો.શશાંક સિંઘે હૈદરાબાદની ઈનિંગની આખરી ઓવરમાં ફર્ગ્યુસનની બોલિંગમાં સતત ત્રણ સિક્સર ફટકારી હતી.આખરી ઓવરમાં હૈદરાબાદે કુલ ૨૫ રન લીધા હતા.ફર્ગ્યુસન સૌથી ખર્ચાળ સાબિત થયો હતો.તેણે ૪ ઓવરમાં ૫૨ રન આપ્યા હતા અને એક પણ વિકેટ ઝડપી નહતી.શમીએ ૩૯ રનમાં ત્રણ વિકેટ ઝડપી હતી.ગુજરાત ટાઈટન્સના કેપ્ટન હાર્દિક પંડયાએ ટોસ જીતીને પ્રથમ હૈદરાબાદને બેટીંગમાં ઉતાર્યું હતુ.મોહમ્મદ શમીએ ૮ બોલમાં ૧ ચોગ્ગા સાથે પાંચ રને રમતમાં વિલિયમસનને આઉટ કર્યો હતો.અભિષેક શર્માએ ૪૨ બોલમાં ૬ ચોગ્ગા અને ૩ છગ્ગા સાથે ૬૫ રન નોંધાવ્યા હતા.ત્રિપાઠી ૧૬ રને શમીનો બીજો શિકાર બન્યો હતો.
અભિષેક અને માર્કરામની જોડીએ ત્રીજી વિકેટમાં ૬૧ બોલમાં ૯૬ રનની ભાગીદારી કરતાં ખળભળાટ મચાવ્યો હતો.માર્કરામે ૪૦ બોલમાં ૩ છગ્ગા અને બે ચોગ્ગા સાથે ૫૬ રન ફટકાર્યા હતા.જોસેફે અભિષેકને બોલ્ડ કર્યો હતો.ત્યાર બાદ પૂરણ, માર્કરામ અને સુંદરે વિકેટ ગુમાવી હતી.આખરી ઓવર ફર્ગ્યુસને નાંખી હતી.જેમાં પહેલા જ બોલ પર જાન્સેને સિક્સર ફટકારી હતી.જે પછી ડોટ બોલ બાદ જાન્સેને એક રન લેતા શશાંક સિંઘ સ્ટ્રાઈક પર આવ્યો હતો.તેણે છેલ્લા ત્રણ બોલમાં ત્રણ સિક્સર ફટકારતાં ટીમના સ્કોરને ૬ વિકેટે ૧૯૫ સુધી પહોંચાડી હતી.ફર્ગ્યુસને ૪ ઓવરમાં ૫૨ રન આપ્યા હતા.શમીએ ૩૯ રનમાં ત્રણ વિકેટ ઝડપી હતી.રાશિદે ૪ ઓવરમાં ૪૫ રન આપ્યા હતા.
