નવી દિલ્હી, તા. 02 મે 2022, સોમવાર : Qantas એરલાઈને સોમવારે વિશ્વની સૌથી લાંબી નોન-સ્ટોપ કોમર્શિયલ ફ્લાઈટ શરૂ કરવાની જાહેરાત કરી છે.આ સેવા વર્ષ 2025ના અંત સુધીમાં શરૂ થશે.આ હવાઈ સફર સિડનીથી લંડન સુધીની હશે.જેમાં મુસાફરોએ 19 કલાક પસાર કરવાના રહેશે. લાંબા અંતરના કારણે તેમાં ઘણી વિશેષ સુવિધાઓ પણ ઉપલબ્ધ કરવામાં આવશે.5 વર્ષના આયોજન બાદ, એરલાઈને કહ્યું હતું કે, તેણે આ ‘પ્રોજેક્ટ સનરાઈઝ’ માટે 12 એરબસ A350-1000 એરક્રાફ્ટનો ઓર્ડર આપ્યો છે.આ ફ્લાઈટ્સ લંડન અને ન્યૂયોર્ક માટે ઉપલબ્ધ કરવામાં આવશે.વર્ષ 2025ના અંત સુધીમાં સિડનીથી નોન-સ્ટોપ ફ્લાઈટ્સ શરૂ થશે અને ભવિષ્યમાં મેલબોર્નનો સમાવેશ કરવાનું આયોજન છે.ક્વાન્ટાસના પ્રમુખ એલન જોયસે કહ્યું હતુ કે, નવા પ્રકારના એરક્રાફ્ટ નવી વસ્તુઓ શક્ય બનાવે છે.A350 અને પ્રોજેક્ટ સનરાઈઝ કોઈપણ શહેરને ઓસ્ટ્રેલિયાથી માત્ર એક ફ્લાઈટ દૂર કરશે.
Qantas એ 2019માં લાંબા અંતરની ફ્લાઈટ્સ માટે લંડન-સિડની ટ્રેક પર ફ્લાઈટ્સનું પરીક્ષણ શરૂ કર્યું છે.આ 17,800 કિમી (11,030 માઈલ) માર્ગને કવર કરવામાં 19 કલાક અને 19 મિનિટનો સમય લાગ્યો હતો.તે જ સમયે ન્યુયોર્ક-સિડની પરીક્ષણ ફ્લાઈટને 16,200 કિલોમીટર (10,200 માઈલ)નું અંતર કાપવામાં 19 કલાકથી થોડો વધુ સમય લાગ્યો હતો. Qantas પહેલેથી જ 14,498 કિમીની પર્થ-લંડન મુસાફરી ચલાવે છે જે 17 કલાકનો સમય લે છે.કંપનીના જણાવ્યા અનુસાર, કેબીનને ખાસ કરીને લાંબા અંતરની ફ્લાઈટ માટે મહત્તમ આરામ માટે ડિઝાઈન કરવામાં આવી છેનવા A350 એરક્રાફ્ટને 238 મુસાફરો માટે ગોઠવવામાં આવશે.જેમાં ફર્સ્ટ ક્લાસ સ્યુટમાં અલગ બેડ, રિક્લાઈનિંગ ચેર અને કબાટ આપવામાં આવશે.
