ભાજપની ટિકિટ વહેંચણી બાદ મહેસાણા જિલ્લામાં ડખા શરૂ થયા છે.મોદીની હોમ ટાઉન અને રાજકારણની લેબોરેટરી ગણાતા મહેસાણામાં નીતિન પટેલની ટિકિટ કપાયા પહેલાં કાકાએ 3 સીટો સાચવી લીધી જેમાં વિજાપુર બેઠક પર રમણભાઈ,કડી બેઠક પર કરશન સોલંકી અને મહેસાણામાં મુકેશ પટેલને ટિકિટ અપાવી તેઓ તો સાઈડલાઈન થઈ ગયા પણ અન્ય સીટો પર હવે નારાજગી બહાર આવી છે.ઋષિકેશ પટેલ ગત વિધાનસભાની ચૂંટણીમાં નોટા કરતાં ઓછા મતથી જીત્યા હતા.આ ચૂંટણી પહેલાં ઋષિકેશ પટેલ સામે ચૌધરી સમાજની નારાજગી અને વિપુલ ચૌધરી ખુદ આપમાંથી ઉભા રહે તેવી શક્યતા વચ્ચે આ વખતે ઋષિકેશ પટેલને જીત માટે લોઢાના ચણા ચાવવા સમાન છે ત્યાં ભાજપમાં અંદરો અંદર ડખા શરૂ થયા છે. 84 કડવા પાટીદાર સમાજના પ્રમુખ અને પૂર્વ જિલ્લા ભાજપ પ્રમુખ જશુભાઈ પટેલે વિસનગરમાંથી અપક્ષ ઉમેદવારી કરવાની જાહેરાત કરી આજે રાતે બેઠક બોલાવી છે.આમ વિસનગર બેઠક પર ભાજપમાં જ તડાં પડ્યાં છે.જો વિસનગરમાં જશુભાઈએ અપક્ષ ઉમેદવારી કરી તો ઋષિકેશ પટેલ માટે સમસ્યા વધુ વકરે તેવી સંભાવના છે.ઋષિકેશે સીટ બદલીને ઊંઝા માટે ટિકિટ માગી હતી પણ આયાતી ઉમેદવારના વિરોધને પગલે ઋષિકેશ પટેલને વિસનગરની જ ટિકિટ મળી છે.
રજની પટેલ રઝળી પડ્યા,મોદી માટે બહુચરાજીમાં જંગી સભાનું આયોજન ના ફળ્યું
બહુચરાજીમાં પણ મોદી માટે જંગી સભા યોજી લાખોનો ખર્ચ કરી લેનાર અને હાલના ભાજપના ઉમેદવાર રજની પટેલને બહુચરાજીની ટિકિટ મળે એમ પાક્કી હતી.મોદીની જંગી સભાનું સફળતાપૂર્વક આયોજન પછી બધાને એમ જ હતું કે રજની પટેલે પોતાની ટીકીટ પાકી કરી લીધે.એમાંય નીતિન પટેલે ચૂંટણી ન લડવાની જાહેરાત કરતાં અને રજની પટેલની દાવેદારી સૌથી મજબૂત હોવા છતાં દિલ્હી હાઈકમાન્ડે તેમનું પત્તું જ કાપી નાખ્યું છે.રજની પટેલ હાલમાં સંગઠનની કામગીરી કરી રહ્યાં છે. રજની પટેલે ઉમેદવારીની જાહેરાત થયા પહેલાં જ સોશિયલ મીડિયામાં તૈયારી પણ કરી લીધી હતી પણ ભાજપે બહાર પાડેલા લિસ્ટમાં આખરી તબક્કે ક્યાંય નામ જ ના દેખાયું.પરંતુ જે જગ્યાએ પોતાનું નામ હોવું જોઈએ એ સીટ પરથી સુખાજી ઠાકોરનું નામ બહાર આવ્યું છે.બહુચરાજી સીટ પર પટેલો અને ઠાકોરોનું વર્ચસ્વ છે.ગત વિધાનસભામાં આ બેઠક પર ઠાકોર ઉમેદવાર કોંગ્રેસમાંથી વિજેતા બનતાં ભાજપે આ વખતે ઠાકોર સમાજ પર કળશ ઢોળ્યો છે.આ મામલે સ્થાનિકમાં જબરદસ્ત વિરોધ ચાલી રહ્યો છે.ગતરોજ વિધાનસભા સીટના જોટાણા,બેચરાજી અને મહેસાણાના કાર્યકરોએ કમલમમાં વિરોધ નોંધાવ્યો હતો પણ હવે ટિકિટ ચેન્જ થાય તેવી સંભાવના ઘણી ઓછી છે.એટલે રજની પટેલના ધારાસભ્ય બની મહેસાણામાંથી મંત્રી બનવાના અરમાનો ભાંગીને ભુક્કો થઈ ગયા છે.
સ્થાનિક કાર્યકરોના વિરોધને નજર અંદાજ
નીતિન પટેલે રમણભાઈ પટેલની ટીકિટ ભલે પાક્કી કરાવી લીધી પણ રમણભાઈ પટેલ સામે સ્થાનિક કાર્યકરોના વિરોધને નજર અંદાજ કરાતાં આ મામલો કમલમ સુધી પહોંચે તો નવાઈ નહીં,સ્થાનિક ધારાસભ્ય સામે ભાજપના કાર્યકરોએ અગાઉ પણ મીટિંગો કરી વિરોધ નોંધાવ્યો હતો પણ જેમને જીતાડવાની જવાબદારી છે એવા સ્થાનિકોની અવગણના કરી ભાજપે રમણભાઈ પટેલને ટિકિટ આપતાં અહીં વિરોધ વધી રહ્યો છે.આવતીકાલે આ મામલે ગાંધીનગર સુધી રજૂઆતો કરવા એકઠા થવાના મેસેજો વાયરલ થયા છે.આમ ભાજપના ઉમેદવાર સામે સ્થાનિકોનો વિરોધ રમણભાઈ પટેલને ભારે પડી શકે તેમ છે.
એકમાત્ર ખેરાલુ સીટના ઉમેદવાર જાહેર થવાના બાકી
વિજાપુરની સીટ પરથી કોંગ્રેસમાંથી સી. જે. ચાવડાએ દાવેદારી કરી છે.તો આપે પણ પટેલ ઉમેદવાર ઉભો રાખી આ બેઠક પર રસાકસી વધારી છે.અહીં ભાજપના ઉમેદવાર સામે વિરોધ વધ્યો તો ચાવડા માટે આ લાભની તક છે કારણ કે ચાવડા ગાંધીનગરની સીટ છોડીને વિજાપુર સુધી લાંબા થયા છે.મહેસાણામાં તમામ સીટોમાં એકમાત્ર ખેરાલુ સીટના ઉમેદવાર જાહેર થવાના બાકી છે.જે સીટ માટે કોંગ્રેસ છોડીને ભાજપમાં જોડાયેલા જયરાજસિંહ પરમારે છેક સુધી છેડા અડાડ્યા પણ ઠાકોર સમાજના વર્ચસ્વ ધરાવતી આ સીટ પર અજમલજી ઠાકોર અને ભરત સિંહ ડાભીના નજીકના વ્યક્તિ વચ્ચે રસાકસી હોવાથી ભાજપે આખરે આ સીટની જાહેરાત ટાળી હતી.
