દિયોદર : ગુજરાત વિધાનસભા ચૂંટણી નજીક આવી રહી છે,ત્યારે ભાજપના પ્રદેશ અધ્યક્ષ સીઆર પાટીલે આજે દિયોદર ખાતે જાહેર સભાને સંબોધન કર્યું હતુ.જેમાં તેમણે કોંગ્રેસ પર આકરા પ્રહાર કરવા સાથે કેન્દ્ર અને રાજ્યની ભાજપ સરકારના કામો ગણાવ્યા હતા.
સીઆર પાટીલે જણાવ્યું કે, ભાજપમાં 182 ઉમેદવારોમાં કોઇ રાજકીય લાગવગ નથી.આ ભાજપની પંરપરા છે.ભાજપમાં કાર્યકરોનો ગોડફાધર છે નરેન્દ્ર મોદી.ભારતીય જનતા પાર્ટી જ એક એવી પાર્ટી છે કે, દેશના વિકાસ માટે આ પાર્ટીની જરૂર છે.
કોંગ્રેસ મા, દીકરી, દીકરો અને જમાઇ એમ 4 વ્યક્તિની પાર્ટી છે.મહારાષ્ટ્રમાં જઇને બાપ–દીકરાની પાર્ટી,એન.સી.પી માં જોવો તો બાપ-દીકરીની પાર્ટી છે.યુ.પીમાં જોવો તો ત્યા પણ પરિવારની પાર્ટી છે. બંગાળમાં પણ મમતા દીદી અને તેના ભત્રીજાની પાર્ટી છે.આ દરેક પાર્ટી પરિવાર અને પ્રદેશની પાર્ટી રહી છે.આવી પાર્ટીઓ માત્ર તેમના પરિવારનો જ વિકાસ કરી શકે છે.આખા દેશ અને સમાજને આગળ લઇ જવાનો પ્રયત્ન કરે તો તે માત્ર ભાજપ છે.છાશવારે ભારત સામે આંખ ઉંચી કરી છમકલા કરવા વાળો પાડોશી દેશ પાકિસ્તાનને તેના ઘરે જઇ જવાબ આપવાનું કામ નરેન્દ્ર મોદીએ કર્યુ અને હવે દેશમાં આંતકવાદીઓની ભારત દેશમાં ઘુસણખોરી કરી આવા છમકલા કરવાની હિમંત નથી થતી.ચાઇનાનું સૈન્ય આપણી ધરતી પર આવી દબાણ કરતા,પરંતુ મોદી આવ્યા પછી ચાઇનાની હિમંત નથી કે દેશની સરહદ સામે જોવે.
વધુમાં પાટીલે જણાવ્યું કે, આ વખતે દિયોદર વિધાનસભાનો ઉમેદવાર જંગી બહુમતીથી જીતવાનો છે.આ જિલ્લામાં બધા જ મહાનુભાવો છે અને આ તમામ મહાનુભાવોનો સહકાર બનાસકાંઠા જિલ્લાના ઉમેદવારોને મળે એટલે વિરોધપક્ષની તાકાત નથી કે ભાજપાના ઉમેદવારને હરાવી શકે.આ વખતની ચૂંટણીમાં કોંગ્રેસના કામ બોલે છે ના સ્લોગન સાથે કોંગ્રેસ આવી છે,ત્યારે આ લખનાર પેઇન્ટર પણ ભારે હૈયે કહે છે કે કોંગેસના કામ નહીં પણ ભ્રષ્ટાચાર બોલે છે
PM મોદી અને ગૃહમંત્રી અમિત શાહની વિશ્વમાં જોડી નંબર ૧ તરીકે પ્રસિદ્ધ થઇ છે.આ જોડી અખંડ રહે તે માટે ગુજરાતના સપૂત એવા PM મોદીના સ્વપ્નને સાકાર કરવા તેમજ મુખ્યમંત્રી ભૂપેન્દ્ર પટેલના હાથ મજબૂત કરવા માટે બનાસકાંઠા જિલ્લાના તમામ કમળો સૌથી વધુ લીડ સાથે ગુજરાત વિધાનસભામાં મોકલી આપી ગુજરાતના તમામ રેકોર્ડ તોડવા અપીલ કરી હતી.
