સ્ટેચ્યુ ઓફ લિબર્ટીથી ત્રણ ગણો મોટો લઘુગ્રહ પૃથ્વીની નજીક આવી રહ્યો છે

• નાસાએ 2017 AE3 ધરતી નજીકથી પસાર થવાની ચેતવણી આપી

વોશિંગ્ટનઅમેરિકન સ્પેસ એજન્સી નાસાએ ચેતવણી આપી છે કે એક વિશાળ લઘુગ્રહ બુધવારે ધરતીની બિલકુલ નજીકથી પસાર થશે.નાસાના વૈજ્ઞાનિકો આ એસ્ટરોઈડ પર નજર રાખી રહ્યા છે.વૈજ્ઞાનિકોએ આ લઘુગ્રહનું નામ 2017 AE3 રાખ્યું છે અને તે 75 હજાર કિ.મી.પ્રતિકલાકની ઝડપથી પૃથ્વીની કક્ષા તરફ આવી રહ્યો છે.આ લઘુગ્રહ 353 મીટર પહોળો છે અને તે પૃથ્વીથી 19 લાખ માઈલ (30.57 લાખ કિ.મી) નજીક આવે તેવી સંભાવના છે.

ધ સનના એક અહેવાલ મુજબ આ લઘુગ્રહ અમેરિકાના સ્ટેચ્યુ ઓફ લિબર્ટીથી ત્રણ ગણો મોટો છે.આ લઘુગ્રહ ભલે પૃથ્વીથી 19 લાખ માઈલના અંતરેથી પસાર થવાનો હોય પરંતુ આ અંતર તેમ છતા ઘણું નજીક હોવાનું માનવામાં આવે છે.નિષ્ણાતોનું માનવું છે કે જો આ લઘુગ્રહ પોતાનો માર્ગ બદલે છે અને તે પૃથ્વી સાથે ટકરાય છે તો તબાહી થવાની શક્યતા છે.એક અંદાજ મુજબ એસ્ટરોઈડ 2017 AE3 કોઈપણ ખતરો ઉભો કર્યા વગર પૃથ્વીની નજીકથી પસાર થશે.

પૃથ્વીની નજીકથી બે એસ્ટરોઈડ પસાર થયા

પૃથ્વીના ઈતિહાસમાં અત્યાર સુધીમાં ફક્ત બે એસ્ટરોઈડ નજીકથી પસાર થયા છે.એક એસ્ટરોઈડ 2020 QG જે દક્ષિણ હિન્દ મહાસાગરની ઉપર ઉક્ત 1,830 માઈલના અંતરથી પસાર થયો હતો.આ લઘુગ્રહ એટલો નાનો હતો કે તેનાથી પૃથ્વીને કોઈ ખતરો નહતો.બીજો લઘુગ્રહ 2020 VT4 હતો જે ગત વર્ષે નવેમ્બરમાં પૃથ્વીથી બિલકુલ નજીકના અંતરે પસાર થયો હતો.આ એસ્ટરોઈડ નુકશાન પહોંચાડવા માટે કદમાં ઘણા નાના હતા.જો કે વૈજ્ઞાનિકો મહાકાય એસ્ટોરોઈડના ખતરા સામે તૈયારીઓ કરી રહ્યા છે.

શું હોય છે એસ્ટરોઈડ?

એસ્ટરોઈડ એ ખડકો હોય છે જે કોઈ ગ્રહની જેમ સૂર્યની આસપાસ ફરે છે પરંતુ તે સૌર મંડળ (પ્લેનેટરી સિસ્ટમ)ના ગ્રહો કરતા ઘણા નાના હોય છે.આપણા સૌર મંડળમાં મોટાભાગના લઘુગ્રહ મંગળ અને ગુરુ (માર્સ અને જ્યુપીટર)ની કક્ષામાં એસ્ટરોઈડ બેલ્ટમાં રહેલા છે.આ ઉપરાંત અન્ય ગ્રહોની કક્ષામાં એસ્ટરોઈડ રહેલા હોય છે જે સૂર્યની ફરતે ચક્કર કાપે છે.સાડા ચાર અબજ વર્ષ પૂર્વે જ્યારે આપણું સૌર મંડળ બન્યું નહતું ત્યારે ગેસ અને ધૂળના આ વાદળો જે કોઈ ગ્રહનો આકાર ના લઈ શક્યા તે પાછળ રહી ગયા અને તે જ અત્યારે ખડકો અર્થાત લઘુગ્રહમાં તબદીલ થઈ ગયા.એટલા માટે જ તેમનો આકાર ગ્રહ જેવો ગોળ નથી.ક્યારેય પણ બે લઘુગ્રહ એક જેવા આકારના પણ નથી જોવા મળતા.

પૃથ્વી સાથે ટકરાઈ શકે તેવા 22 એસ્ટરોઈડ્સ છે

નાસાએ ખતરનાક એસ્ટરોઈડ્સની શ્રેણીમાં 22 લઘુગ્રહને રાખ્યા છે જે પૃથ્વી સાથે સંભવિત ટકરાઈ શકે છે.નાસાના મતે વૈજ્ઞાનિકો હાલમાં બે હાજરથી વધુ એસ્ટરોઈડ પર નજર રાખી રહ્યા છે.જો કે આગામી 100 વર્ષમાં 22 એવા એસ્ટરોઈડ્સ છે જે પૃથ્વી સાથે ટકરાય તેવી સંભાવના છે.