– સી.આર.પાટીલની હાજરીમાં સુરતમાં 200 કાર્યકરો ભાજપમાં જોડાયા
સુરત : વર્ષ 2017માં પણ પાટીદાર અનામત આંદોલનના પગલે સુરત એપિક સેન્ટર બન્યું હતું,સુરત મહાનગરપાલિકાની ચૂંટણીમાં આમ આદમી પાર્ટીને મળેલી સફળતા બાદ વર્ષ 2022માં યોજાનારી વિધાનસભાની ચૂંટણીમાં પણ સુરત એપિક સેન્ટર બની શકે છે તે જોતા આગામી દિવસોમાં મોટા ઉલટ ફેર જોવા મળશે.
સુરત મહાનગરપાલિકાની યોજાયેલી ચૂંટણીમાં પ્રથમ વખત જ 27 બેઠકો સાથે મેદાન મારી જનાર આમ આદમી પાર્ટી તરફથી વર્ષ 2022માં યોજાનારી ગુજરાત વિધાનસભાની ચૂંટણીની તૈયારીઓ શરુ કરી દેવામાં આવી છે.આમ આદમી પાર્ટી દ્વારા પાટીદાર બહુમતી ધરાવતા સુરતના વરાછા,પુણા,કાપોદ્રા,કતારગામ સહિતના વિસ્તારોમાં પકડ મજબૂત કરીને સમગ્ર સૌરાષ્ટ્ર્રમાં માહોલ બનાવવાની તૈયારી કરવામાં આવી રહી છે.ત્યારે સુરતના જાણીતા ઉદ્યોગપતિ મહેશ સવાણીને આપમાં જોડવામાં આવ્યા છે,આવા સંજોગોમાં ભાજપ દ્વારા ત્રણ ટર્મ સુધી ધારાસભ્ય રહેલા પાટીદાર અગ્રણી અને ફાયર બ્રાન્ડ નેતા ધીરુ ગજેરાને આજે 200થી વધુ સક્રિય સભ્યો સાથે ભાજપમાં ઘર વાપસી કરવામાં આવી હતી.
ગુજરાત વિધાનસભાની ચુંટણીમાં પુરી તાકાત સાથે તમામ બેઠકો પરથી ચુંટણી લડવાનો નિર્ણય લેનાર આમ આદમી પાર્ટી દવારા કરવામાં આવ્યો છે.
આપમાં સુરત અને સૌરાષ્ટ્રમાં જાહેર જીવન સાથે સંકળાયેલા લોકોને જોડવામાં આવી રહ્યા છે. જેમાં તાજેતરમાં સુરતમાંથી જાણીતા ઉદ્યોગપતિ મહેશ સવાણીને પણ આપમાં જોડવામાં આવ્યા છે.ત્યારે પાટીદાર સમાજના અને પૂર્વ ધારાસભ્ય ધીરુ ગજેરાની ભાજપમાં ઘર વાપસીનો નિર્ણય ભાજપ મોવડી મંડળનો માસ્ટર સ્ટ્રોક હોવાનું પણ લોકો માની રહ્યા છે.
11મી જૂન 2007ની ઘટના કમનસીબી હતી
જનસંઘથી રાજકીય કારકિર્દી શરુ કરનારા અને સૌરાષ્ટ્રવાસી વિસ્તારોમાં પકડ ધરાવનાર પૂર્વ ધારાસભ્ય ગજેરાએ ભાજપમાં ઘર વાપસી સાથે જણાવ્યું હતું કે 11મી જૂન 2007ના જે ઘટના સુરતના જે.બી.ધારુકાવાળા કોલેજના ગ્રાઉન્ડમાં બની હતી.નરેન્દ્ર મોદીના નેતૃત્વ સામે 2 પૂર્વ મુખ્યમંત્રી,30 ધારાસભ્યો,30 પૂર્વ ધારાસભ્યોએ સામે પાડીને પક્ષમાં ભાગલા પડ્યા હતા.નરેન્દ્ર મોદીના નેતૃત્વ સામે ટક્કર આપવાનો પ્રયાસ કરવામાં આવ્યો હતો. જેમાં અમે નિષ્ફળ ગયા હતા.મોદીએ લોકોનો વિશ્વાસ જીત્યો હતો જયારે અમારી પાસે તેઓ જેવા કોઈ નેતા ન હોવાથી નિષ્ફળ ગયા હતા અને ચૂંટણીઓ હારવાનો વારો આવ્યો હતો.
ઘીરૂભાઈએ ફોર્મની ડીપોઝીટના રૂપિયા 2000 હજુ આપ્યા નથી : સી.આર.પાટીલ
પૂર્વ ધારાસભ્યની ભાજપમાં ઘર વાપસીને આવકારતા ભાજપના પ્રદેશ પ્રમુખ પાટીલ દ્વારા તેઓના જુના દિવસો યાદ કરવામાં આવ્યા હતા.તેઓએ જણાવ્યું હતું કે પ્રથમ વખત ચૂંટણી માટે પાર્ટી તરફથી તેઓને ધીરુભાઈ પાસે ધારાસભાની ચૂંટણી લડવા માટે ફોર્મ ભરવાની જવાબદારી સોંપવામાં આવી હતી. ધીરુભાઈ તરફથી ચૂંટણી લડવાનો ઇન્કાર કરવામાં આવ્યો હતો અને બાદમાં તેઓ માન્યા હતા,તેઓના ફોર્મ સાથેની રૂપિયા 2000ની ડિપોઝીટ પણ મેં ભરી હતી,જે તેઓએ હજી સુધી આપી નથી.
