કોરોનાની મહામારીને કારણે અન્ય વ્યવસાયોની જેમ 2020માં ઓટોમોબાઈલ ક્ષેત્ર પણ પ્રભાવિત થયુ હતું.પરંતુ જુલાઈ મહિનામાં રાજ્યમાં કારના વેચાણમાં ચોંકાવનારો વધારો જોવા મળ્યો હતો.ફેડરેશન ઓફ ઓટોમોબાઈલ ડીલર્સ અસોસિએશનના ડેટા અનુસાર જુલાઈમાં રાજ્યમાં 41,262 કાર વેચાઈ હતી.પાછલા પાંચ વર્ષમાં આ સૌથી મોટો આંકડો છે.અહીં રસપ્રદ બાબત એ છે કે, 70 ટકા કારનું વેચાણ ગુજરાતના ગ્રામ્ય વિસ્તારોમાં નોંધાયું છે.આ જ રીતે ૬૮૬૪૬ ટુ વ્હીલર્સ પણ વેચાયા છે.
ઉલ્લેખનીય છે કે અષાઢી બીજના શુભ દિવસે લોકો વાહન ઘરે લાવવાનું પસંદ કરતા હોય છે.જુલાઈ મહિનો જગન્નાથ રથ યાત્રાનો મહિનો હોવાને કારણે વેચાણમાં 35.17 ટકાનો વધારો જોવા મળ્યો હતો. વર્ષ 2017 પછી આ પહેલીવાર એવુ બન્યું છે કે રાજ્યમાં આટલી મોટી સંખ્યામાં કારનું વેચાણ થયું હોય. નોંધનીય છે કે કોરોના મહામારીને કારણે વર્ષ 2020માં વેચાણમાં ઘટાડો નોંધાયો હતો. પરંતુ હવે ફોર વ્હીલર્સની ખરીદીમાં તેજી આવવાને કારણે ઓટોમોબાઈલ ક્ષેત્રમાં આશા જાગી છે.
જો આ વર્ષની વાત કરવામાં આવે તો જાન્યુઆરી, 2021થી જુલાઈ સુધી સાત મહિનાના સમયગાળા દરમિયાન કુલ 6.63 લાખ કાર વેચાઈ છે.પાછલા પાંચ વર્ષમાં આ પણ એક મોટો આંકડો છે.વર્ષ 2021માં અત્યાર સુધી 1,89,271 કારનું વેચાણ થયું છે. 2017થી અત્યાર સુધીની વાત કરીએ તો, 2018માં વેચાણનો આંકડો 1,93,591 પર પહોંચ્યો હતો.
ઓટોમોબાઈલ ડીલર્સનું કહેવું છે કે, લોકો મહામારીના નુકસાનમાંથી બહાર આવી રહ્યા હોય તેમ લાગી રહ્યું છે.આ સિવાય લાગી રહ્યું છે કે કોરોના મહામારે ધ્યાનમાં રાખીને લોકો કારથી મુસાફરી કરવાને વધારે સુરક્ષિત માને છે. FADAના ચેરમેન પ્રણવ શાહ જણાવે છે કે, અમને આશા છે કે કારની ખરીદીનો ટ્રેન્ડ ચાલુ રહેશે.વેચાણ પરથી અનુમાન લગાવી શકાય કે અર્થવ્યવસ્થા સ્થિર થઈ રહી છે અને ટ્રેક પર આવી રહી છે.એન્ટ્રી લેવલના વાહનો તેમજ SUV સેગમેન્ટમાં પણ મોટી સંખ્યામાં વેચાણ થયું છે.
