બારડોલી : સુરત જિલ્લામાં વિદેશી દારૂની હેરાફેરી અટકાવવા માટે પોલીસ દ્વારા દોડધામ કરાઈ રહી છે ત્યારે એલસીબી પોલીસે કામરેજના વલથાણ ગામની સીમમાં ને.હા-48 ઉપર ફીલ્મી ઢબે પીછો કરીને વિદેશી દારૂ ભરેલી કારને ઝડપી પાડી હતી. જોકે તેમાં સવાર બુટલેગર નાસી છુટયો હતો. પોલીસે કારમાંથી વિદેશી દારૂની 1176 બોટલ મળી 8.07 લાખનો મુદ્દામાલ કબ્જે કર્યો હતો અને કાર નંબરના આધારે બુટલેગરોની શોધખોળ હાથ ધરી છે.
ગુજરાતમાં દારૂબંધી હોવા છતાં પરપ્રાંતમાંથી મોટા પ્રમાણમાં વિદેશી દારૂનો જથ્થો ઘુસાડવામાં આવતો હોય છે ત્યારે પોલીસ આ દારૂના જથ્થાને પકડવા માટે દોડધામ કરી રહી છે. ત્યારે સુરત જિલ્લા એલસીબી પોલીસની ટીમ પેટ્રોલીંગમાં હતી તે દરમ્યાન તેઓને બાતમી મળતા તેમણે કામરેજ તાલુકાનાં વલથાણ ગામની સીમમાં ને.હા-48 ઉપર નાકાબંધી કરી હતી.તે દરમ્યાન બાતમી મુજબની xuv કાર નંબર જીજે-05-જેએન-4196 આવતા ચાલક પોલીસની નાકાબંધી જોઈ કાર લઈ ભાગવા લાગ્યો હતો.એલસીબી પોલીસની ટીમે તેનો પીછો કરતાં તે કાર રસ્તામાં મૂકી ભાગી છૂટ્યો હતો.પોલીસ સ્થળ ઉપર પહોંચી કારમાં તપાસ કરતાં મોટા પ્રમાણમાં વિદેશી દારૂની નાની મોટી બોટલ નંગ 1176 કિંમત રૂ. 2.07 લાખનો જથ્થો મળી આવ્યો હતો.પોલીસે વિદેશી દારૂ તેમજ કાર મળી કુલ રૂ. 8.07 લાખનો મુદ્દામાલ કબ્જે કરી કાર ચાલકની શોધખોળ હાથ ધરી છે.આ વિદેશી દારૂનો જથ્થો દમણથી કારમાં ભરી કામરેજ થઈ સુરત શહેરમાં લઈ જવામાં આવી રહયો હોવાનું જાણવા મળે છે. બનાવ અંગે પોલીસે ગુનો નોંધી આગળની વધુ કાર્યવાહી હાથ ધરી છે.
