નવી દિલ્હી, તા.૪ : યુક્રેનમાં યુદ્ધ વચ્ચે ભારતીયોને સ્વદેશ લાવવા માટે ઓપરેશન ગંગા અભિયાન સતત ચાલી રહ્યું છે.યુક્રેન કટોકટી વચ્ચે ભારતીયોને સ્વદેશ લાવવાના અભિયાનની સમીક્ષા કરવા પીએમ નરેન્દ્ર મોદીએ શુક્રવારે ઉચ્ચ સ્તરની બેઠક યોજી હતી.બીજીબાજુ શુક્રવારે ૧૭ ફ્લાઈટ્સમાં અંદાજે ૩૮૦૦ ભારતીયોને પરત લવાયા હતા.ભારતીયોને બહાર લાવવાના અભિયાન વચ્ચે કીવમાં રશિયન સૈન્યના ગોળીબારમાં એક ભારતીય વિદ્યાર્થીને ઈજા પહોંચી હતી,તેને હોસ્પિટલમાં દાખલ કરાયો હતો.દરમિયાન પૂર્વીય યુક્રેનમાં ફસાયેલા સેંકડો ભારતીય વિદ્યાર્થીઓને રશિયા માર્ગે પરત લાવવા સરકારે તૈયારી કરી છે.
વિદેશ મંત્રાલયે જણાવ્યું હતું કે,યુક્રેનમાં રશિયન આક્રમણની આશંકાએ ભારત સરકારે પહેલી એડવાઈઝરી જાહેર કર્યા બાદથી અત્યાર સુધીમાં ૨૦ હજારથી વધુ ભારતીય નાગરિકોએ યુક્રેનની સરહદ પાર કરીને પશ્ચિમી દેશોમાં આશરો લીધો છે અને તેમને ભારત લાવવામાં આવી રહ્યા છે.વિદેશ સચિવ અરિંદમ બાગચીએ કહ્યું કે,યુક્રેનમાંથી ભારતીયોને પરત લાવવા માટે ઓપરેશન ગંગા હેઠળ આગામી ૨૪ કલાકમાં ૧૬ ફ્લાઈટ્સનું સંચાલન કરાશે,જેમાં એરફોર્સના અમેરિકન મૂળના સી-૧૭ ગ્લોબસ્ટર વિમાનનો પણ સમાવેશ થાય છે.
બીજીબાજુ શુક્રવારે કીવમાં ગોળીબારમાં ઘાયલ ભારતીય વિદ્યાર્થી હરજોત સિંહ અંગે માહિતી આપતા બાગચીએ કહ્યું કે,તેને કીવની હોસ્પિટલમાં દાખલ કરાયો છે.તેની સારવારનો ખર્ચ ભારત સરકાર ઊઠાવશે. અમે ઈજાગ્રસ્ત વિદ્યાર્થીની સ્થિતિ અંગે માહિતી મેળવવાનો પ્રયાસ કરી રહ્યા છીએ, પરંતુ તણાવપૂર્ણ વાતાવરણના કારણે મુશ્કેલીઓનો સામનો કરવો પડી રહ્યો છે.
નાગરિક ઉડ્ડયન મંત્રાલયે જણાવ્યું હતું કે,શુક્રવારે ૧૧ કોમર્શિયલ અને એરફોર્સની ત્રણ ફ્લાઈટ્સ મારફત ૨,૨૦૦ ભારતીયોને પરત લવાઈ રહ્યા છે.૧૦ ફ્લાઈટ્સનું દિલ્હી જ્યારે એકનું મુંબઈમાં ઉતરાણ થશે. રોમાનિયા,હંગેરી,સ્લોવેકિયા અને પોલેન્ડ જેવા યુક્રેનના પશ્ચિમી પડોશી દેશોમાંથી શુક્રવારે ૧૪ નાગરિક અને એરફોર્સની ત્રણ ફ્લાઈટ્સમાં ૩,૭૭૨ ભારતીયોને પરત લવાયા હતા.મંત્રાલયના જણાવ્યા મુજબ અત્યાર સુધીમાં કુલ ૪૩ સ્પેશિયલ નાગરિક ફ્લાઈટ્સમાં ૯,૩૬૪થી વધુ ભારતીયો સ્વદેશ આવી ચૂક્યા છે.
દરમિયાન પૂર્વીય યુક્રેનના શહેરો ખારકીવ અને સમીમાં હજુ અનેક ભારતીયો ફસાયેલા છે અને તેમના માટે પશ્ચિમી યુક્રેન સરહદે પહોંચવું મુશ્કેલ છે.પરિણામે ભારતીય એરફોર્સ રશિયન સૈન્યની મદદથી મોસ્કોમાંથી આ ભારતીયોને પરત લાવવાની યોજના બનાવી રહી છે.આ માટે એરફોર્સે રશિયન મૂળના બે વિમાનો આઈએલ-૭૬ને સ્ટેન્ડબાય રાખ્યા છે.
યુક્રેનમાં ફસાયેલા ભારતીયો અંગે ચિંતા વ્યક્ત કરતાં સુપ્રીમ કોર્ટે શુક્રવારે કેન્દ્ર સરકારની ૧૭,૦૦૦થી વધુ ભારતીયોને દેશમાં પરત લવાયા હોવાની રજૂઆતને ધ્યાનમાં લીધી હતી અને કહ્યું કે,કેન્દ્ર સરકારના પ્રયાસોની અમે પ્રશંસા કરીએ છીએ.અમે આ અંગે કશું જ વધુ કહેવા માગતા નથી,પરંતુ યુક્રેનમાં ફસાયેલા ભારતીય વિદ્યાર્થીઓના માતા-પિતા અને સંબંધીઓની વ્યાકુળતા અંગે અમે ચિંતિત છીએ.સુપ્રીમ કોર્ટે કેન્દ્રને યુક્રેનમાં ફસાયેલા વિદ્યાર્થીઓના માતા-પિતા પરિવારો માટે ‘ઓનલાઈન હેલ્પલાઈન’ શરૂ કરવા સૂચન કર્યું હતું અને દેશની વિવિધ હાઈકોર્ટ્સને ભારતીય વિદ્યાર્થીઓના યુક્રેનમાંથી સ્થળાંતર અંગે અરજીઓની સુનાવણી નહીં કરવા જણાવ્યું હતું.
