સુરત,તા. 21 માર્ચ 2023, મંગળવાર : સુરતમાં કોરોનાના કેસોમાં ધીમે ધીમે વધારો થઇ રહ્યો છે તો બીજી તરફ સીઝનલ ફ્લુના કેસોમાં પણ વધારો થતો જોવા મળી રહ્યો છે જેને લઈને તંત્ર સતર્ક થયું છે.સુરતની સિવિલ અને સ્મીમેર હોસ્પિટલમાં આઈસોલેશન વોર્ડ તૈયાર કરવામાં આવ્યો છે.જેમાં સિવિલ હોસ્પિટલમાં 10 તો સ્મીમેર હોસ્પિટલમાં 8 બેડ સાથેનો અલાયદો આઈસોલેશન વોર્ડ તૈયાર કરવામાં આવ્યો છે.
સુરત શહેરમાં કોરોના વકરવાની દહેશત વચ્ચે ઉનાળામાં માવઠું પડતા અને વાતાવરણમાં પલટો આવતા સીઝનલ ફ્લુના કેસોમાં પણ વધારો થતો જોવા મળી રહ્યો છે.હાલમાં સિવિલ હોસ્પિટલમાં દૈનિક 150 થી 200 જેટલા સીઝનલ ફ્લુના કેસો સામે આવતા હોવાનું જાણવા મળી રહ્યું છે.તંત્ર દ્વારા આગમચેતીના ભાગરૂપે તૈયારીઓ કરી દેવામાં આવી છે.
સુરતમાં મનપા દ્વારા ઈમરજન્સી કંટ્રોલ રૂમ શરુ કરાયા બાદ હવે આઈસોલેશન વોર્ડ શરુ કરી દેવામાં આવ્યો છે.સુરતની સિવિલ હોસ્પિટલમાં 10 બેડ અને સ્મીમેર હોસ્પિટલમાં 8 બેડનો અઈસોલેશન વોર્ડ શરુ કરી દેવામાં આવ્યો છે.સીઝનલ ફ્લુના દર્દીને તકલીફ ન પડે અને યોગ્ય સારવાર મળે તે માટે નવી સિવિલ ખાતે સ્ટેમ્પ સેલ બિલ્ડીંગમાં સીઝનલ ફ્લુના દર્દીઓ માટે 10 બેડનો આઈસોલેશન વોર્ડ શરુ કરવામાં આવ્યો છે.તમામ બેડ ઓક્સિજન અને વેન્ટિલેટર સહિતની જરૂરી સુવિધા સાથે સજ્જ રાખવામાં આવ્યો છે.
સિવિલ હોસ્પિટલમાં સુપ્રીડેન્ટ ગણેશ ગોવરેકરે જણાવ્યું હતું કે સીઝનલ ફ્લુના દર્દીઓને યોગ્ય સારવાર મળી રહે અને તેઓને આઈસોલેશન રાખવા માટે અલાયદો આઈસોલેશન વોર્ડ શરુ કરવામાં આવ્યો છે.અહી 10 બેડ ઓક્સીજન અને વેન્ટીલેટર સહિતની સુવિધા સાથે સજ્જ કરવામાં આવ્યા છે.તેઓએ વધુમાં જણાવ્યું હતું કે દર્દીઓને સારવાર માટે પૂરી ટીમ તૈયાર છે તેમ છતાં જો દર્દીઓ વધશે તો જરૂરિયાત મુજબ સ્ટાફ પણ વધારવામાં આવશે.
