ગાંધીનગર, તા. 21 એપ્રિલ 2023 શુક્રવાર : લોકસભા 2024ની ચૂંટણીને ધ્યાનમાં રાખીને આગામી મે મહિનાની તારીખ 19થી 21 દરમિયાન ત્રણ દિવસની ચિંતન શિબિરનું આયોજન કરવામાં આવી રહ્યું છે.આ ચિંતન શિબિર દરમિયાન રાજ્યમાં શિક્ષણ,આરોગ્ય,શહેરી વિકાસ અને ગ્રામ્ય વિસ્તારના વિકાસના એજન્ડા પર કામકાજ હાથ ધરવામાં આવશે.મહદ અંશે સ્ટેચ્યુ ઓફ યુનિટી કેવડિયા ખાતે યોજાનારી આ ચિંતન શિબિર માટે ગરમીને ધ્યાનમાં રાખીને અન્ય વૈકલ્પિક સ્થળોની વિચારણા ચાલી રહી છે. 300થી વધુ લોકોની એકી સાથે વ્યવસ્થા ઉભી કરવામાં આવશે.અગાઉ જીએનએફસી વડોદરા,મહેસાણા રિસોર્ટ તેમજ મહાત્મા મંદિર ખાતે આ ચિંતન શિબિરના આયોજન થયા છે,પરંતુ વધતી ગરમીને ધ્યાનમાં રાખીને સ્થળમાં ફેરફારના અવકાશ સાથે આ ચિંતન શિબિરમાં વહીવટી તંત્ર આગળ વધી રહ્યું છે.
વિવિધ સેશનમાં નિષ્ણાતોને આમંત્રણ આપવામાં આવશે
હાલ રાજ્ય માટે કેટલાક મહત્વના મુદ્દાઓ ઉપસ્થિત થયા છે.જેમાં પેપર લીક,ભરતી તેમજ ભ્રષ્ટાચાર માટે ઝીરો ટોલરન્સને પ્રાથમિકતા આપીને એજન્ડા તૈયાર કરવામાં આવી રહ્યો છે.તાજેતરમાં પેપર લીક કાંડ,ડમી કાંડ જેવા મુદ્દાઓને લઈને સરકારની છબી ખરડાઈ રહી છે.રાજ્યના સામાન્ય વહીવટી વિભાગના વહીવટી સુધારણા અને તાલીમ પ્રભાગ દ્વારા મોડ્યુલર તૈયાર કરવામાં આવી રહ્યું છે.જેમાં ખાસ કરીને વિવિધ સેશનમાં નિષ્ણાતોને આમંત્રણ આપવામાં આવશે.
