– 1991માં જ્યારે ભારતે 2.2 બિલિયન ડોલરની લોન લેવા 67 ટન સોનું ગીરવે મૂકવું પડ્યું હતું
– RBI સોનાના ભંડાર મામલે વિશ્વની તમામ કેન્દ્રીય બેંકોની યાદીમાં આઠમા સ્થાને પહોંચી
1991માં જ્યારે ભારત પાસે આયાત માટે વિદેશી ચલણ ન હતું ત્યારે ભારતે 2.2 બિલિયન ડોલરની લોન લેવા માટે તેનું 67 ટન સોનું ગીરવે મૂકવું પડ્યું હતું.તત્કાલીન કેન્દ્ર સરકારે આ નિર્ણય લીધો હતો.પરંતુ હવે તે ચિત્ર બદલાઈ ગયું છે.ભારતે ગીરવે મૂકેલું સોનું તો છોડાવી જ લીધું છે સાથે આજે દુનિયાના કુલ રિઝર્વનું 8 ટકા સોનું આરબીઆઈ પાસે છે.
કેમ આરબીઆઈએ વધારે ખરીદી કરી?
કોરોના મહામારીને કારણે વૈશ્વિક આર્થિક અનિશ્ચિતતાઓ અને પછી વધતી જતી મોંઘવારી વચ્ચે આ રિઝર્વ બેંક ઓફ ઈન્ડિયાએ સોનાની મોટાપાયે ખરીદી કરી છે.આંકડા અનુસાર, માર્ચ 2020 થી માર્ચ 2023 વચ્ચે આરબીઆઈએ 137.19 ટન સોનું ખરીદ્યું છે.માત્ર ત્રણ વર્ષમાં RBIના ગોલ્ડ રિઝર્વમાં 79 ટકાનો ઉછાળો આવ્યો છે.
સોનું ખરીદવા મામલે આરબીઆઈ વિશ્વની કેન્દ્રીય બેન્કોની યાદીમાં 8માં ક્રમે
આ સમયગાળા દરમિયાન વિશ્વની તમામ કેન્દ્રીય બેંકોએ સોનાની ખરીદી કરી છે.છેલ્લા ત્રણ વર્ષમાં 137 ટનથી વધુ સોનું ખરીદ્યા પછી RBI સોનાના ભંડાર મામલે વિશ્વની તમામ કેન્દ્રીય બેંકોની યાદીમાં આઠમા સ્થાને પહોંચી ગઈ છે.માર્ચ 2020માં, RBIના કુલ વિદેશી મુદ્રા ભંડારમાં ગોલ્ડ રિઝર્વનો હિસ્સો 6 ટકા હતો,જે વધીને 7.85 ટકાની નજીક પહોંચી ગયો છે.આરબીઆઈ પાસે સોનાનો ભંડાર 790 ટનથી વધુ થઈ ગયો છે.
જુઓ કયા વર્ષે કેટલી ખરીદી કરી
માહિતી અનુસાર માર્ચ 2019 સુધીમાં આરબીઆઈ પાસે કુલ 612.56 ટન, માર્ચ 2020માં 653 ટન,માર્ચ 2021માં 695.31 ટન,માર્ચ 2022માં 760.42 ટન સોનાનો કુલ ભંડાર હતો અને હવે તે 790 ટનને વટાવી ગયો છે.એટલે કે RBIએ એક વર્ષમાં 30 ટનથી વધુ સોનું ખરીદ્યું છે.ચાર વર્ષમાં આરબીઆઈએ 178 ટન સોનું ખરીદ્યું છે.
