નવી દિલ્હી : હિન્દુજા ગ્રૂપ ઇન્ડસઇન્ડ બેન્કમાં તેનો હિસ્સો વધારવા માટે રૂ. 10,000 કરોડના રોકાણ માટે વાતચીત કરી રહ્યું છે.આ ડીલ નાણાકીય વર્ષ 2023-24ના બીજા ક્વાર્ટરમાં પૂર્ણ થઈ શકે છે.ઇટી નાઉના અહેવાલમાં આ વાત કહેવામાં આવી છે.શુક્રવારે ઇન્ડસઇન્ડ બેન્કના શેરમાં ત્રણ ટકાનો ઉછાળો જોવા મળ્યો હતો.
કેટલાક મીડિયા રિપોર્ટ્સમાં એવું કહેવામાં આવી રહ્યું છે કે ભારતીય રિઝર્વ બેન્ક હિન્દુજા ગ્રૂપને ઇન્ડસઇન્ડ બેન્કમાં તેનો હિસ્સો વધારીને 26% કરવાની મંજૂરી આપી શકે છે.આ અહેવાલને કારણે બેન્કના શેરમાં ઉછાળો આવ્યો હતો અને શુક્રવારે બજાર બંધ થવાના સમયે NSE પર આ શેરની કિંમત 1309.40 રૂપિયા હતી.અગાઉ આરબીઆઈએ હિન્દુજા ગ્રૂપની કંપની ઇન્ડસઇન્ડ ઇન્ટરનેશનલ હોલ્ડિંગ્સના ઇન્ડસઇન્ડ બેન્કમાં તેનો હિસ્સો વધારીને 26 ટકા કરવાની દરખાસ્તને સૈદ્ધાંતિક અને શરતી મંજૂરી આપી હતી.પ્રમોટરો ઇન્ડસઇન્ડ બેંકમાં લઘુમતી હિસ્સો ધરાવે છે.માર્ચના અંતે બેંકમાં કુલ પ્રમોટરોનો હિસ્સો 16.51 ટકા હતો,જેમાંથી ઇન્ડસઇન્ડ ઇન્ટરનેશનલ હોલ્ડિંગ્સ 12.58 ટકા અને ઇન્ડસઇન્ડ લિમિટેડનો હિસ્સો 3.92 ટકા હતો.
આ વર્ષે અત્યાર સુધીમાં બેન્કના શેરમાં સાત ટકા સુધીનો ઉછાળો જોવા મળ્યો છે.તે જ સમયે છેલ્લા એક વર્ષમાં બેન્કના શેરે લગભગ 67 ટકા રિટર્ન આપ્યું છે.ગયા મહિને ખાનગી બેન્કોનું માર્કેટ કેપ ત્રણ વર્ષના ગાળા બાદ પ્રથમ વખત રૂ. 1 લાખ કરોડને પાર કરી ગયું હતું.અગાઉ જાન્યુઆરી 2020માં આ શેરનું માર્કેટ કેપ રૂ. 1 લાખ કરોડને પાર કરી ગયું હતું.જો કે, કોવિડ-19 યુગ દરમિયાન શેરોમાં ભારે ઘટાડાથી બેન્કનું માર્કેટ કેપ ઘટીને રૂ. 20,889 કરોડ થઈ ગયું છે.શેરની કિંમત હાલમાં 52 સપ્તાહની ટોચની આસપાસ છે.બેન્કનો શેર 13 જૂને રૂ. 1,342.90ના સ્તરે પહોંચી ગયો હતો.આ સ્ટૉકની આ 52 સપ્તાહની ઊંચી સપાટી છે.જ્યારે આ સ્ટૉકનો 52 સપ્તાહનો તળિયે રૂ. 763.20 છે.
