લંડન : બ્રિટનમાં બાળ જાતીય શોષણ સાથે સંકળાયેલા ગ્રુમિંગ ગેંગ્સના મુદ્દે ફરી એકવાર રાજકીય અને સામાજિક ચર્ચા શરૂ થઈ છે.બ્રિટિશ સાંસદ રુપર્ટ લોવે સંસદમાં આપેલા ભાષણ દરમિયાન પીડિતાઓના નિવેદનોનો ઉલ્લેખ કરીને મામલાની ગંભીરતા અંગે ચિંતા વ્યક્ત કરી હતી.
સાંસદ લોવે જણાવ્યું હતું કે તેમના નેતૃત્વ હેઠળ કરવામાં આવેલી ખાનગી તપાસ દરમિયાન બ્રિટનના અનેક વિસ્તારોમાં ગેંગ આધારિત બાળ જાતીય શોષણના કિસ્સાઓ સામે આવ્યા હતા.તેમણે દાવો કર્યો કે કેટલાક વિસ્તારોમાં આવા ગુનાઓ વર્ષો સુધી ચાલતા રહ્યા હોવા છતાં સંબંધિત તંત્ર દ્વારા પૂરતી કાર્યવાહી કરવામાં આવી નહોતી.સંસદમાં રજૂ કરાયેલા નિવેદનોમાં કેટલીક પીડિતાઓએ પોતાના પર લાંબા સમય સુધી શારીરિક અને માનસિક અત્યાચાર થયાના આક્ષેપો કર્યા હતા.કેટલાક નિવેદનોમાં અનેક આરોપીઓ દ્વારા વારંવાર શોષણ કરવામાં આવ્યું હોવાનો દાવો પણ કરવામાં આવ્યો હતો.
સાંસદે જણાવ્યું કે પીડિતાઓના જણાવ્યા અનુસાર કેટલાક કિસ્સાઓમાં ધર્મ અને જાતિના આધારે માનસિક દબાણ ઊભું કરવાનો પ્રયાસ કરવામાં આવ્યો હતો.સાથે જ પોલીસ અને આરોગ્ય સેવાઓની કામગીરી અંગે પણ ગંભીર સવાલો ઉઠાવવામાં આવ્યા હતા.ભાષણ દરમિયાન લોવે જણાવ્યું હતું કે આગામી સમયમાં જાહેર થનારા સ્વતંત્ર અહેવાલમાં સમગ્ર મામલાની વધુ વિગત બહાર આવી શકે છે.તેમણે સરકાર અને કાયદા અમલવારી એજન્સીઓને પીડિતોને ન્યાય અપાવવા તથા જવાબદારો સામે કડક કાર્યવાહી કરવા અપીલ કરી હતી.
ઉલ્લેખનીય છે કે રોધરહામ,રોશડેલ અને ઓલ્ડહેમ સહિતના શહેરોમાં અગાઉ થયેલી તપાસ દરમિયાન ગ્રુમિંગ ગેંગ્સ દ્વારા બાળ જાતીય શોષણના અનેક કિસ્સાઓ પ્રકાશમાં આવ્યા હતા,જેના કારણે બ્રિટનમાં આ મુદ્દે લાંબા સમયથી ચર્ચા ચાલી રહી છે.બ્રિટનમાં ગ્રુમિંગ ગેંગ્સનો મુદ્દો છેલ્લા બે દાયકાથી ચર્ચાનો વિષય રહ્યો છે.અન્ય શહેરોમાં થયેલી તપાસોમાં કેટલાક કિસ્સાઓમાં પાકિસ્તાની મૂળના મુસ્લિમ પુરુષોના જૂથો સંડોવાયેલા હોવાના તારણો સામે આવ્યા હતા.આ મુદ્દાને લઈને રાજકીય અને સામાજિક સ્તરે ભારે ચર્ચા થઈ હતી.જોકે બ્રિટિશ સરકાર,પોલીસ અને વિવિધ સ્વતંત્ર અહેવાલોએ વારંવાર સ્પષ્ટ કર્યું છે કે બાળ જાતીય શોષણ કોઈ એક ધર્મ,જાતિ કે સમુદાય પૂરતું મર્યાદિત નથી અને આવા ગુનાઓ વિવિધ પૃષ્ઠભૂમિના લોકો દ્વારા પણ આચરવામાં આવ્યા છે.વિવાદનું મુખ્ય કારણ એ રહ્યું છે કે કેટલાક વિસ્તારોમાં આરોપીઓની પૃષ્ઠભૂમિ અંગે ખુલ્લી ચર્ચા કરવામાં સ્થાનિક તંત્ર અને અધિકારીઓ અચકાતા રહ્યા હતા,જેના કારણે પીડિતાઓને સમયસર ન્યાય મળ્યો ન હોવાનું વિવેચકોનું કહેવું છે.તાજેતરમાં કેટલાક સાંસદો અને સામાજિક કાર્યકરોએ સમગ્ર મામલે વધુ વ્યાપક અને સ્વતંત્ર તપાસની માંગ ફરીથી ઉઠાવી છે.
