સુરત : સુરત મહાનગર પાલિકાની વિવિધ ખાસ કમિટીઓની રચનાને લઈને ભાજપ સંગઠને આંતરિક સ્તરે કવાયત તેજ કરી છે.મેયર અને પદાધિકારીઓની પસંદગી બાદ હવે 12 ખાસ કમિટીઓના ચેરમેન, ઉપાધ્યક્ષ અને સભ્યોની નિમણૂક પર રાજકીય વર્તુળોની નજર મંડાઈ છે.
સૂત્રોના જણાવ્યા મુજબ, તાજેતરમાં યોજાયેલી સંગઠનાત્મક બેઠકો બાદ શહેર ભાજપના હોદ્દેદારો,ધારાસભ્યો,સાંસદો અને અન્ય આગેવાનો પાસેથી વિવિધ કમિટીઓ માટે સંભવિત નામો મંગાવવામાં આવ્યા છે.આ પ્રક્રિયાને આગામી કમિટી રચના માટેની પ્રાથમિક તૈયારી તરીકે જોવામાં આવી રહી છે.ભાજપના આંતરિક વર્તુળોમાં એવી ચર્ચા છે કે કમિટીઓની રચના વખતે વિવિધ વિસ્તારો અને રાજકીય સમીકરણોને ધ્યાનમાં રાખીને જવાબદારીઓનું વિતરણ કરવામાં આવી શકે છે.જોકે, ચેરમેન પદોની ફાળવણી અંગે હજુ સુધી કોઈ સત્તાવાર નિર્ણય જાહેર કરવામાં આવ્યો નથી.પાલિકાની અગાઉની ચૂંટણી અને ત્યારબાદ પદાધિકારીઓની પસંદગી દરમિયાન વિવિધ સ્તરે થયેલી ચર્ચાઓને ધ્યાનમાં રાખીને આ વખતે સંગઠન વધુ સુવ્યવસ્થિત અને સંતુલિત પ્રક્રિયા અપનાવવા ઇચ્છે છે.પક્ષના નેતૃત્વ દ્વારા વિવિધ આગેવાનોના અભિપ્રાય મેળવવામાં આવી રહ્યા હોવાથી અંતિમ યાદીમાં અનેક પરિબળોને મહત્વ આપવામાં આવે તેવી શક્યતા છે.
રાજકીય નિરીક્ષકોનું માનવું છે કે ખાસ કમિટીઓની રચના માત્ર વહીવટી દ્રષ્ટિએ જ નહીં પરંતુ સંગઠનાત્મક સંતુલન અને ભવિષ્યના રાજકીય સમીકરણો માટે પણ મહત્વપૂર્ણ સાબિત થશે.હવે પ્રદેશ અને શહેર સ્તરના નેતૃત્વ દ્વારા લેવામાં આવતા અંતિમ નિર્ણય પર સૌની નજર છે.સુરત મહાનગર પાલિકાની ખાસ કમિટીઓની સત્તાવાર જાહેરાત આગામી દિવસોમાં થવાની સંભાવના વ્યક્ત કરવામાં આવી રહી છે,ત્યારબાદ ચેરમેન અને અન્ય હોદ્દેદારોના નામો પણ સ્પષ્ટ થશે.
